ЗАРНИ НЭМШуӧны, му вылын коркӧ — Код тӧдас, кор нин и эм! — Сӧстӧм на вежӧра мортлӧн Зарни пӧ вӧлӧма нэм. Муыс сэк вӧлӧма юктӧм, Кӧть сэсся кодарӧ мун — Олӧм кӧн бурджыка югдӧ, Мыччасьӧ лышкыдджык лун. Мый колӧ, сійӧс и керан, Веськыда шуны он пов, Кӧть эськӧ изйысь на черыд, Оз на шед лючки нянь-сов. Удж вылысь некод оз вӧтлы, Завидь ни горшлун оз пур, Панялан войтыркӧд ӧтвыв Пуӧвӧй тасьтіысь нур. Кузяла-пасьтала гыбзьӧ Котралысь-лэбалысь лов, Сӧмын тэ некор он шырзьы, Талун мый тэныд оз ков. Вӧр-вакӧд ӧтвылысь олан, Гаж тэныд сэтӧн и горт... Сідзкӧ нӧ, зарни-шуд олӧм Сэтчӧ и колис нин морт? Ӧні тай му вылыс пасьта Лэптӧм сук потшӧс да йӧр, Быд мортлы сё пӧвста дасьтӧм Ад биӧн дзужалысь кӧрт. Некыдз оз бурасьны йӧзыс — Быттьӧкӧ сьӧлӧмныс кын, Ӧтарӧ лӧг сӧмын ӧзйӧ, Ӧтарӧ содӧ лёк вын. Аскиа лун вӧсна полӧм Пежалӧ йӧзлысь лун-вой, Дерт, кӧнкӧ, таысь тшӧтш волӧ Ёнджыка висьӧм и дой... Сӧмын ме ыджыда эска, Морт вылӧ надея эм — Тыр шуда олӧмсӧ водзын на пестас, Водзын на зарни-шуд нэм! Сэки бур енъясыс лыдӧ Лэптысяс Вежӧр да Мич, Дзоридз моз воссяс сэк быдӧн, Лёкыс сэк матӧ оз сидз. Сэтшӧмӧдз лыбас сэк мортыс — Збыль вылӧ лоӧ кыдз ен! — Олӧмсӧ вӧчас кыдз ворсӧм Помӧдзыс сӧвмӧм юр вем... Ми, дерт, сы кадӧдз ог олӧй — Мырдысьӧн сійӧс он вай! — Сӧмын и ми ёна колім! — Зарни-шуд нэмас, код лоӧ, Ассьыным пуктім бур пай!
