* * *

Челядьдырӧй югнитлас кор меын,
Мелі руӧн ойдлӧ мудзӧм лов,
Весиг быттьӧ сьӧлӧм дойяс венлӧ,
Кӧть и колис уна-уна во.

Сетыштіс на тай войнаяс костын
Олыштны том айкӧд-мамкӧд мем
Яндзимсӧ и мортъялунсӧ воштӧм,
Вирӧн-лёкӧн ойдӧм кызьӧд нэм.

Вӧлі миян кыпыд гажа керка,
Уна сёянторъяс быдтысь йӧр,
Чӧскыд йӧлӧн Сюрук пӧттӧдз вердӧ,
Матын помся мыйкӧ мойдӧ вӧр.

Вӧлі сымда югыд да пӧсь шонді!
Орччӧн визувтіс сӧдз ваа ю;
Тшӧтш и гортад мелілун век шонтӧ...
Ставсӧ тайӧс век кӧть пӧттӧдз ю!

Гашкӧ-й век на отсалӧ мем овны
Челядьдырся этшаник да шуд,
Сытӧг, гашкӧ, дзик нин пӧді ловнам,
Вӧлі тыртӧм менам олан куд...

Сетыштіс на тай войнаяс костын
Олыштны том айкӧд-мамкӧд мем
Яндзимсӧ и мортъялунсӧ воштӧм,
Вирӧн-лёкӧн ойдӧм кызьӧд нэм.