* * *

Овлӧ здук, кор сьӧкыд олӧм понда
Мортлӧн дзикӧдз сьӧдмӧ-сукмӧ вир,
И сылы овлӧ бурджык гортйӧ водны — 
Кыскӧ сійӧс медся шуштӧм йир.

И матӧ воӧм мортыс мырдӧн восьтӧ
Мездӧм вайысь курыд вина доз,
И пыр жӧ сійӧс шоныд гыӧн босьтӧ,
И лолыс быттьӧ аддзӧ мелі поз.

Сэсся мортыс велалӧ та дінӧ — 
Чожа чинӧ небзьӧдчалан кост,
Сэсся-й сійӧс тшапнитӧ йӧй вынӧн
Нильӧг изъя, пузьӧм ваа кось.