1985ʼ ВО, АВГУСТ 6ʼ ЛУН1Ёна жӧ мича да гажа сэзь рытыс! — Лӧньӧма ывла и сӧдз ваа ю, Вӧр-ваыс вӧйтӧдчӧ мойдӧ ли вӧтӧ, Мӧдлапӧв видз вылын нӧгыльтчӧ ру, Улыньтчӧм шондіысь югзьӧма енэж, Ясыда мыччасьӧ вӧр-пулӧн кытш, Дон-сӧстӧм сынӧдсӧ сьӧд ньӧвйӧн гижӧ Чирзігтыр пасьтала кыпъялысь джыдж. Пывсянысь воис со ичӧтик зонка — Небыда банйӧм пӧсь тупӧсь кодь дзик, Чеччалӧ, чиктылӧ — джыдж кодь жӧ нимкодь, Гур восьтӧм ӧшиньӧд нюжйӧдлӧ ки. Водзынджык тшакла ми петалім вӧрӧ — Аддзас да, ку пиас некыдз оз тӧр, — Сэсся и пӧжим том картупель сорӧн — Ас вотӧм чӧскыдлӧн — медчӧскыд кӧр! Содтӧдсӧ керкалӧн ӧшинь ув йӧрын Номсӧдіс миянӧс сэтӧр и оз, Сэсся и лунтырсӧ ноксьӧмыс бӧрын Мудзнымӧс мыськовтіс пӧсь корӧсь гоз. Ӧні со ичӧт морт ойдӧма шудӧн, Енэжса андел кодь сӧстӧм и шань, Чикыш ног зачесьтыс вир-сӧнас пуӧ, Дзоридз моз олӧмлы воссьӧма — жан. Менӧ и ачымӧс лы-сьӧмӧдз шонтӧ Ичӧтик внукӧй и шондіа ар, Весиг мем тӧдлытӧг чайтсьыны пондӧ, Быттьӧ ме выльысь том дырся кодь яр. Вӧр-валӧн аръявыв лышкыдмӧм пирас Коркӧ и аслам тшӧтш чужсьылӧм тан — Эз-ӧ на та понда йиджовтчы вирӧдз Зарниа арыслӧн зарниа бан? Та кадӧ ясыда ветлӧдлӧ лолӧй, Быдторыс дінӧ сэк сьӧлӧмӧй пым, Олӧмыс дзоньнас сэк мусаджык лолӧ, Водзланьӧ овнысӧ кыла на вын... Сэсся сӧдз енэжын муркнитіс, кылӧ, Быттьӧкӧ ылыстчысь бушковлӧн гым — Пыдӧстӧм сӧдзсӧ дзик асывъя вылӧ Еджыда гӧрыштӧ дзирдалысь шы: Тадзсӧ пӧ лэбӧны миян му весьтӧд Сэтчань, кӧн ылын Япония му, — Мӧд кывъя войтырлы туй сетӧм веськыд — Бур ногӧн ӧтарӧ-мӧдарӧ мун... Меным жӧ сьӧлӧмӧ виччысьтӧг вочкӧ, Вир-сӧнӧн кыла дзик мӧд пӧлӧс йирк, Пемдылӧм син водзын шуштӧма воссьӧ Медшуштӧм луныслӧн медшуштӧм йир: Тайӧ жӧ лунас нелямын во сайын, Ывла кор вӧлі жӧ шыч и ни рач, Япония му весьтӧ енэжыс вайис Дзужалысь атомлысь тшын-биа тшак.2Олӧмыслӧн татшӧм шоныдыс да лӧньыс вылӧ... Кымын татшӧм шуда зонка пыр жӧ пузис-сыліс, Ру чиръясӧ ловъя вывсьыс ӧти здукӧн пӧрис, Изйын вуджӧръясӧдз еджыд биыс-доныс кӧрис... Югыд лунсӧ личкис ловйӧн пузьысь-сотчысь йӧзлӧн чад... Та бӧрын нӧ мыйся вермас нӧшта лоны ад?..3Морт помся адыс мем лы-вемӧдз сидзӧ, Сьӧлӧмӧс юковтӧ вируля дой: Ӧтвылысь ог ӧмӧй олӧмсӧ видзӧй? Ставӧн мӧй дзожнитчам кыдзи сир войт?.. Джыджъяслань кекӧньсӧ нюжйӧдлӧ зонка, Ачыс дась лэбовтны ӧшиньысь пыр, Ставторсьыс сэтшӧм нин лоӧма нимкодь, — Мед эськӧ татшӧмыс некор эз быр! Век вӧлі сӧстӧм мед морт оландыр!
