ТУРИПУВ

Витӧд час нин шӧйті вӧрын. Мудзи, тшыг, кӧтаси. Компастӧм, пищальтӧм, няньтӧм. И истӧгӧй абу, кӧтасис, ковмис шыбитны. Мӧдӧдча веськыдвыв — парма, шуйгавыв — бара парма. Воши. Первойысь аслам нэмӧн.

Окота водны пу бокӧ, унмовсьны, шойччыштны. Но сьӧлӧмӧй висьталіс мӧдтор: «Мун, мун, пропадитан». И муні. Надзӧникӧн восьлалі вугралысь вӧрӧд. Думайті гортӧс, казьтылі пӧсь чай. Гудыр небесаӧд шувгисны сьӧд кымӧръяс, матысмӧ рыт.

Кор дзикӧдз быри эбӧсӧй, водзын тыдовтчис тӧдса нюр — тасянь гортӧдз вит километра. Пыр жӧ лои кокньыдджык сьӧлӧм вылын, но кокъясӧй эз кӧсйыны мунны.

И сэки аддзи турипув. Сійӧ вӧлі зэв уна, чим гӧрдӧсь, гырысьӧсь. Первойсӧ сёйи ӧти тусьӧн, сэсся ки тырӧн. А налы и помыс оз тыдав, — гӧгӧр сярвидзӧны, польдчӧмаӧсь, шомаӧсь.

Заводитіс ӧдйӧ пемдыны, а ме некыдз ог вермы эновтны вотӧссӧ. И кыськӧ пыр жӧ соді вынӧй, быри мудзӧм. Гашкӧ тэ, турипув, лечитін менӧ?

Восьлалі гортӧ муртса тӧдчыштана туйӧд, а син водзын сідзи и чеччалісны вотӧсъяс. Мый нӧ ӧні вит километраыд, ме и быдса кызьӧс муна.

Аттьӧ тэныд, турипув!