СИН ПӦЛА МОРТ

Миян син пӧла морт вӧвлі, сідз и рӧдитчылӧма. Синмыс сылӧн сэтшӧм югыд — ставсӧ аддзӧ. Мужикъяс нарошнӧ бечева нюжӧдасны Ӧстяк Мыжы сайӧ, а сійӧ Мыжыын, сизим километра, петас керкасьыс и — висьталас кымын гӧрӧд бечеваас. Сійӧ ӧти синма, а кыкнан синсьыс югыдыс ӧти синмас чукӧртчӧма, сійӧн сідз бура аддзӧ.

А керкаысь керкаӧ ветлӧ да бара жӧ ставсӧ аддзӧ, тӧдысь кодь и вӧлӧма. Кутас пырны кутшӧмкӧ керкаӧ да кодкӧ бара сійӧс упритӧ, малича бӧжӧдыс кутӧ. «Эн, — шуӧ, — играйтӧ, лэдзӧ». Сэсся пырас керкаас да висьталас: «Но, бара кодкӧ тіян кулысь лоӧ!»

И збыль, кодкӧ сы керкасьыс кулӧ. Сійӧ урӧсыс, сійӧс тӧдӧ да, предупредитӧ: эта керкасьыс лоӧ кулысь, юӧртӧ.