ОЛӦМПукала ӧтнам ме висьмылӧм бӧрын, Ывлаын шоныд, и югыд, и лӧнь, Юрсиӧс малалӧ небыдик тӧвру, Неылын лӧсталӧ Эжвалӧн вӧнь. Шоныда зэрӧмысь бӧръя лун-войсӧ Веж биӧн ыпмуніс турун и кор, Став рӧмӧн дзоридзыс сералӧ-ворсӧ, Сёнын бӧр садьмис да варовмис шор. Пывсянлӧн вевт улын вугралӧ гулю, Сэтӧні гозъялӧн чужтысянін. Сэсся со эньпӧлыс верӧссӧ колис — Вежис и лӧнис, оз лапнитлы син. Лежнӧглӧн дзоридзӧ пурскысьӧ мазі — Юмовсӧ нёнялӧ — сэтшӧм тай удж, Быдӧн тай ас ногыс кылӧ тан гажсӧ, Ас ногыс сӧвмӧдӧ олӧмлысь вуж. Гымалан зэр бӧрын сынӧдыс сӧстӧм — Пыдӧсӧдз мыськовтӧ лы-сьӧм и вем, Бурді кӧ, бара на олыштам пӧтмӧн — Шоныдысь, югыдысь нимкодь и мем!
