ЛОӦ НЮВНЫ БУРДТӦМ ДОЙЯС

Менӧ ӧні лӧньтасӧджык кыскӧ,
Медым аскӧд сёрнитыштны сэн,
Казьтылӧмӧй сэки быттьӧ мыськӧ
Олӧм, кодӧс важӧн сетліс Ен:

Мыйджык артмис да мый эз ло сідзи,
И кутшӧм тані менам аслам мыж,
Мыйла ковтӧмторйӧ тшӧтш ме видзси,
Кӧть и быттьӧ сідзсӧ абу ныж.

Чужӧм дырсянь миянӧс век песіс
Помтӧм лёка-вира кызьӧд нэм,
Сьӧкыд вӧлі мортлы тайӧ пежас
Кутны ставсӧ, морт нога мый эм.

Ӧні лоӧ нювны бурдтӧм дойяс — 
Найӧс мавтан некыдз нин оз ло...
Нюжалӧ век узьтӧг курзьӧм войыс,
Кымын водзӧ олан — содӧ шог.

Менӧ ӧні лӧньтасӧджык кыскӧ,
Медым аскӧд сёрнитыштны сэн,
Казьтылӧмӧй ӧні выльысь мыськӧ
Олӧм, кодӧс коркӧ сетліс Ен.