ЯНВАР

Ывла вылын нюмъяліс март тӧлысь. Мӧд класса велӧдчысьяс воддза урок вылас велӧдісны тӧлысь нимъяс. И вот талун Василиса Николаевна тӧдмалӧ, коді кыдзи гортас старайтчӧма.

— Ӧні Гриша висьталас миянлы, кутшӧм тӧлысьяс сійӧ тӧдӧ.

Гриша сувтіс, чышкыштіс дӧрӧм соснас нырсӧ, кызӧктіс, гыжйыштіс балябӧжсӧ да видзӧдліс пӧтӧлӧкӧ.

— Но, Гриша, — тэрмӧдлыштіс сійӧс учительница. — Кутшӧм тӧлыссянь заводитчӧ воыс?

Детинка чӧв оліс, но зэв ёна мӧвпаліс, быттьӧ кӧсйис дум вылас уськӧдны тӧлысьлысь нимсӧ.

— Катя, отсышт Гришалы. Висьтав, кутшӧм тӧлысь локтӧ Выль во бӧрын?

— Январ, — збоя вочавидзис нывка.

— Январ! — зэв гораа да ярскӧба шуис Гриша да бара ланьтіс.

— Водзӧ, Гриша, водзӧ, — тэрмӧдлӧ Василиса Николаевна.

Детинка чӧв оліс, мыйкӧ нускис ас кежсьыс да плешсӧ чукралӧмӧн думайтіс.

— Висьтав, Гриша, висьтав, — корис учительница.

— Январ! — бара зэв гораа шуис детинка да кызӧктіс.

Та бӧрын бара вель дыр кежлӧ ланьтіс.

— Январ, — шуис нӧшта недыр мысти.

Велӧдчысьяс гусьӧникӧн видзӧдлывлісны ӧта-мӧд вылас да нюмъялісны.

— Ноко, Зоя, отсав Гришалы, висьтав, кутшӧм тӧлысь мунӧ январ бӧрас?

— Январ бӧрын локтӧ февраль, — вочавидзис нывка.

— А кутшӧм тӧлысь февраль бӧрас, Гриша? Ӧдйӧджык, ӧд ставӧн тэнӧ виччысям! Ӧні кутшӧм тӧлысь?

Гриша чӧв оліс.

— Вайлы ассьыд тетрадьтӧ, — Василиса Николаевна восьтіс детинкалысь тетрадьсӧ да гораа лыддис. — Январ кӧкъямысдасӧд лун.

И ставӧн серӧктісны.