ТӦВЗИС ЕДЖЫД СЬӦМЪЯ РОЗ

Карса праздник вылын тотшкӧ-йӧктӧ
Коми ногӧн бура вӧччӧм ань — 
Жбыркъялӧ, кыдз вылын юра пӧтка,
Чужӧм вылас мича на и шань.

Сӧмын регыд казявны ме понді — 
Ме вылысь оз вештыв аньыд син,
Видзӧдласнас ёрӧ быттьӧ шонді,
Весиг эг кут аддзыны ме ин.

Ставыс кутіс бергавны син водзын,
Сьӧлӧм нӧйтчӧ, содтӧ тіпкан ӧд — 
Абу-ӧ нӧ тайӧ югыд кодзув,
Югнитіс код менам томлунӧд?..

Льӧм пу улын сулалім ми сэсся — 
Тӧвзис-киссис еджыд сьӧмъя роз — 
Синъясаным ӧта-мӧдлы пӧся
Видзӧдім ми важъя-важъя моз.

 — Чужӧмыд тай дӧрӧм кодьыд еджыд... — 
А ме сылы: — Пырсӧ эг и тӧд... — 
 — А ме тэнӧ тӧді пырысь-пыр жӧ,
Тэ кодьыс тай абу сэсся мӧд;

Казялі да эбӧс дзикӧдз бырліс — 
Ӧдва-ӧдва кок йылысь эг усь — 
Сэсся-й быттьӧ бӧр воис том дырӧй,
Быттьӧ-й меным бордъяс вайис юсь...

 — Янсалӧмсянь мыйта колис кадыс... — 
Меным некыдз сёрни визь оз во.
 — А мем ставыс век на сэтшӧм матыс,
Визувтіс кӧть комын дай вит во…

 — Кыдз нӧ олан? Велӧдан на, кывсьӧ?..
 — Олам тай со, сісьтам керӧсйыв,
Челядь быдмалісны, верӧс кувсис,
Ӧні выльысь лои ӧтка ныв...

Сылӧн быттьӧ важ моз вильыш сёрни,
Сӧмын видзӧдласас курыд нюм — 
«Выльысь аддзысьнысӧ ми тай сёрмим!..» — 
Быттьӧ кӧсйӧ шуны гуся дум.

 — Талунъясӧ сьӧлӧм кыліс менам — 
Татчӧ вотӧдз вӧталі кык вой:
Быттьӧкӧ салдатӧ на тэ мунан,
Ачыд сэтшӧм авъя, сэтшӧм збой,

А ме помтӧм шуда тэкӧд орччӧн,
Менам быттьӧ сылӧ лы и вем,
Кыськӧ китыр дзоридз меным мыччин — 
Пытшкас вӧлӧм лежнӧг дзоридз ем;

Бытшкис емыс ёся менсьым киӧс,
А ме воча серӧктышті — чаж,
Сӧмын тай и бытшкӧма сэк сійӧ
Миян дженьыд шуднымӧйлысь гаж... 

Нормӧмӧн ме кывза татшӧм кывъяс,
Сэсся-й менӧ чунгӧ ем кодь мӧвп: 
«Эг кӧ сэки вӧлӧй сэтшӧм йӧйӧсь,
Олӧм вермис артмыны дзик мӧд...»

Ог ме ӧні норась немтор вылӧ — 
Олӧмыслысь тӧдлі гуг и бан,
Сӧмын... Кыдз нӧ эськӧ ставыс вӧлі,
Коркӧсӧ эз торйӧд кӧ сьӧд кань?..

 — Дона письмӧястӧ дыр ме видзи — 
Мед нин эз ор бӧръя зарни сі,
Сӧмын тай и дзебасінӧ судзӧм
Чорыд мортлӧн гӧгӧрвотӧм ки;

Талун олӧм курыдсӧ ме ӧкта — 
Сійӧс ачым кӧдзлі уна во,
Талун тэ водзын ме усьтӧдз йӧкта,
Сэсся мый кӧть мекӧд мед эз ло...

Ӧтнам сулышті на льӧм пу улын,
Сьӧлӧм пессис дзугйын лэбач моз.
Гӧгӧр праздник гора ворсіс-сьыліс,
Вывсянь тӧвзис еджыд сьӧмъя роз.