ТУНДЫРЪЯКЛЫ ОЗ МӦРЧЧЫ ПУЛЯЫС

Ачыс жӧ сійӧ морт, абу морт, Тундыръякыс, сійӧ кӧть Тундыръякӧн шуӧны. А мортыдлы пуляыс ӧд мӧрччӧ, а сылы ӧд пуляыс оз мӧрччы, ме ӧд сійӧ шуа, мися, сійӧ абу морт. Тундыръяк сійӧ ачыс кутшӧмкӧ олысь.

Кӧнкӧ тундраын, сійӧ тундраын олӧ. Тундрасянь пӧ сійӧ ветлӧдлывлӧ. Ветлӧдлӧ на тай-а. А ӧні ог тӧд сэсся-и. Ӧні ӧд сэсся виисны нин колӧкӧ. Ӧні ружйӧяснад ветлӧдлӧны да, кӧнкӧ, виисны нин сійӧ.