* * *

Ме нинӧм да некодӧс мырдӧн ог кут,
Мый менам — пыр мекӧд и лоӧ.
Ӧд таын и эм, гашкӧ, мувывса шуд,
Кор он тӧд, мый сэтшӧмыс полӧм.

А полӧмыс быдӧнлысь чегъялӧ борд
Да быд сьӧлӧм кылӧмъяс торкӧ.
И кӧдзалӧ нэм кежлӧ морт дорӧ морт,
А ловзьӧ кӧ — сёрӧн нин коркӧ.

Сэк енэжыс быттьӧ нин мӧд нога лӧз
И шондіыс шонтӧ оз сідзи...
Кор полӧмысь мынасны вежӧра йӧз —
И олӧмныс лоӧ зэв мича!

И личалас лов вылад зэлӧдӧм кӧв,
Да пыдӧджык лолыштны артмас!
Тэ кӧсъян, мед полӧмыд некор эз вӧв? —
Бур мӧвпъяс ас гӧгӧрыд гартлы!