АСЫВ


Эжва шыньгӧ — абу гыа,
Берег дорас пу оз дзуртышт.
Асылыслы шонді кыӧ
Зарни югӧръясысь юркытш.

Асыв — тэрыб, шань и мелі,
Гажыс, майбыр, юр выв тырыс:
Югыд лысва пӧвстті келӧ
Лэбачьяскӧд сьылігтырйи.

Со и воис льӧм пу дорӧдз,
Пӧртмасьӧ код еджыд пухӧн.
Тані гӧгӧр ловъя дзоридз,
Асыв ӧвтӧ кампет дукӧн.

Шонді сылы юркытш сетіс,
Льӧм пу козьналіс шӧвк фата.
Асыв — быттьӧ том невеста —
Эжва юӧд водзӧ катас.