ЕНКОЛАЯС ЙЫЛЫСЬ ПОЭМА
Кор ичӧт на вӧлі да гӧгӧрволі на тӧвлысь сьылӧмсӧ, ёльяслысь варгӧмсӧ, пуяслысь шӧпкӧдчӧмсӧ, кывлі ме изъяслысь сёрни. Гусьӧн сёрнитӧны найӧ, лӧня колӧ кывзыны, но уна висьтавны вермасны ройсялӧм изъяс. Гашкӧ, и вуніс нин мыйсюрӧ, гашкӧ и, ылӧдышта кӧнкӧ, но ог нин вермы выльысь юасьны пӧрысь изъяслысь, оз нин висьтавны меным ӧтчыд висьтавлӧмсӧ. Да и пельтӧммӧ мортыд быдмӧм мысьт. Тӧвлӧн да ёльяслӧн, пуяслӧн да изъяслӧн сьылӧм-мургӧмыс, сёрни-басниыс оз нин сетчыны арлыдалы. Ковмас меным эскыны, менсьым гӧна кывъя висьталӧмӧс кывзыны, гашкӧ, и верма мыйсюрӧ казьтыштны, мыйсюрӧ висьтыштны. Кыткӧ чинтышта, кыткӧ содтышта, но мый вӧлӧма — вӧлӧма, мый шуӧма — шуӧма, мый кольӧма — волас на, сӧмын петкӧдчас мӧд ногӧн, оз нин сэтшӧмӧн, мед ӧтитор дорас эг велавны удитӧй.
Сьӧкыд овны, нинӧм кӧ оз вежлась. А ми век тэрмасям кытчӧкӧ, вежсьӧмсӧ ог казялӧй. Быттьӧ оз и вежсьы нинӧм, сӧмын асьным пӧрысьмам. Но изъяс оз тэрмасьны. Зітшвидзӧны ӧти местаын да ставсӧ казялӧны. Со турун сі шонділань бергӧдчис. Турун сі вылӧ геб пуксис. Бордъясас дзоляник ӧшкамӧшкаяс ворсӧны. Кодзув синсӧ куньліс. Му ышловзис. Морт ю весьтӧ копыртчис, содзнас ловъя васӧ гумовтіс. Чӧскыд ваыс. Джуджыд. Вынъяс содтӧ. Олӧмнас шензьыны чуксалӧ. Кад и миянлы ловъя васӧ, вежа васӧ сӧстӧм соддзӧн гумовтлыны.
Аттӧ мича жӧ ныв Велянь. Зарни юрсиас шонді ворсӧдчӧ. Пӧлӧзнича синъясас енэж видзӧдчӧ. Морӧсъяс — зумыд вый тупыльяс. Коскыс — ва дор бадь кодь нюдз. Кокъяс вылас видзӧдлан — вирыд пузьӧ, сьӧлӧмыд вомӧдыд чеччыштӧ. Ветлӧ Велянь, быттьӧ чӧж кывтӧ. Луд вывті кӧ мунӧ — турун сі оз вӧрзьы, кӧдж вывті кӧ мунӧ — лыа чир оз вешйы. Купайтчыны пырас — визулыс лӧньӧ, бадьяс кышакывны дугдӧны. Шӧвк туг кодь, шобді нянь кодь, кодар боксянь он видзӧдлы, некытчӧ пысасьны он вермы. Уна мича ныв эськӧ эм, вель уналӧн яй пырыс лыыс, лы пырыс вемыс тыдалӧ, да Велянькӧд орччӧн ставныс — тамыш да чукля. Яй бердас няйт оз сибды, да и лолыс вӧрса ключ кодь. Оз ӧти зонлӧн сы понда сьӧлӧмыс косьмы, оз ӧти зон вӧрӧ мунігӧн сёян нопсӧ гортас вунӧд. Но абу на кадыс воӧма. Мед на озйыс кисьмыштас, мед на дзоридзыс гӧрддзасяс. Батьыс шуӧ: дас тӧб пӧ на эг печкӧдлӧй, дӧра пом на эг кыӧдлӧй. Мамыс шуӧ: эз на пӧ ныв вӧлясӧ морӧс тырнас лолыштлы, эз на асъя кыасӧ пыдӧсӧдзыс юлы.
Велянь мичлун йылысь юӧрыс Изьва кузя мунӧ Вой Саридзӧдз, Эжва кузя Еджыд Саридзӧдз. Юӧр воис и Кыска пельӧдз, йиджис Кыска мускӧдз. Кыскалӧн пельпомсянь пельпомӧдз сывйӧн-джынйӧн. Кыскалӧн морӧсыс пелькиник пывсян кодь. Дуригӧн том йӧз морӧсас зорйыштасны — вежон брунгӧмсӧ йӧла новлӧдлӧ. Ошлы кӧ зутшкас кукань юр кодь кабырнас, ош ку пиысь лысьӧмыс гиль-голь киссяс. Но эз выннас босьт Кыска да эз мичлуннас, кӧть жебӧн ни мисьтӧмӧн кыв некодлӧн оз бергӧдчы шуны, а босьтіс Кыска бур вежӧр-мывкыднас. Звер-пӧткаыд стенас кайӧ, пыж-нортъяс чача кодьӧсь, керкаыс ӧшиньяснас ворсӧдчӧ. Уна на тӧдіс да кужис Кыска. Вӧралысьӧс ош тапкӧдас — бурдӧдны Кыскаӧс корӧны. Месаньлӧн мӧс вошӧма — Кыска дорӧ локтӧны. Шыбитас Кыска шегъяс, видзӧдлас ваӧ да и висьталас, кытысь серӧд-сюруксӧ корсьны. Варыш моз лэбавны кужис, сир моз уявны, ошкӧн шлапъявны. Тун орд вӧлі, эз сирӧд мыр миян кодь. Но тӧдмаліс Кыска Велянь йылысь, и киыс ӧшйис-лётмуніс. Эндіс керка гӧгӧрыс, зэр ваӧн тырис пыжыс, чӧс туйыс нитшсяліс. Ветлӧдлӧ Кыска керка гӧгӧрыс, оз тӧд, лэбачӧн-ӧ лэбзьыны, чериӧн-ӧ уйны Велянь дорӧ. Да оз позь тунлы юрсӧ воштыны. Тунъясыд нывъяслысь юрсӧ бергӧдлӧмаӧсь тшыналӧмӧн да чорыд кылӧн. Но оз вермы сідзсӧ Кыска, мырдӧн да ылӧдлӧмӧн. Кыпӧдчывлас енэжӧ варышӧн, уськӧдчас юӧ сирӧн, петас берегӧ ошкӧн да пуяс пӧрлӧдлӧ. Оз вермы муслунсӧ Кыска талявны, оз вермы вӧтлыны. Босьтӧ киас сигудӧк да нор сьыланкыв сьылӧ. Чуймалӧны йӧз, чуймалӧ парма, чуймалӧ и Печера-инь: абу-ӧ йӧймӧма том молодечыс, абу-ӧ пӧрысь пӧльясыслӧн тӧдӧмыс юр вежӧрсӧ гудыртӧма?
Эжва кузя Степан катӧ. Емдінсянь Эжва йылӧ выль енмӧс катӧдӧ. Степанлӧн паськӧмыс рытъя шонді кодь гӧрд, Степанлӧн тошкыс лым кодь еджыд. Киас Степанлӧн зарни перна шондісӧ нерӧ. Степанлӧн йӧзыс уна, Степанлӧн пыжыс ыджыд, Степанлӧн кывйыс лытӧм: кырссьӧ-висьталӧ ассьыс, бур йӧзлысь ловъяссӧ дзугйӧн дзугӧ, тывйӧн тывъялӧ. Енмыс сылӧн асныра, енмыс сылӧн чорыд сьӧлӧма: коді сылы оз эскы, ад гуранӧ веськалӧ. А Степанлӧн йӧзыс Сус Кристослы отсалӧ шыӧн да биӧн, ньӧвйӧн да пернаӧн, вежа ваӧн да шыпуртӧн. Оз ков Кыдзлы юрбитны пӧ, колӧ Суслы. Коді Кыдзлы юрбитӧ — мутияслы лов сетӧ. Тадз и катӧ Степан, тадз и кыпӧдчӧ: кыті нюлыштӧмӧн, кыті курччыштӧмӧн. Майбыр, кывйыс небыд! Майбыр, пиньыс лэчыд! Кыкнансӧ кеслӧма.
Степан Эжва кузя катӧ. Кӧдж вылын ныв пукалӧ. Ныв пукалӧ, сьыланкыв сьылӧ. Оз, оз сьыланкыв сьыв, колипкай моз дзользьӧ. Колипкай моз дзользьӧ, сӧстӧм ёль моз сёльгӧ. Сӧстӧм ёль моз сёльгӧ, шондіа зэр моз сяргӧ. Степан нылӧс аддзис, кыв-ворсӧ воштіс. Пелысасьысьяс садьтӧг усисны. Ныралысьлӧн вом каличыс чеччыштіс. Бӧжалысьлӧн пелысыс кылаліс. Пыжныс ю шӧрӧ сувтіс. Паляліс Степан, куим пернапас чӧвтіс: «Кымын муӧд-ваӧд ветлі, татшӧм мичсӧ эг аддзывлы. Гашкӧ, тайӧ и эм Богородичаыс да, ен чужтысьыс?» Нылыд сылы вочавидзӧ: «Абу ен чужтысь ме, весиг мортӧс на эг чужтывлы, нэмыс Веляньӧн менӧ шулісны, а вомтӧ кӧ дырджык паськӧдланныд, пыжтӧ Эжва вомӧдзыс кылӧдас, важ йӧз дорӧ, мӧд муӧ нуас». Степанлӧн паськӧмыс руч ку рӧма, наяныс ассьыс водз чужлӧма: «Тайӧс кӧ Сус вераӧ пырта, йӧзыс бӧрсяньыс ойдӧм ю моз ылькнитас, Сус Кристос борд улӧ пырас». Кывсӧ Степан маӧн небзьӧдіс, вом каличсӧ вичко винаӧн. Сёрни-басни восьтіс, Сус Кристос йылысь висьталӧ, сылӧн йӧзӧс жалитӧм йылысь, сылӧн велӧдӧм йылысь да ыджыд шог пыкӧм йылысь.
Варов локтӧм морт, кывнас быттьӧ вый бордйӧн кӧвдум нывлысь сьӧлӧмсӧ мавтӧ, кӧбрегысь кывъяссӧ сывдыны оз ков. Кывзіс-кывзіс Велянь да и кывйӧ шедіс. Том нывлӧн ӧд юрсиыс кузь, а мывкыдыс дженьыд кок йылысь ветлӧ. Кад колис, Велянь ачыс нин йӧзӧс велӧдӧ, куима ен йылысь висьталӧ, кутшӧм сійӧ бур да небыд сьӧлӧма, кутшӧм шемӧсъяс вӧчлӧма, кыдз йӧзӧс пежсьыс мездӧма. Локтӧ сійӧс кывзыны йӧзыс, чуймалӧ.
Кывсис Кыскалы, торксьӧма пӧ Веляньыс, ай-мамыслысь енъяссӧ вунӧдӧма, выль енмӧн ышмӧма, олан туй вылысь кежӧма мӧдар югыдӧ нуӧдысь туй вылӧ. Шыбитіс Кыска сигудӧксӧ, путкыльтіс пыжысь васӧ. Сӧліс Кыска пыжас: эз куим тӧлысьӧн, эз куим вежонӧн, эз куим лунӧн, а куим часӧн Печерасянь Эжва вылӧ воис. Мукӧд, эськӧ, чӧрвӧньсӧ кӧртавны эз удит, а Кыска Велянь водзын нин сулалӧ, курыд кывъясӧн шыбласьӧ: «Радейта, эськӧ, тэнӧ, Велянь, олӧмысь ёнджыка, но эз радейтчӧмыс туйӧ петкӧд. Кӧсйи, эськӧ, тэ вылӧ кӧть син чӧвтлыны, да эз кӧсйӧмыс пыжӧ пуксьӧд. Жӧник кӧ ме тэнад вӧлі, шог эг тӧд, слуга кӧ тэнад вӧлі, эг майшась. Но кывлі, мый сира сапӧгӧн крапъялысь юр вежӧртӧ бергӧдӧма. Талялӧмыд тэ рӧдвуж, ай-мамыдлысь гуяссӧ, кисьтӧмыд тэ налысь горсӧ, а ӧні йӧз горйӧ изъяс ваялан, йӧз пач под вартан». Вочакыв сетӧ нылыд Кыскалы, зарни юрсисӧ вевттьӧ сьӧд отӧн: «Менам керкаӧй — джуджыд енкола. Господь-мезӧсӧй — менам ӧти бать. Богородича — менам ӧти мам. Абу Велянь ме, а раба божия Улияна. Эз вежӧрӧс гудырт Степан-батюшко, ассьыс югӧрсӧ меным вичмӧдіс».
Шуӧ жугыля Кыска нылыдлы: «Степан Крапыдлӧн сапӧгыс дзуртӧ, Степан Крапыдлӧн паськӧм йӧйлӧн кодь. Степан Крапыдлӧн перна дзирдалӧ, рака-катшалысь синсӧ ёралӧ. Мыйкӧ вежӧр кӧ колис, ныланӧй, он кӧ кӧсйы тэ ловтӧ тшыкӧдны, мунам вывланьӧ, катам Степанысь, сьӧла-колиплы сыкӧд не сьывны».
«Степан йылысь тэ лёка сёрнитан, сӧмын ас вылад тай он видзӧдлы: нимыд шышлӧн кодь, киыд сьӧд гӧна, вылад шабур шой, ачыд роталь кодь. Мыйӧн кӧсъян тэ менӧ пӧръявны? Кыдзи кӧсъян тэ менӧ видзнысӧ?»
«Киӧй гӧна кӧ, сідзкӧ, шуда морт. Паськӧм киссьӧма абу гӧль понда. Вӧрса звер-пӧтка ставыс ме киын, менам лэчьясын, менам чӧсъясын. Ошкӧд бертласян менам паськӧмӧй, йӧра суӧдан менам чаркиӧй, чери тывъялан менам дӧрӧмӧй».
Улияна, раба божия, оз кӧсйы Веляньӧн лоны. Но оз позь нылӧс татчӧ кольны Суслӧн сам пыдди, вильыд туй вылӧ. Унаӧс мичлуннас выль ен дорӧ кыскас, унаӧн ловъя енъяссӧ пӧвйӧ гижӧм вылӧ вежасны, вичко винаӧн тагъя сур вунӧдасны, сись кодь вӧр-пусӧ енкола вылӧ изведитасны. Чӧвтіс Кыска синсӧ енкола вылӧ, ӧзйис енкола, трачкӧ-ыпъялӧ, тӧдтӧм енъяслӧн горзӧм-ойзӧмыс Эжва ю кузя разалӧ. Тшапкис Кыска нылӧс коскӧдыс, пуксьӧдіс пыжас да ӧзынысь йӧткыштчис. Ю шӧрӧ петісны. Улияна Сус Кристослы горзӧ-юрбитӧ: «Мезды, енмӧ да мезӧсӧ, лёк тунысь, сылӧн кыса киясысь! Гӧна киясас Антус гыжъяс, сук юрси пиысь сюръяс мыччасьӧны!» Оз лок отсӧг вылӧ енмыс, оз отсав раба божия Улияналы. Уна му вылас лёкыс вӧчсьӧ, быдлаӧ он удит. А, гашкӧ, и оз кӧсйы ылӧдчысь нывлы отсавны: кутшӧм нӧ Кыскаыс Антус? Киас гыжйыс тшӧтшыд, юрас сюръяс оз тыдавны. Гашкӧ и, грека аслас ен водзын, да абу Сус Кристослӧн казак. Отсӧг Улияналы абу, отсӧг абу ни мездысь оз лок. Микул-угодник выль угоддьӧяс видзӧдалӧ, выль туй вылӧ сиасьӧ, Петыр Павел апостол йӧрш вугралӧ, Егорей гож водзысь дзодзув кыялӧ, Габрилӧ да Микайлӧ чипсан-пӧлянӧн тутсӧны: коді гораджыка тутӧстас, сылы румка вина. Оз тӧд тайӧс раба божия Улияна, эскӧ выль енлы, лӧг сылӧн петӧ грека важ енъяс вылӧ. Полӧ Улияна грекӧ вӧйӧмысь.
Зібъясьӧ Кыска, Эжва паныд катӧ. Пыжыс сир моз чилгысьӧ, нёль весьт сода гыяс поткӧдӧ, ӧтар-мӧдарӧ швачкӧ-шыбитӧ, быттьӧ ыджыд гӧр небыд му муркӧдӧ. Сьылӧ Кыска, долыд сылы: мыш саяс енкола сотчӧ, пыжас дона тулан пукалӧ. Ок, эськӧ, водзӧ кӧ видзӧдлыны вермин, олан туй вылад синтӧ чӧвтлыны. Да туныд тай йӧз олӧмсӧ тӧдӧ, ассьыс оз артышт. Гудыртчис эськӧ Кыскалӧн сьӧлӧмыс, эз сьывсьы сэки. Он ӧд виччысьны вермы, шогыд суас да, ваӧн он посйысь ни биӧн он вӧтлы. Чими моз пескыльтчис Улияна, мезӧссӧ казьтыштіс да гы пиӧ вошис. Ок-ок-ок, ныланӧй, Сус Кристосӧс казьтывлан, а важ ен дорӧ жӧ мунін, ва пыдӧсӧ да ва югыдӧ, васа Кулльӧс мичлуннад гажӧдны, войся кывтысьӧс шемӧс уськӧдны, тӧлысь югӧрлы сьывны-норасьны.
Кыдзи гортас воис Кыска, оз тӧд. Тӧлыс-ӧ нӧбӧдіс, Эжваыс-ӧ визувсӧ мӧдарӧ бергӧдліс, пыжсӧ Печера йывлань вӧр пырыс йӧткис. Воис Кыска гортас, а олӧмыс Велянькӧд ва пыдӧсӧ вӧйи. Петас Кыска пес поткӧдлыны, черыс кисьыс усьӧ. Пуксяс азя шыд панявны, паньнас бекарас оз веськав. Куш вуджӧрыс коли. Кӧн и воддза молодечыс? Кӧн и паськыд пельпомыс да пывсян пасьта морӧсыс? Кӧн и ӧзъян синмыс да зумыд воськолыс?
Степан кывлӧма Улияна йылысь, шогсьӧ жӧ: этатшӧм ыжӧс аслам ыж чукарысь вошті. Тшӧктіс Степан раба божия Улияна ним кузя вичко лэптыны, вичко гӧгӧр ен кар, мед сэн манакъяс олісны, Улияналысь мыжъяссӧ вештісны, Улияналысь эскыны велӧдчисны. Ачыс Степан ыджыд вынӧн, ыджыд пыжӧн катіс Эжва паныд, вуджис Печера вылӧ, мед злӧдей-тунӧс бырӧдны, пежгагӧс моз лямӧдны, Ыджыд Кыдз моз пӧрӧдны ен нимӧн, ен отсӧгӧн. Мед нималіс му вылын ӧти ним, Сус Кристослӧн, мед мукӧдыс сылы юрбитісны, сылы копрасисны.
Кывтӧ Печера кузя Степан, бурсьылӧмъяс сьылӧ, ассьыс ловсӧ зэвтӧ. Матын нин Кыскалӧн керкаыс, матын нин вӧрӧг. Аддзӧ Степан — юсӧ чептӧн тасалӧма. Вартіс крестнас чептӧ, орис чептыс, ваӧ вӧйис, сімӧма-рыжмӧма ваын олӧмысь.
Кыскалӧн пызан вылысь кык пурт уси, крестасисны пуртъяс. Кыска лэптіс да ышловзис: «Веляньлысь ловсӧ мырддис, ӧні менсьым кӧсйӧ босьтны». Кӧшӧн ва гумовтіс, видзӧдліс: Степан чукар чеп вуджӧма, керка дорӧ матыстчӧ. Пӧим пачысь курыштіс, кӧшӧ чӧвтіс, гудрыштіс да нимкыв лыддис.
«Вой саридзын изъя ді, изъя ді вылын изъя чуг, изъя чуг вылын еджыд из, еджыд из улын пуан ва, изъя чуг улын жуним ва, пуан ва-ловва, сувтлы, жуним ва-кулан ва, ылькнит, ёстӧ-кебӧстӧ лэдзлы, люӧсьӧв-чимитӧ вӧтлы, ӧдзӧстӧ тасавны, йӧртӧ потшны, кӧртӧн и ыргӧнӧн, эзысьӧн и емдонӧн дор».
Степан кывтӧ, бурсьыланъяс сьылӧ. Пыж джӧмдіс, йӧз пыж пыдӧсӧ гатш уси, пелысъяс сибдісны. Аддзӧ Степан: ю пасьтала чери катӧ, ӧти мӧдысь ыджыд, ӧти мӧдысь гӧгрӧс, оз лэдзны Степанӧс. Степан пернасӧ ваӧ сюйис. Морт виян перна пежӧссьӧма, вирӧн йиджтысьӧма. Оз вермы сӧстӧм чери пеж ваын овны. Гатшасисны черияс, кылалісны саридзӧ. Эз эськӧ Степан быдты черисӧ, эз сійӧ пӧксӧ лэдзлы, да виысьыс тай сійӧ лои, эз тшыг понда, а асьсӧ нимӧдӧм ради.
Аддзӧ Кыска, нинӧм Степанӧс оз сувтӧд. Ок, эськӧ, воддза вын кӧ, да кытчӧ сійӧ мунӧма, кытчӧ вошӧма? Мыжыс личкӧ. Морт лов босьтӧм вынсӧ сёйӧма. Пыкис ӧдзӧссӧ Кыска, мед кӧть керка пытшкӧссӧ оз пежавны, босьтіс киас лэчыд черсӧ, енъяс кӧ да вӧр-ва бергӧдчӧмаӧсь, сӧмын кияс вылӧ лачаыд. Босьтӧй, ёрӧмъяс, ещӧ ӧти лов, этша на кӧ тіянлы.
Лэччис Степан пыжысь. Гӧрд паськӧм би моз ӧзйӧ, юрси-тош дзугсьӧма, бурсьылӧмъяс вунӧмаӧсь, сӧмын водзӧс кӧсйӧм кольӧма. Пуӧ лёкыс морӧсас, тірӧдӧ кияссӧ, ӧзтӧ синъяссӧ: «Сотӧй, антикристӧс, биын выныс помасяс!» Уськӧдчисны биасьны: оз босьт би, оз кывзысь выль енлысь, Сус Кристослысь. Йӧз лов вылын, эськӧ, и юра, да вӧр-ва выныд сылы оз сетчы. Серавтӧм улысь серамыс петіс Кыскалӧн. Дрӧгнитіс Степан чукӧр, чиніс сылӧн эскӧмыс. Ӧтнас Степан оз лэччысь, руч рӧдысь сійӧ, абу ош рӧдысь, наяныс дас во водзджык чужлӧма. Казяліс Степан керка бокысь пывсян, казьтыштіс Кыскалысь енъяссӧ, вунӧдліс ассьыс енсӧ. «Вайӧй, вокъяс, Кыскалысь пывсян корӧсьсӧ, ас зелльӧнас змейсӧ пӧдтам!» Вайисны корӧсь, ӧзтісны. Ыпмуніс керка турун зорӧд моз, ыргӧ кос ниа. «Со тэныд, антикрист, енкола сотӧм! Со тэныд ен нывъяслысь лов босьтӧм!» «Ак! — шуӧ Кыска,— верминныд менӧ. Эн ас енлы юрбитӧмӧн, а менам енъяс киӧн. Ёнджыкӧсь менам енъяс». Шыбитчис тун ӧшиньӧ, виччысьӧ сійӧс пыжыс, гыяс вылын гычӧдчӧ, но ылын юыс. Кытшалісны тунӧс, кимльӧс кивыв кералӧны. Пуркнитіс лӧз тшынӧн Кыскалӧн лолыс, кыпӧдчис вылӧ, лэбзис турунчӧжӧн Эжва вылӧ, кӧні Веляньлӧн лолыс уяліс. Гашкӧ, мусмас на, гашкӧ, ӧтлаасясны на налӧн ловъясныс кӧнкӧ мӧдаръюгыдын, кытчӧ Степанлӧн тывйыс оз судз. Нимкодясьӧ Степан, тшӧктӧ антикристӧс бырӧданінӧ енкола лэптыны, ен карӧн жӧ, мед тӧдісны мыжаяс, мый мезӧс вына. «Бара и бара мезӧслы кевмысям: отсав, мылышт миянӧс, енмӧ, аслад бур кӧсйӧмнад. Зэв вежа, зэв сӧстӧм, зэв бурсиӧма нималысь пан гӧтырӧс миянлысь, ен чужтысьӧс и некор вежсьывтӧм нылӧс Марияӧс быдногыс вежаӧн казьтывлам, асьным асьнымӧс и морта мортӧс и быдӧнлысь олӧмнымӧс Кристос енлы сетам. Мед лоӧ тэнад кутӧмыд, и тэнад каналӧмыд, и выныд, и нималӧмыд, айлӧн, и пилӧн, и вежа ловлӧн, ӧні и быд кадӧ, вежсьытӧг и оръявтӧг локтан нэмъясӧ. Адон! Нималӧмыс айыслы, и пиыслы, и вежа лолыслы».
Нэмъяс колисны сэсянь. Йӧзыс вунӧдісны Веляньӧс, вунӧдісны Кыскаӧс, да и Степанӧс едждӧдісны-мыськисны, помечӧн вуштісны. Дженьыд йӧзлӧн нэмыс, дженьыд и паметьыс. Сӧмын Уллянаса да Мылдінса манастыръяслӧн стенъяс тӧдӧны ставсӧ. Излӧн нэмыс кузь, излӧн паметьыс бур. Но оз кужны стенъяс сёрнитны, чӧв олӧны да сӧмын ружтӧны, кор сьӧкыд гыжъя шамырнас кадыс личкысьӧ-ӧшйӧ налӧн пельпом вылӧ. Чӧв олӧны.
А гашкӧ, ми найӧс ог кылӧй? Сьӧлӧмӧн кывзынысӧ ог кужӧй, а пельыд ӧмӧй вермас босьтны став шысӧ?
