* * *

И бара воӧ челядьдырӧй дум вылӧ,
Кӧть ӧдзӧсыс нин игана — он пыр.
Сэк кӧсйим ӧдйӧ верстяммыны, шулывлім:
Но кор нин быдмам? Мыйла сэтшӧм дыр?

А воськов бӧрся воськов — кадыс лэбӧма,
Эг тӧдлӧй. Синмӧн лапнитана здук.
И юавлӧмъяс ӧні пыдӧ дзебӧма,
И казьтылӧмъяс — разьны позьтӧм дзуг.

Ме верстьӧ мортӧн гижа тайӧ кывбурсӧ
И, овлӧ, мӧвпӧн челядьдырӧ вола.
Ок, аддзӧдлыны, эськӧ, сійӧ нывкасӧ
Да шуны: «Со тай, быдми, видзӧд! Чолӧм!..».