ГОРТ ОЛЫСЬЯС

Менам батьӧй уджавны ветлывлӧ войвылӧ. Тӧлысь сэні уджалӧ, мӧдсӧ гортын олӧ. Ӧні бара тӧлысь кежлӧ муніс. Ми колим нёльӧн. Мамысь да меысь ӧтдор, ичӧтджык вок Толик да чой Лиза. Кор чойлы тырис куим арӧс, мамӧс корисны удж вылӧ. Сійӧ сельпо контораын бухгалтералӧ. Орчча грездысь пӧчӧй кӧсйис локны отсасьны, но сӧмын вежон мысти, школаӧ пыригкежлӧ. Та вӧсна мамӧй корсьӧма кага видзысьӧс.

— Васьӧ, аскисянь ме удж вылӧ пета. Тіянкӧд луннас мӧдас овны Анна тьӧтка. Тэ ӧд абу нин ичӧт, кывзысь да бура ов, эн вильшась.

— Мый, меным сӧмын бурасӧ овны колӧ? — пырысь-пыр юалі мамлысь.

— Тэ ӧд нёльӧд классӧ нин вуджин, да-й медся вильыш, сійӧн и ӧлӧда.

— Толя дурӧ жӧ.

— А коді дурӧдӧ? Тэ, да-й Толяыслы сӧмын на квайт арӧс тырис, — кывкӧрталіс мамӧй.

Мӧд лун асылӧ миянӧ воис кызсьыс-кыз тьӧтӧ. Мамӧ мунтӧдзыс тӧдмӧдіс сійӧс миянкӧд да висьтавліс, мый колӧ вӧчны. А кор кутчысис нин ӧдзӧс вугйӧ, чойӧй бӧрддзис. Мамӧлы ковмис бӧр косавны да бурӧдны Лизукӧс.

— Тӧдтӧмтӧ, — кирган гӧлӧсӧн шуис Анна тьӧт. — Мун, колян да, бурасяс.

Анна тьӧтӧ босьтіс Лизаӧс ки вылас да пондіс дзӧбыльтны. Ме видзӧді сылӧн кыз да сыла льӧбъяс вылӧ. Найӧ тешкодя вӧрисны: нырыс кӧрсьылӧ, а синъясыс читкыртчӧны сідз жӧ, кыдзи миян Мишка каньлӧн вугралігас.

Толик чуньнас нырас лукйысигмоз тшӧтш кыйӧдчис тьӧтӧ бӧрся.

Кор чойӧй дугдіс бӧрдны, Анна тьӧтка лэдзис сійӧс ки вывсьыс да нуӧдіс чача кӧрӧб дорӧ:

— Со мыйта чачаыс! Ворсышт, кагук.

Лиза босьтіс ассьыс аканьсӧ да пуксис чачаяс дорӧ. Ми Толиккӧд вешйим пызанлань.

— Шегъясям? — юалі сылысь.

— Ага, — Толик зіля пырис пызан сайӧ.

Ми заводитім шегъясьны. Кыдзи и пыр, миян костын лои вензьӧм. Та пӧрйӧ Толик чушкыльтчис:

— Ме тадзтӧ ог ворс.

— Эн, меным дышӧдіс жӧ, — шуи да чукӧрті шегъяссӧ кӧрӧбӧ.

Сэсся вӧзйи дзебысь ворсны. Пудъясим да, Толиклы уси корсьны.

Ме пыри крӧвать улӧ. Толик корсис ӧтилаысь, мӧдлаысь. Эз аддзы да Лиза чойлысь юаліс: кытчӧ пӧ дзебсис? Лиза пыр жӧ матыстчис крӧвать дорӧ да индіс:

— Со, татчӧ пырис Васьӧыс.

Ме петі да шуи Толиклы, мися, тадз абу честнӧ! Висьталӧмнад быдӧн аддзас. Выльысь, мися, корсь.

Лизалысь синъяссӧ кӧрталі мамӧлӧн чышъянӧн, мед оз аддзы да оз висьтась. Но Лиза бара кутіс бӧрдны. Котӧрӧн локтіс Анна тьӧтка да ньӧрйӧн бокӧ шлачнитіс.

— Мыйла дзерӧдан Лизуксӧ? — горӧдіс чирӧм гӧлӧснас.

— Ме ог дзерӧд, кӧрталі синсӧ, медым оз висьтась.

— Оз позь! — бара киргыштіс тьӧтӧыс. — Сулышт пельӧсын, он кут вильшасьны!

Ме эг кӧсйы пельӧсад сувтны, но Анна тьӧтӧ кыз чуньяснас кватитіс менӧ шуйга пельӧд да нуӧдіс ӧшинь дор пельӧсӧ: сулышт пӧ тані. Доймӧмысла менам весиг синъясӧй вазьылісны.

Анна тьӧтӧ муніс пач вом дорӧ, перйис зепсьыс папирос да кутіс куритчыны. Тшынсӧ лэдзаліс пач вомас, медым ывлаас кыскас. Ӧтарӧ вомгорулас броткис.

Ме букыштчӧмӧн видзӧді сылӧн кыз льӧбъяс вылӧ. Морӧс пытшкын ставыс ыпъяліс-пуис, тьӧтӧыс вывтіасьӧ да.

Пажын дырйи Анна тьӧтӧ йӧвсӧ Лизуклы кисьтіс ыджыд стӧканӧ, а меным да Толиклы ныр уланым пуктіс стопка.

— Тянлы, вильышпозъяслы, и тайӧ тырмас, — кыз льӧбъяссӧ вӧрӧдыштіс сійӧ.

Ми ӧти здукӧн йӧвсӧ юим да петім пызан сайысь. Кынӧмӧй эськӧ эз пӧт, но ме эг кут дзайгысьны.

— Толик, петалам ывлаас, — нуӧді вокӧс.

Толик пырысь-пыр кӧсйысис. Петім да мунім карта сайӧ. Сэні миян Бусколӧн чомйыс. Войдӧр вӧлі кильчӧ дорын, но Бускоыс ставсӧ кодйис, парсаліс, да мамӧй батьӧлы тшӧктіс чомсӧ карта сайӧ нуны. Буско аддзис миянӧс да мӧдіс бӧжсӧ легӧдны. Сылы сӧмын на во джын, пыр нырччӧ миянкӧд ворсны. Ме босьті да мынті сійӧс чеп вывсьыс. Мед, мися, котралыштас. Первойсӧ ми гӧньлалім, а сэсся кутім шыблавны бедь помъяс. Буско найӧс бӧр миянлы ваялӧ. Пӧсялі, горшӧй кутіс косьмыны да, Толиклы шуа:

— Час, пырала ва юыштны.

— Ме тшӧтш, — вӧтчис ме бӧрся Толик.

Буско миянкӧд посводзӧ пырис. Кор пырим гортӧ, сійӧ мӧдіс увтчыны. Анна тьӧтка кыліс да увгыны мӧдіс: мыйла пӧ понсӧ домсьыс лэдзинныд. Миян водзвылын петіс посводзӧ. Бускоыд аддзис сійӧс, кватитіс ӧдзӧс дорсьыс камаши пӧв да ывлаӧ пышйис. Анна тьӧтка бӧрсяньыс уськӧдчис.

— Кытчӧ менсьым камашисӧ нуан?! — горзӧ сійӧ.

Босьтіс кильчӧ дорысь пастукалан ньӧр да уськӧдчис пон бӧрся. Ме тшӧтш котӧрӧн лэччи содйӧд.

— Буско, лок ме дорӧ! — чуксала понйӧс.

Буско котӧртіс карта сайӧ, ме — бӧрсяньыс. Анна тьӧтка вӧтчӧ, аштӧма, ньӧрнас шенасьӧ. Буско сувтіс, чӧвтіс вомсьыс камаши пӧвсӧ да бӧжсӧ мӧдіс легӧдны. Анна тьӧтка матыстчис да камашисӧ босьттӧдз ырыштчис Буско вылӧ ньӧрнас. А ме понтӧ аснам сайӧді.

— Он лысьт! — горӧді.

Ньӧрйыс сэсся менам мыш кузя и шлапнитіс. Доймис эськӧ, но эг бӧрддзы. Сӧмын мӧвпышті: Бусколы кӧ инмис, сылы ёнджыка доймис, сылӧн жӧ паськӧмыс абу!

Анна тьӧтка ропкигтырйи карта сайӧдыс бӧр мӧдіс мунны. Куйӧд чукӧр дорас воис да вильдіс. Кымыньӧн усис да чеччигас ёрччыштіс. Бергӧдчис мелань, а менам серамӧй петіс:

— Ха, ха, ха.

Анна тьӧткалы чужӧмас кизьӧр куйӧдыс ляксьӧма, синкымас да льӧб дорас ӧшйӧма весиг. Зэв тешкодьӧн кажитчис. Аддзис менсьым сералӧмтӧ да пинявны мӧдіс. Быттьӧ ме мыжа лои сылӧн усьӧмысь. А Буско котӧртіс сы дорӧ да нӧшта увтны пондіс.

Рытнас сэсся мамлы норасис миян вылӧ да шуис: аски пӧ ог лок кагасӧ видзны. Мамӧй кутіс майшасьны, кысь пӧ кага видзысьсӧ корся. А ме эг кӧсйы, медым бара локтіс Анна кодь тьӧтӧыд.

— Асьным олам, тэ ӧд висьтавлін, мый ме абу нин ичӧт, — чорыда шуи ме.

Сёрнитчим, мый мамӧ удж костас тшӧкыдджыка волас миянӧс видзӧдлыны. Сылӧн контораыс матын да, волӧмнас уна кад оз вош. Мӧд лунас горт овны ачым коли, ыджыд пыдди. Ас кежын ачымӧс такӧді, мися, школаӧ пыртӧдз регыд нин коли. А сэки воас пӧчным да миянлы гажа лоӧ. Миян пӧчным шань. Сійӧ ньӧрнад оз вачкысь да-й пельтӧ оз чепляв.