ОШ

Кайисны куимӧн ош кыйны. Вӧр керкаӧ воисны, нурйыштчисны. Педӧр Вась водіс узьны, а Синпӧв Митрей да Ёгор Иван пукалісны на пызан сайын. Вой шӧр бӧрын чеччыштіс калич, ӧдзӧс воссис, пырис поп. Кытысь босьтчис вӧр шӧрын тӧвнас? Морыс тӧдӧ. Митрея-Иваналӧн юрси сувтіс. А поп на вылӧ весиг эз видзӧдлы, матыстчис Педӧр Вась дорӧ, тшынӧдіс, сьылӧдіс кулӧм мортӧс моз: «Упокой, Господи, душу раба твоего...» Пернапасаліс куимысь да воши. Митрея-Ивана уськӧдчисны ывлаӧ, но сэні туйпом абу, ни шы оз кыв. Видзӧдлісны ӧта-мӧд вылас: «Сё мокасьт, эз жӧ ӧд кыкнанныслы ӧтитор каститчы?» Вӧрӧ петігад эз юны ни.

Асывнас садьмис Педӧр Вась, а сылы висьталӧны: поп пӧ тэнӧ сьылӧдіс войнас. Сералӧ мужикыд. «Эн мун миянкӧд, мыйкӧ лёк лоӧ». — «Мунӧй, гачтӧм челядьӧс тадз пӧнӧй. Ме ӧд резюв сам вылад ог сетчы, нитшсялӧм сир нин». Но мый, он ӧд кӧртав. Мый лоны — лоӧ.

Кокниа и шедіс ошкыд. Гусьыс вӧрзьӧдісны, лыйисны. Кульны лӧсьӧдчӧны. Педӧр Вась матыстчис ош дорад, прикладнас жер вомас тувкис да шпыньмуніс. И колӧ жӧ тадзи лоны! Ошкыд кыпӧдчывліс, лапанас дӧвкнитіс Васьлы да бӧр уси. Васьлӧн юрыс разі-пельӧ. А ошкыд кулӧма.

Сэсся и шу мыйкӧ.