МЫЙДЖЫК ШУАС ВЫЛЬӦН ОЛЫСЬ МОРТ?

Мыйта йӧз нин вуджӧртіс син водзті — 
Оліс-выліс, сэсся и эз ло — 
Мӧдар туяс мӧдӧдчан кор водсӧн,
Бӧрсӧ некод он тай сэсся во.

Сӧмын быттьӧ ловъяӧн век кылӧ
Уна мортӧс менам чунӧк лов — 
Быттьӧ найӧ асланыс бур кылӧн
Туйдӧны не вӧчны, мый оз ков.

Дерт, и ачым вуджӧрӧн ме лоа — 
Оз кут кывны менам олан гор...
Кыдз ме сэки код дорӧ кӧ воа?
Мыйджык шуас выльӧн олысь морт?

Олӧм кадъяс йитысь татшӧм везйыс
Медым некор лёк ногӧн эз ор — 
Ӧти кадсянь мӧдӧ медым вӧзйис
Унджык бурсӧ регыд олысь морт.