СЬӦД КАНЬ

Кыла, мамӧй чуксалӧ: чеччы пӧ, сёрман школаад. Но меным дыш вӧлі чеччынысӧ да нёдзласьны куті. Сэсся бергӧдчи мамӧлы мышкӧн да ачым эг тӧдлы, кыдзи бӧр унмовссьӧма. Кор Миша другӧй пырис, вӧлисти садьми.

— Но и унпур, — дивитіс сійӧ.

— Виччысьлы, ме ӧдйӧ, — кори Мишаӧс.

Зэв зіля пасьтаси, чуньясӧс кӧтӧдышті да син дорӧс чышкышті. Весиг пиньӧс эг весав, некор, мися. Йӧв стӧкан юи, босьті велӧдчан сумка, волысалі мышкӧ да кыкнанным котӧрӧн петім керкаысь.

Моски кузя тэрмасьӧмӧн восьлалім школаӧ. Джын туйсӧ мунім нин. Нем виччысьтӧг туй бокас мыччысис сьӧд кань. Ме пыр жӧ шенышті киӧн:

— Брысь! Брысь!

Чайті, косас, а сійӧ видзӧдліс миянлань да бӧжсӧ вылӧ лэптӧмӧн гӧнитіс, вожмаліс туйсӧ.

— Оз удайтчы, — шуис Миша.

— Гашкӧ, удайтчас? Тӧрыт на Марья Ивановнаыд висьталіс, мый важ видзӧдлас ногӧн пӧ оз ков овны.

— Медым, ме эска. Менам пӧчӧй тшӧтш шуӧ, сьӧд кань кӧ туйтӧ вожмалас, оз удайтчы, — кинас шенасис Миша.

Ми сувтім да кутім майшасьны, мый вӧчны. Шуйга пельпом сайӧ куимысь сьӧлыштны либӧ виччысьлыны, гашкӧ, кодкӧ выль локтысь каньыслысь вожмалӧмсӧ орӧдас.

Виччысям, но некод оз мыччась.

— Ордйӧдам? — юалі Мишалысь.

— Кыті ?

Карта сайӧдыс, потшӧс вомӧныс вуджам да, — инді чуньӧн орчча керка вылӧ.

Ми эг кутӧй мӧжгыны. Зіля кавшасим потшӧс вылӧ да карта саяс котӧртім. Куим керка кост мунім. Коймӧд керка дорӧдз воим да ва гуранӧ люкасим. Ордйӧдігас ме вильді да гӧптас шнёпкыси.

— О, косьтысьны лоӧ.

— Мый, бӧр гортад мунан? — юаліс Миша.

— Ог, вылын косьмас, — гачӧс пыркниті да водзӧ потшӧслань котӧрті.

Вуджи потшӧс вомӧныс. Миша неуна бокӧджык кавшасис. Збоитыштны кӧсйис, видзчысьтӧг потшӧссӧ вуджис. Лэччигас гач кокыс пысасис чурвидзысь кос увйӧ да дзажмуніс-косяссис. Миша кутчысис гач кокас:

— Эз весьшӧрӧ сьӧд каньыд туйсӧ вожмав, эз мойви.

— И школаӧ сёрмим, — содті ме.

— Колӧ думыштны, мый висьтавны Марья Ивановналы.

— Сьӧд каньтӧ кӧ висьталан, серавны кутасны.

— А вай висьталам, мый ми пӧжар вылын кусӧдчим, — вӧзйис Миша.

— Оз эскыны, — ме довкниті юрӧн. — Збыль кӧ пӧжарыс лоис, вит минут мысти нин школаад тӧдісны эськӧ. Миян жӧ ичӧтик сиктыс, ӧтар помас кӧ горӧдан, мӧдарас кыласны.

— Сідзкӧ, висьталам, мый ыджыд понйысь понпиӧс мездім, пурӧ вӧлі да.

— И ме повзьӧмла ва гуранӧ пукси, — эльтчигмоз артмис менам.

Ми зіля восьлалім да вензим, мыйӧн ылӧдлыны Марья Ивановнаӧс. Миша вӧзйис висьтавны, мый бандитӧс отсалім тшапнитны. Кузьма чожкӧд ӧтвылысь. Кузьма чожыс сылӧн участкӧвӧй.

Вензигад эг тӧдлӧй, кыдзи школа дорӧдз воим. Сэні миянлы паныдасис Мишалӧн пӧчыс, лавкаысь, вӧлӧмкӧ, локтӧ. Аддзис сылысь косяссьӧм гач кок помсӧ да сувтӧдіс: вай пӧ вурышта, суниса емыс век сьӧрысь. Менӧ школаӧ тшӧктіс пырны: эн пӧ виччысь, и сідз сёрминныд.

Ме матыстчи класс ӧдзӧс дорӧ, калькӧдышті ӧдзӧссӧ. Марья Ивановна выльтор нин висьтавлӧ. Видзӧдліс калькӧдӧм ӧдзӧслань:

— Коді сэні мыччасьӧ?

Ме пыри да сувті ӧдзӧс дорӧ, чолӧмаси.

— Мыйла сёрмин? — юаліс Марья Ивановна.

Эг кӧсйы, да висьтавсис, мый школаӧ локтігӧн Мишакӧд дорйим ыджыд понйысь понпиӧс, пурӧ вӧлі да. Ме весиг усьлі да гачӧй кӧтасис. А Мишалысь ыджыд понйыс гач коксӧ косяліс, да ӧні пӧчыс школа дорын вурӧ косяссьӧминсӧ.

— Бур, молодеч, — ошкыштіс Марья Ивановна. — Дзоляястӧ век колӧ дорйыны. Пуксьы аслад местаӧ да кывзы выль тӧдмӧгсӧ.

Парта сайӧ пуксигӧн казялі, кыдзи челядь завидьпырысь видзӧдісны ме вылӧ. Ыджыд понсьыд пӧ эг повзьы да. А регыд мысти Миша пырис.

— Прӧйдит, Миша, — шуис Марья Ивановна. — Миянлы Вася Петров ставсӧ нин висьталіс.

А Мишалы, тыдалӧ, мутиясыс тойлісны бокас. Тшӧктытӧгыс кутіс сӧрны:

— Ми Васякӧд вӧлі локтам школаӧ. Аддзам — котӧртӧ бандит, а бӧрсяньыс вӧтчӧ участкӧвӧй. Кутӧй пӧ, горзӧ сійӧ. Ми пыр жӧ уськӧдчим сылы паныд. Вася уськӧдчис бандитыслы кок улас, а ме чабырті кабырӧс да ныр-вомас сылы сеті. Но усигас сійӧ кутчысис менам гач кокӧ да косяліс. Сідз и тшапнитім сійӧс.

Бӧръя кывъяссӧ Мишалысь омӧля нин кылісны. Челядь сералісны вак-вакӧн. Кодсюрӧ весиг кынӧмас кутчысьӧма. Марья Ивановна тшӧтш сералӧ:

— Пуксьы, урок бӧрын кыкнанныд кольччанныд да висьталанныд, кӧні гуляйтінныд.

Миша падмуніс да юрсӧ лэдзӧмӧн матыстчис парталань. А ме сылы чуньӧн кӧсича дорӧ петкӧдла, мый, мися, сӧран.

Урок бӧрын Марья Ивановна корис аслас пызан дорӧ да тшӧктіс висьтавны, кыдзи збыль вылас делӧыс вӧлі.

— Он кутӧй серавны? — юалі ме.

— Ог, — шуис сійӧ.

Ми сэсся-й висьталім ассьыным лоӧмторсӧ. Марья Ивановна нюмдіс: эн кӧ пӧ видзӧдӧй сьӧд кань вылад, лючки ас кадӧ воинныд школаӧ. Ӧні пӧ асьныд тӧдмалінныд, мыйӧдз вайӧдӧ важ видзӧдласлы эскӧмыд.

Гортӧ локтігӧн Миша бара на шуасис, кӧть пӧ мый шу, а сьӧд каньлӧн туй вожмалӧм абу бур водзӧ. Он кӧ вермы виччысьлыны либӧ ордйӧдны, колӧ кӧть шуйга пельпом саяд куимысь сьӧлыштны.

А ме эськӧ кӧсъя Марья Ивановнаыслы эскыны, но ог на тӧд, мый мӧда вӧчны, бара кӧ сьӧд каньыскӧд паныдася.