ВӦР КЕРКАЫН

Вӧралысь гажтӧмысь оз пов!

Тима Педӧр, вӧлӧмкӧ, олӧ чӧс туй керкаас.

Ӧтчыд рытнас пусяс-сёяс да узьны водас.

Ывлаыс тӧлакодь, пуяс шувгӧны. Сылы шуштӧмкодь.

Недыр куйлӧм бӧрын кодкӧ, кылӧ, ӧшиняс гольӧдчӧ. (Код нӧ вермас татчӧ локны сё верст сайӧ?)

Гольӧдчӧм-шаркӧдчӧм дыр кылас: дугдылас да, бара да.

Медбӧрти ёна шуштӧм лои. Чеччас. Матыстчас ӧшинь дорӧ — некод оз тыдав ни шыась.

Бара водас. Оз узьсьы. Ывлаын бара гольӧдчӧ.

Мӧдысь чеччас да черӧн петас ывлаад. Ӧдзӧссӧ восьтігӧн мыйкӧ посводзас шур-шармунӧ. Петас ывлаӧ. Видзӧдӧ: ӧнтая вайӧм сюмӧднад, вӧлӧмкӧ, тӧлыд шаркӧдчӧ.

Керка гӧгӧр кытшовтас, матыстчас ӧшинь дорӧ — сэні мӧтырыд тув йылас довъялӧ, гольӧдчӧ керка бердас.

Со жӧ пӧ ӧд мыйысь босьтас гажтӧмыд; эг кӧ петав да видзӧдлы, югыдӧдз эськӧ сьӧлӧмыд эз инась. Тадзи ӧд олысяыд и каститчывлӧ, повзян кӧ.