КОЗИН

Тӧрыт рытнас Ваня дорӧ карысь бӧр-водз воліс батьыс. Вайӧма ичӧтик пистолет, лыйсигас шковгӧ и ствол помас би ӧзйылӧ. Ваня пырысь-пыр ошйысис Лёшӧлы. Лёшӧ босьтіс пистолетсӧ, видліс лыйсьыны, видзӧдліс пытшсьыс лампочкасӧ, коді ӧзйылӧ лыйигас, да шуис:

— Ме пӧчлы тшӧкта жӧ ньӧбны, сэсся позяс войнаысь ворсны.

— Кор нӧ ньӧбас?

— Ог тӧд.

— Талун жӧ и кор, медым ньӧбас.

— Тэныд кокни шуны, батьыд ставсӧ ньӧбалӧ да. Менам пӧчлысь он ёна босьт. Пыр жӧ шуас, сьӧм таргайтӧм пӧ сӧмын.

— А ме думышті, кыдз вӧчны. Колӧ пӧчыдлы первойӧн мыйкӧ козьнавны. Меным мыйкӧ кӧ колӧ, век батьӧлы первойӧн пӧдарок рисуйта, сета да сэки нин корны кута, — радпырысь велӧдіс Ваня.

— Кыдз ме тайӧс ачым эг гӧгӧрво? — юрсӧ гыжйыштіс Лёшӧ. — Ӧні жӧ пыра гортӧ да рисуйта.

Лёшӧ эз кут нюжмасьны. Сылы телепит лои пистолетсӧ ньӧбны. Медым Ванялӧн кодь вӧлі, шковгис да биыс ӧзйыліс. Котӧрӧн кайис кильчӧ вылӧ. Пырис гортас, лолыс тырӧма. Пӧчыс юаліс, ошкӧд пӧ паныдасьлін али мый? Лёшӧ сӧмын юрнас довкнитіс: эг пӧ. Камод вылысь босьтіс бумага лист. Корсис карандашсӧ, но сюрис сӧмын шарикӧвӧй ручка. Лёшӧ пуксис пызан сайӧ да заводитіс рисуйтчыны. Пӧчыс весиг шензьыштіс: мый пӧ талун лоӧма Лёшӧыскӧд.

Лёшӧ рисуйтіс. Эз артмы, косьыштіс бумагасӧ, чукраліс да пач водзӧ шыбитіс. Сэсся бара рисуйтіс. Бара косяліс. Та бӧрын коли зэв ичӧтик бумага тор, муртса ки пыдӧссьыс ыджыдджык. Сэтчӧ, Лёшӧ чайтӧм серти, артмис серпасыс. Серпас гӧгӧрыс рочӧн гижис: «Тебе бабушка подароч-ек не большой. Я льюбль тебя очень сильно. Или ты штото мне купиш я тебя очень льубльу».

Лёшӧ нӧшта видзӧдліс пӧчыслы рисуйтӧм козинсӧ. Гыжйыштіс балябӧжсӧ. Сылӧн чайтӧм серти, коліс на мыйкӧ содтыны. Банладорас нинӧм нин эз тӧр да, бергӧдіс бумага торсӧ да рисуйтіс мышкас пистолет. Уліас, медым пӧчыс тырвыйӧ гӧгӧрвоас, гижис: пистолет. Сэсся мыччис пӧчыслы:

— Баб, тайӧ тэныд месянь пӧдарок.

— Пӧдарок? — чуймис пӧчыс. — Мый ради нӧ?

— Прӧстӧ сідз. Ӧні тэ меным мыйкӧ пӧдарит.

— Ме? — бара чуймӧмӧн юаліс пӧчыс, гижӧдсӧ да рисуйтӧмсӧ видзӧдалігмоз. — Да, тӧдчӧ, бура велӧдчӧмыд школаад, грамотей. Тайӧ нӧ мый, жабаӧс али менӧ рисуйтін?

Лёшӧ гӧрдӧдіс, юрсӧ копыртіс, синъяссӧ дзебигмоз нурбыльтіс:

— Мышкас эм на.

Пӧчыс сэтысь гораа лыддис:

— Пистолет.

— Но да, пистолет меным колӧ, — лэптіс юрсӧ Лёшӧ да коран синъясӧн видзӧдліс пӧчыс вылӧ. — Ванялы батьыс тӧрыт вайӧма. Сэтшӧм лӧсьыд!

— Тэ ӧд абу нин ичӧт, коймӧд класс помалін. Да-й дырӧ кежлӧ ньӧбан? Оз дыр ов, пыр и жугӧдан.

— Ог жугӧд, ме бура кута видзны. Сӧмын Ванякӧд войнаысь ворсыштам.

— Пуысь вӧч, ми тай сідз ворслім да пӧрысьӧдз воим. Лавкаысь ньӧбны татшӧмтортӧ — сӧмын сьӧм таргайтны, — кывкӧрталіс пӧчыс.

Тайӧс кылӧм бӧрын Лёшӧ чушкыльтчис. Ас кежсьыс думыштіс, мый весьшӧрӧ рисуйтчис, эз имит. Ваняыслӧн, гашкӧ, батьыс и ньӧбалӧ. Сӧмын менам бабӧй абу сылӧн батьыс кодь. Сійӧс абу кокни ылӧдлыны.

Лёшӧ жугыльтчӧмӧн и петіс ывлаӧ, пырис сарайӧ. Джаджйын куйлісны ыджыд батьыслӧн инструментъясыс: ножовка, струж, мӧлӧт. Весиг ас вӧчӧм пу воропа пурт. Ыджыд батьыслӧн кулӧмсянь вӧчасян кӧлуйсӧ некод на абу босьтлӧма.

Лёшӧ видліс чуньнас пуртлысь да стружлысь дорышсӧ. Тӧкӧтьӧ чуньсӧ эз вунды. Босьтіс сарай бокын куйлысь пӧв пом да заводитіс стружитны. Лёшӧ татшӧм уджтӧ вӧчны оз на бура куж да ёна лои мырсьыны. Стружитчигас и локтіс Ваняыс.

— Мый вӧчан? — сарайӧ пыригмоз юаліс сійӧ.

— Он аддзы? Стружитча, пистолет кута вӧчны.

— Сідзкӧ, пӧчыд оз ньӧб?

— Оз. Лавкаысь ньӧбны — сӧмын сьӧм таргайтны, — пӧчыслысь кывъяссӧ висьталіс Лёшӧ да чышкыштіс ньылӧмсӧ плешсьыс.

Зонка здук кежлӧ пуктыліс стружсӧ, лӧсьӧдыштіс пӧвсӧ да тшӧктіс Ванялы кутыштны, медым оз вӧр стружитігас. Ваня шашаритчис пӧвъяс, но ёнасӧ кутны эз вермы. Пӧвйыс вӧрис, нӧрӧвитіс усьны сарай джоджӧ. Тадзи бура дыр ноксисны. Кыдзкӧ-мыйкӧ сэсся пӧвйыс едждыштіс жӧ. Лёшӧ кинас малыштіс да шуис:

— Оз желлясь, пырала гортӧ да ручкасӧ вая, медым рисуйтны. Лёшӧ пыркнитіс ас вывсьыс ӧшйӧм стружки чагсӧ да котӧртіс гортас. Сэсся кык друг заводитісны рисуйтны. Видліс рисуйтны Лёшӧ, но эз артмы. Ванялӧн тшӧтш эз кажитчы. Медбӧрын Лёшӧ небыдика шлапнитіс юрас:

— Вот, бӧбыд. Ваня, котӧртлы пистолетыдла, сы серти вӧчам. Кыдз ме водзджык эг казяв тайӧс?

Ваня вайис пистолетсӧ. Локтігмозыс лыйсис, вежсӧ Лёшӧлысь петкӧдліс. Лёшӧ босьтіс сылысь пистолетсӧ да пӧв вылӧ пуктытӧдз тшӧтш лыйсьыштіс. Сэсся пистолет сертиыс визьйӧдлісны мыгӧрсӧ.

Пилитісны да пуртӧн вӧлалісны. Артмис пистолет кодь жӧ, сӧмын оз лыйсьы да биыс оз ӧзйыв.

— Вомнад лоӧ шуавны лыйигад, — индіс вӧчӧмтор вылӧ Ваня.

— Зато оз жугав, — ышӧдіс асьсӧ Лёшӧ да чургӧдіс пистолетсӧ Ванялы морӧсас: — Дізь, дізь.

Зонкаяс петісны сарайысь. Кӧсйисны нин пышйыны улич вылӧ, кыддза рас дорӧ, но кылісны пӧчыслысь горӧдӧмсӧ:

— Кодлы нӧ ёгсӧ колинныд, нолтӧ, ӧдйӧ идралӧй!

Лёшӧлы лои косны на чышкысьны. Ваняыс отсыштіс жӧ. Чукӧртӧм ёгсӧ ӧтлаын нуисны пывсян пачӧ.

Кыддза рас дорын зонкаяс сёрнитчисны, коді лоӧ партизанӧн, коді — фашистӧн. Лёшӧ шуӧ:

— Ме лоа партизанӧн, кино вылысь аддзылі, налӧн первойсӧ абу жӧ пистолетъясыс вӧлӧмаӧсь. Тэнад лавкаысь ньӧбӧм, сідзкӧ, фашиставны ковмас.

— Тадз абу честнӧ! — мӧдіс вензьыны Ваня. — Кодлы окота фашистӧн лоны? Вай ӧчередьӧн, либӧ ме ог ворс.

— Сідзкӧ, ворсам ӧчередьӧн, — ладмӧдчис Лёшӧ.

Зонкаяс ворсісны, дзебсясисны да ӧта-мӧдсӧ лыйлісны пистолетъяссьыс. Пӧсявтӧдз лои, гӧрдӧдӧмаӧсь кыкнанныс котралӧмысла. Сэсся Лёшӧ друг ланьтіс. Сылы кыддза раслӧн лунладорас, видз бокас, нем виччысьтӧг паныдасис оз чукӧр. Озъясыс гӧрдӧдӧмаӧсь да пыр жӧ уськӧдчисны син улӧ. Лёшӧ сюйис ӧтиӧс вомас.

— Ваня, лок татчӧ! — чукӧстіс Лёшӧ другсӧ.

Ваня котӧрӧн локтіс да пыр жӧ самасис озъяинад. Чӧскыдтӧ сійӧ тӧдӧ жӧ.

— Мыйта озйыс, некод на абу веськавлӧма татчӧ! Ме бабушкалы вотышта жӧ, — шуис Лёшӧ да пистолетсӧ сюйис гач вӧнь костас, мед оз мешайтчы.

— Мыйла? — чуймис Ваня. — Сійӧ жӧ тэныд эз ньӧб пистолетсӧ.

— А сійӧ менам бабушка!

Лёшӧ мӧд ног эз куж подулавны ассьыс кӧсйӧмсӧ. Сы ногӧн тырмӧ и сійӧ, мый пӧчыс сӧмын бабушка. А Ваняыс вотчис да ставсӧ ачыс сёйис, миян пӧ Марпа пӧчлӧн и сідз быдсяма чӧскыдыс эм, тӧрыт на батьыс вайис.

Лёшӧ гортас воис да пӧчыслы мыччис соддзас чукӧртӧм озсӧ. Мукӧдыс эськӧ вайигас лямыштӧмаӧсь, но пӧчыслы озйыс зэв чӧскыдӧн кажитчис. Татшӧм чӧскыдсӧ пӧ эг на сёйлы, аттьӧалігас шуис сійӧ.