ЁН ВАСЬ
Кониын сійӧ овлӧма, Ён Васьыд. Ӧтнас олӧ вӧлӧм, зэв ён морт. Сылӧн вӧлі серӧй вӧв, ыджыд, агроматнӧй. И богатӧй вӧлӧма сійӧ.
Турья катыдын дзоля ю выйим, нимыс Пожӧг. Пожӧг вом мӧдлапӧлас, катыдджык, местаыс шусьӧ Кар Яг. Сэтчӧ вӧлӧм сійӧ, Ён Васьыд, кар карны кӧсйылӧма, ӧтнас. А местаыс яг, зэв гажа да рӧвнӧй.
Вот коркӧ сійӧ веслянса мужикъяслы удждӧма деньга. Веслянсаяс кӧсйӧмаӧсь локны кар стрӧитны, рӧбӧта вылӧ. Веслянсаяс сэсся абу локтӧмны рӧбитнытӧ. Куимысь долгсӧ корлӧма... Веслянсаяс абу сетӧмны.
Мунӧма сійӧ страдна кадӧ. Гырысьыс некод абу, весьыс турун карны мунӧмаӧсь. Сійӧ воӧма Веслянаад. Абу сетӧмаӧсь долгтӧ да дӧмъяснысӧ весь кисьтӧма.
Воасны страдна вылысь веслянса, а дӧм рӧзбушитӧма, дӧсты кисьтӧма. Веслянсаяс чукӧртчасны, сёрнитчасны и Васьӧс вины шуасны.
Виӧм кӧтшасӧн шуӧны — сэті кӧтшасӧдыс вӧлӧм гӧраӧ кайӧ туй. Сэтчӧ туй бокас локтӧмаӧсь веслянсаясыд шыясӧн дӧсты.
Ён Вась кутас кайны гӧра бокӧдыд, туй вывтіыд. Местаыс вӧра вӧлӧма, помледз. Шыбитчасны веслянсаыд шыяснад да бытшкасны вӧв вывсьыс, морт дас кык. Уськӧдасны вӧв вывсьыд да виасны сэтчӧ. Ыджыд из сэні туй бокас выйим, сы вылын и кералӧмаӧсь дӧсты.
Вот сэсся суседъяс кватитчасны: «Аттӧ пӧ, Василейным муні дай эз во. Жив абу бара?» Сійӧ сёрнитасны, а вӧлыд и воас ачыс, Емватӧ вуджас. Суседъясыд и мунасны морт нёль кымын. А туйсӧ тӧдӧны, кыті ветлӧ сійӧ. Мунасны, каясны гӧра бокад дай сюрӧ — керавлӧмаӧсь дӧсты. Вот сэсся шойсӧ дзебасны, кӧрӧнитісны. Сылӧн овмӧсыс кольӧ.
Кӧні олӧ вӧлӧм, дӧм улас пӧгреб. И сылӧн сэтӧні кирпич сводйӧн пырӧ розь сэтшӧм. И вот пырӧмаӧсь сэтчӧ кык кузнеч. Ӧтиыс кыдздінскӧй, а мӧдыс керӧсскӧй. Иван Андреевич Жилин да Алексей Михайлович Кучменев, менам ай.
Ӧкмыс ступик пыралӧмась сиська биӧн да воӧма ӧбӧс, томана. Тайӧ вӧлӧма 1902ʼ воӧ. Томансӧ вӧрзьӧдасны насекӧн да лыа моз киссяс. А ӧбӧс юр йылас ӧшинь кодь вӧлӧма, стеклӧ, лӧзӧдӧма нин. Стеклӧтӧ жугӧдасны насекӧн и сэтысь воздухыс жургыны-петны кутас. Биныс кусӧ налӧн да косасны, бӧр петасны.
Оз тӧдны, тайӧ пӧгребыс Ён Васьлӧн или куим рӧзбойниклӧн, кодъяс сэн пӧ овлӧмны Ён Васьӧдзыс на.
Тайӧ местасӧ, пӧгреб розьсӧ, ме кындзи некод оз тӧд сэсся.
