НЁРПАЛІГӦН

Быдлаті тай менам небзьӧм — 
Висьӧ сьӧлӧм, висьӧ лов,
Вирысь-сӧнысь вынӧй лэбзьӧм,
Кӧть и сэсся эн нин ов.

Немтор дінӧ ог и шонав,
Помтӧг йирӧ шог да мог — 
Олӧм оз вай колан помсӧ,
Колан кӧсйӧмыс оз лок.

Гашкӧ-й менсьым олӧм-мичсӧ,
Кодӧс сетліс коркӧ ен,
Гусялісны, сэсся-й вичмис
Лӧсявтӧмкӧд нуны вен?..

Сӧмын ӧні мыйкӧ вежны
Ог нин вермы ни ог куж,
Некытчӧ нин ӧні кежны, — 
Мед на бара мездӧ удж!