БАТЬКӦД СЁРНИ

Талун, батьӧ, меным комын нёль нин — 
Буретш сымда, мыйта вӧлі тэн,
Кор войналӧн сатӧк йыла молльыс
Морӧс кудтӧ бытшкис тэнсьыд — дзен.

Талун ёртъяс ыдждӧдлӧны менӧ — 
Быттьӧ-й колӧ радлыны лунтыр.
Сӧмын тай со шогыс мыйкӧ венӧ:
Синмӧс куня, тэнӧ аддза пыр.

Кыдзи усин, мый медбӧръяысь шуин — 
Тайӧс, батьӧ, немтор ме ог тӧд.
Ставсӧ сьӧрсьыд аскӧдыд тэ нуин.
Ӧні ачыд лоин кыдзи вӧт.

Гашкӧ-й, думсьыд ыджыд питӧ сэки
Морӧс бердад топӧдлін бур здук.
Кыдзи овны — бӧръя индӧд сетін,
Сэсся-й ставыс воши — слук ни дук...

Талун, батьӧ, тшӧтшъяӧсь ми лоим,
Ӧні тэкӧд двӧйни кодьӧсь ми.
Талун быттьӧ ме ордӧ тэ воин,
Шуин: «Висьтась, кыдзи олан, пи».

Гожӧм шӧрын сэк тай мунін гортысь,
«Аръявылыс, — шуин, — локта бӧр…»
Батьӧ, батьӧ, муса вокӧй, ёртӧй,
Войнаыд тай абу вӧлӧм... вӧр...

Нуин челядьдырнымӧс тэ сьӧрсьыд, 
Мамӧнымлы колин ки тыр шег.
Сійӧ, коньӧр, вынсьыс вывті пессис,
Кытчӧдз ачыс сартас моз эз чег.

Миянлы сэк вӧля колис овны — 
Котрав, ислав — дугдӧмтӧ он тӧд.
Ставыс эськӧ тырмис ичӧт ловлы,
Перйыны кӧ эз ков кынӧмпӧт.

Сэсся-й мийӧ, эньтӧм-айтӧм позтыр,
Му выв пасьта разалім шур-шар.
Чужанінным, гажа муса гортным,
Сісьмис ӧтнас уна тулыс-ар.

Тӧдса ягъяс, тэнад важ чӧс туйыд
Миянлысь оз кывлыны нин гор.
Гожся лунӧ, кор тай вӧлӧк уян,
Горшнымӧс оз веськӧд Паля шор.

Юны васӧ ковмис мукӧд шорысь,
Чӧжис вынӧс лавкаса йӧз нянь.
Гажтӧмыс жӧ тасасьліс кӧ горшӧ,
Такӧдлывліс эз ас кывъя ань.

Чорыд йӧзлӧн ыкшасьӧм да видчӧм
Кузьдӧдлісны менсьым уна вой.
Скӧрмӧм вылысь — мича кӧть зэв мисьтӧм — 
Йӧзлы ме и ачым вӧчлі дой...

Но тэ, батьӧ, нормыны тай пондін?
Муса вокӧй, бӧр вай кыпӧд юр.
Морӧснымӧс винанас вай шонтам — 
Олӧм миян абу на дзик дур.

Ставӧн быдмим, крепаммисны бордъяс,
Уджын некод оз корсь вуджӧр сай.
И кӧть быдӧн торъя тальӧ ордым — 
Олӧмыслы сетӧ колан пай.

Ӧти перйӧ му пытшкысь «сьӧд зарни»,
Мӧдлӧн нимыс — «тӧждысьысь парторг»,
Коймӧд лэптіс, гашкӧ, быдса кар нин,
Ме со пані гоз-мӧд гижӧдтор.

Тадзи, вокӧ... Олӧм мунӧ водзӧ,
Сӧвмӧ тшӧтш и миян рӧдлӧн вуж,
Тэныд эськӧ нимкодясьны позис,
Эн кӧ шудтӧм кодзув улын чуж...

Кызь миллён тшӧтш водіс тэкӧд, батьӧ!
Быттьӧ висьысь — виртӧммыліс му.
Но ми сэки эгӧ воштӧй садьӧс — 
Дасьтім тэнӧ виысьяслы гу.

Сэсся-й тшыг да курыд синва сорӧн
Бурдӧдалім мулысь доймӧм бан.
Сьӧкыд уджӧн тырӧм кызь во бӧрын
Важсьыс зумыд лои миян стан.

Пызан вылын шӧрӧм эз ло вӧсни,
Лыдтӧм биӧн венам арся вой,
Весиг, батьӧ, — эскы кӧть эн эскы — 
Тӧлысь вылӧдз нюжӧдім нин сой.

...Сӧмын менам дойыс век оз быр на,
Кыдзи тӧвся Сыктыв вылысь ры:
Кодкӧ ӧмӧй кылас тэ моз бура
Менам сьӧлӧм вӧрзьӧмлысь быд шы!