* * *

Ме век на виччыся, мый локтан...
И дрӧгмунла, кор кок шы кыла.
А морӧс пытшкӧс вундӧ-сотӧ...
Да чепӧсъя ме кильчӧ вылӧ.
Но ӧдзӧс сайын лӧнь и пемыд...
И некод абу... Дойыс пӧдтӧ!..
Ми, гашкӧ, паныдасям сэні —
Зэв гежӧда нин овлысь вӧтын.
Ме бара ӧшинь дорӧ пукся
Да вочаала кӧдзыд асыв...
И тэкӧд сёрнита да юкся
Став тӧждъяс-шогсьӧмъясӧн аслам.
Ме пыр на видза сьӧлӧм вылын
И муслунтӧ, и мелі нюмтӧ...
Но кӧні тэ? Тэ кылан?.. Ылын... —
Мен воча йӧлӧгаыс сувтӧ.
Фронт вывса карточкаыд стенмын...
Тэ бӧръя письмӧад мен гижлін:
«Прӧклятӧй вӧрӧгӧс ми вермам,
Мед кӧть и ёсьтӧ ассьыс гыжъяс!
Тэ виччысь менӧ! Воа регыд!»
Ок, донаӧй дай сьӧлӧмшӧрӧй...
Мен эськӧ аддзысьлыны тэкӧд
И шуны, мый став лёкыс бӧрын!..
Да пӧтмӧн окавны ён кияс
И шыльӧдны дзик рудмӧм юрси...
Ме керкаысь ог кусӧд бияс
И бара ӧшинь дорӧ пукся...

Ме век на виччыся, мый локтан...