ВИСЬМӦДЫСЬ ЛЫМ

Эстшӧм мича гажа лунӧ
Висьмӧм миян ичӧт Вань — 
Садикӧ оз лэдзны мунны,
Оз пыр сылы шыд ни нянь.
	Весиг чеччыны оз вермы — 
	Дзикӧдз бырӧм мортлӧн вын,
	Голя пыктӧм чорыд кер моз,
	Некыдз кызӧмысь оз мын.
Курыд зелльӧ ковмӧ юны,
Ворсӧм вунӧдӧма ки.
Ичӧт Ванькӧд лоис мый нӧ?
Мыйла сійӧс сотӧ би?
	Локтіс доктор, кывзіс Ваньӧс,
	Петкӧдлыны тшӧктіс кыв,
	Сэсся-й шуис стрӧга аньыд:
	 — Тэ тай, пиӧ, сёйин лым?
 — Эз ӧд аддзыв менӧ некод! — 
Воча кывнас Вань эз вош:
 — Лымсӧ сёйи гусьӧникӧн,
Веськӧдышті косьмысь горш.
	 — Лымйыд, пиӧ, абу сёян,
	Татшӧм дурӧмтӧ он дзеб:
	Висьӧмъясӧ пыр жӧ вӧян — 
	Видзӧд, кутшӧм лоин жеб!
Лымйыс усьӧ оз сы вылӧ — 
Тайӧс вунӧдны эн лысьт! — 
Усьӧ, гажӧдны мед ывла,
Медым исковтӧдіс лызь!