ТЭ ӦД ПЫКӦД ВӦЛІН ВЕК

Юрик воклы.


Петала ме талун вӧрӧ
Медводдзаысь вотны тшак,
Мися, гашкӧ, зэръяс бӧрын
Ловзьыштіс нин косьмӧм яг.

Луныс гажа, гӧгӧр сӧстӧм,
Абу неважӧн кодь жар,
Медся бурыс: номтӧм-лӧдзтӧм.
Гӧгӧр дзирдалӧ лыс ва!

Еджыд байдӧг этша кымӧр
Сиӧ меным лача туй,
Медся бурсӧ муртса кывмӧн
Сяльгӧ-сьылӧ Льӧмъя ю.

Сэсся-й мыччысис ме водзӧ
Мугов, банйӧм Дона Гоб!
Таво вылӧ дзик на медводз!
Зумыд выліыс и под!

Сэтшӧм лоис меным нимкодь!
Небзис менам мудзӧм лов — 
Быттьӧ тайӧ бурыс эм кӧ,
Немтор сэсся оз и ков!

Сэсся тув кодь гӧрд гоб сюри!
Нӧшта еджыд, нӧшта гӧрд!
Номыртӧмӧсь, бурсьыс бурӧсь!
И гажа, ыркыд ю дор вӧр!

Сэсся сатшкысьлі ме кустӧ,
Номсасигмоз сёйи льӧм — 
Сэтшӧм таво сійӧ чӧскыд!
Пӧжысь шонді улад — лем.

Сэсся пыри пӧрӧм бокӧ — 
Сьӧдов муа васӧд под...
Кык во сайын татысь воккӧд
Ӧдва кыским Дона Гоб...

Таво немтор на оз тыдав...
Эз нин ло и муса вок,
Оз нин татчӧ сійӧ сибав,
Некор оз нин сэсся лок...

Виччысьтӧг тай шаньӧй «сотчис» — 
Босьтіс сійӧс Ылі Му...
Ӧні Суйӧр саяд сэтчӧ
Некыдз весиг он и мун...

Шуштӧм лои пемыдінас,
Лолӧс шымыртіс пӧсь дой,
Некыдз ог ме ӧшйы инӧ,
Быттьӧ пуксьӧ помтӧм вой...

Муса вокӧй, менам бурӧй,
Ӧтнамӧс тай колин тэ,
Кыдзи водзӧ кутны юрӧс? — 
Тэ ӧд пыкӧд вӧлін век...

Бӧр ме пета юӧй дінӧ,
Кӧні вежӧсь кыдз и видз...
Чужан Муӧй, югыдінӧй,
Лёкторъясысь менӧ видз!

Кульышта ме сюмӧд кыддзысь,
Вӧча лӧсьыд чибльӧг-дар...
Ваыс ёльын сӧстӧм, кӧдзыд — 
Быттьӧ ловзьӧдана Ва,

Бӧр на ловзьӧдыштӧ менӧ
Лолӧй выльысь восьтӧ кад,
Ыджыд шогӧс кыдзкӧ венӧ,
И Югыд Шонділы ме рад!

Лэчча гортӧ, ньӧба вина,
Выйӧн пӧжа Чӧскыд Гоб;
Вокӧй, ловтӧ кӧть ме дінӧ
Ыстыв кутшӧмкӧ да ног...