ВИДЗ ВЫЛЫН

Зарни лун сьӧвмӧс.
Долыд уджавны
Гажа удж вылын,
Паськыд видз вылын!

Сэн колхознӧй йӧз,
Тан колхознӧй йӧз.
Сэні ытшкӧны,
Тані куртӧны.

Ытшкысьӧ том ныв — 
Мудзлунсӧ оз кыв.
Коса дзирдалӧ — 
Ставнас вирдалӧ.

Ныв бӧрся том зон
Вӧтчӧ — мича, ён,
Кӧсйӧ ордйӧдны,
Вермӧм шедӧдны.

Сӧмын ӧти сыв — 
Сэтӧні и ныв.
Он тай сӧмын босьт:
Уджын нылыс ёсь.

— Аттӧ дивӧ морт!
Тэнад, дерт, эм борд.
Сэтшӧм варов, юж * — 
Вӧтӧдны ог куж! — 

Нывлы шуӧ зон
Рытын сэн, кӧн вон
Еджыд дӧлалӧ,
Ылӧдз тыдалӧ:

— Дугды серавны,
Весьтас керавны!
Аслад абу мудз,
Кольны вын оз судз. — 

Кывзӧ бригадир,
Нимкодьлунӧн тыр:
— Сідз? И медым сідз:
Усис миян видз.

Ассьыным кӧ мог
Вӧчим, абу шог.
Ытшкӧма нырд бок,
Пуӧма сук рок.

Зонлы вывті рад:
— Правильнӧй удж лад!
Али Миша Кир
Омӧль бригадир?! — 

Кирлы шуӧ тадз
Зон, а ачыс надз
Нылӧс кутыштлӧ,
Бердас жмитыштлӧ.

Морӧсас-ӧ йи?
Ыджыд муслун би
Сэні ломалӧ,
Мичтӧ том олӧм.

Кылӧ зонлысь сыв,
Ышловзьӧ том ныв.
А сэн ичӧт зон
Ставлы тӧдӧ дон.

Шуӧ сэн: — Ого,
Но и Ӧль Ёгор!
Мыйкӧ сюркнялӧ,
Машӧс кутлалӧ! — 

Кыв мысьт татшӧмтор
Ваксьӧ том и дзор.
Йӧзлӧн гаж оз быр,
Стан дор сыӧн тыр.

Сёйӧма шыд-рок,
Помасьӧ нин рыт.
Ныв-зон жӧ оз вод, — 
Варгӧны рытбыд.

Шутка, серам, гаж
Асъя вылӧдз пыр
Кылӧ видз и яг,
Ю, код быгйӧн тыр.

Долыд уджавны
Гажа удж вылын,
Дружнӧй йӧз пӧвстын,
Паськыд видз вылын.

Сэн колхознӧй йӧз,
Тан колхознӧй йӧз.
Сэні ытшкӧны,
Тані куртӧны.