ДЗОРИДЗ
Нывбабаяс, кодъяс пыралӧны миян кабинетӧ, пыр шензьӧны: «Табак тшыныс тіян али мый лӧсялӧ тайӧ дзоридзыслы? Со ӧд кыдзи дзоридзалӧ!» Быдмӧгыс васӧ уна юӧ, да сы вӧсна Ванька мокрыйӧн шуӧны. Но сылӧн на и мӧд ним эм — Огонёк.
Тӧвбыд ми пелегуйтім быдтасным бӧрся, некор эг вунӧдлӧй юктавны. Мукӧддырйиыс чая ва на кисьтылам вӧлі. Воис тулыс, да Ванькаыд миян кыдзи паськаліс, кыдзи пондіс дзоридзавны яръюгыд гӧрд дзоридзьясӧн — весиг видзӧднысӧ дыр он вермы, синъясыд доймӧны. Китыр кодзув быттьӧ кисьтӧма.
Дзоридзьясыс лун ли кыкӧс сӧмын олӧны, сэсся киссьӧны. На местаӧ быдмӧны выльяс. Лунтырнас сы мында киссяс, мый горшок гӧгӧрыс дзик гӧрд лолывлӧ. Кытчӧ сӧмын оз и киссьыны найӧ: ӧшинь пӧдушка вылӧ, джоджӧ, батарея сайӧ. Но уборщицаным, Дуся тьӧт, аски кежлас весалас ставсӧ, чышкас, да быттьӧ некутшӧм ёг абу вӧлӧма. А дзоридзным пыр ӧзйӧ.
Но Дуся тьӧт регыд пенсия вылӧ петіс, а сы местаӧ индісны том нывкаӧс. Дзоридзным кодь жӧ гӧрд вом доръяса, син доръясыс лӧзӧсь; шувъялӧ-ветлӧ кабинетъясті ва тыра ведраӧн — джоджъяс мыськӧ да миян вылӧ ропкӧ, кор ёнджыка ёгӧсьтам. Дзоридзыс вылӧ и лёк ногӧн видзӧдлывлӧ — быттьӧ сійӧ медся уна ёгсӧ вӧчӧ.
Рытнас ми мунам гортӧ, а том нывкаыд идрасьны кольӧ. Воим коркӧ ӧтчыд асывнас, а кабинетным миян быттьӧ пемыд гу лоӧма. Гӧгӧр бергӧдчим, да аддзим быдтаснымӧс: коньӧр моз сулалӧ — ни ӧти дзоридз абу сылӧн чальяс вылын. Кӧть эськӧ кабинетын миянысь ӧтар сэсся некоді эз вӧв, ёртӧй шӧпнитіс пелям:
— Нетшкӧма, гар бӧжаыд, мед джоджыс эз ёгсяв... Но и петкӧдла ме сылы рытнас!
— Нетшкӧма и эм, — дӧзмышті жӧ ме.
Но рытнас квайт час нин воис, кад удж помавны, а уборщица эз и мыччысьлы. Велӧдтӧг ковмис мӧдӧдчыны. Петӧм водзвылын юкталыштім Ванькаӧс, мед дзикӧдз оз косьмы; шойччан лунъяс ӧд лоӧны, — да сэсся торйӧдчим ёртнымкӧд выльлунӧдз.
Понедельник асывсӧ локтім удж вылӧ, аддзим быдтаснымӧс, да весигтӧ кокньыдджык лоис — сійӧ важсьыс на мичаа ӧзйӧ-дзоридзалӧ. Дзик пыр сетыштім быдтаснымлы ва да местасӧ вежим, вуджӧдім, кытчӧ шонді югӧрыс бурджыка усьӧ; кутім мӧвпавны, мый вӧчны, мед эськӧ дзоридзьяссӧ нывкаыс бара эз нетшкы. Ӧти кывйӧ эг воӧй да рыт кежлас эновтчим. Гашкӧ, лунтырнас мыйкӧ воас юраным.
Пажын дырйи ёртӧй гортас ветліс. Воис да мыччис меным кабалатор:
— Со лыддьы, гӧтырлӧн кольӧма.
Лыдди: «Ме муні командировкаӧ. Яйыс холодильникын, няньыс сервантын, ваыс юкмӧсын, Толикыд садйын, деньгаыс тіян кассир ордын. Нина».
— Кывзы, вай ми записка жӧ колям нывкаыслы да пуктам дзоридз дорас. Сӧмын гижӧд йывсьыс колӧ мӧвпыштлыны.
— Идея! — ӧзйи ме. — Тадзи жӧ и вӧчам, нинӧм дыр мӧвпавны...
Чунь вомлӧс судта шыпасъясӧн ӧтвыв гижим:
«Галина Михайловна, ӧшиньвывса быдтасным норасис миянлы, дзоридзьяссӧ пӧ нетшкӧмыд. Мӧдысь сэсся эн вӧч тадзи, куж нимкодясьны мичлун вылас да юктав дзоридзсӧ. Ва ведраыс пельӧсас, кӧшыс ведра вылас, дзоридзсӧ ачыд аддзан. Ми».
