* * *

Ме сэтшӧма ачымӧс радейта, 
мый сёйтӧгыд узьны ог вод!
И сэк жӧ, зэв чорыда надейтча, 
мед сьӧктаӧй эськӧ эз сод.

Быд асыв ме пресс кӧсъя качайтны,
но дышӧй тай меысь на зіль!
И бара ме пиняла ачымӧс!
Ог сёй сэсся вой кежлас, збыль!

Ме весиг ог мун орчча лавкаӧ
да чӧскыдтор аслым ог босьт!
Ме рытнас ог сюй нырӧс шкапъясӧ, 
да (кыв сета!) нинӧм ог корсь!

И гоз-мӧд час кыдзкӧ да колисны. 
Со рытланьӧ матыстчӧ кад.
Друг ёртъясӧй гӧститны корисны, 
а ме, мыйкӧ, абу и рад...

Мый вӧчны? Ме киясӧн ӧвтышті! 
Дерт, ветла, но нинӧм ог сёй!
Ӧд луннас на нуръяси, пӧтышті, 
мед кокньыда коляс тавой.

А ёртъясын пызаныс чегъясьӧ: 
сэн быдсяма пӧжасыс эм,
И кампет кыш югъялан серъяссӧ 
ме быттьӧ эг аддзывлі нэм!

Но ачымӧс кута ме киясын. 
А нывъёртӧй шмонитны дась:
— Тэ лямӧдін, гашкӧ, диетасӧ?
— Диета кӧ, мый!? Быдса казнь!

Да гожӧм нин матыстчӧ, Валюкӧй, 
а гачьясӧ важӧн ог тӧр!
И та йылысь быть лоӧ жалитны, 
ме абу нин воддза кодь чӧрс.

— А позьӧ ӧд котравны асывнас! 
И ӧтвылысь босьтчывлам вай!
А ӧні лок пӧжаснас-кампетнас 
ми чӧскыда юыштам тшай!