КОДЛЫ ДОНА КОМИ ЙӦЗ, СЫЛЫ МУСА КОМИ КЫВ

Регыд лоӧны Сыктывкарын Сӧветъяслӧн да коммунистъяслӧн съездъяс. Революция бӧрын уна съезд нин чукӧртчыліс. Сознательнӧй (садь вылӧ воӧм) коми йӧз быд съездлысь виччысисны: вот тайӧ вӧтлас Коми муысь коми йӧзӧс рочӧ пӧртан политикасӧ сарлысь. Но воддза съездъясыс эз и думайтлыны сы йылысь, пыр кыдз вермисны отсалісны коми йӧзӧс рочӧ пӧртны. Корлісны деньга роч школаяс восьтавны, мед эськӧ сэні коми челядьлысь ловсӧ нартитны. Важ съездъяс вылӧ унджыксӧ бӧрйылісны буржуйясӧс, озыръясӧс, кодъяс оз вермыны кывзыны коми сёрни. Ӧнія съездыс, ме чайта, лоӧ коми съезд, сы понда мый сэтчӧ локтасны коми гӧль йӧзсянь делегатъяс. Сійӧ, гашкӧ, оз нин вунӧд уна терпитысь, шудтӧм коми йӧзӧс и кутас уджавны гӧгӧрвоана лозунгъяс серти: «Коми йӧзлы правда», «Коми йӧзлы — коми кыв!»

Тырмас чӧв овны. Тайӧ съездыс кӧ справедливӧй коми съезд лоӧ, сійӧ коми йӧз вылӧ букыша видзӧдысьяслы чорыда шуас: «Вешйӧ, энӧ мешайтӧ коми йӧзлы чеччыны. Тырмас. Миянӧс дыр нин ылӧдлінныд. Тырмас коми кыв увтыртны, — кодлы дона коми йӧз, сылы муса коми кыв!»

Ёна ковмис вензьыны коми школа вӧсна сэтшӧм йӧзкӧд, кодъяс пыр на сар политика серти уджалісны, эз радейтны коми кыв да коми йӧзӧс.

Коми йӧзлысь нянь сёйысьыс уна, бур вӧчысьыс этша! Паськыд Коми муын эмӧсь йӧз, кодъяс конъялӧны коми йӧзӧс, оз лэдзны кок вылас сувтны. Съездлы колӧ дзикӧдз мездысьны сэтшӧм йӧзсьыс, вомсӧ тупкыны налысь.

Паразитъяс саркӧд ӧтув эз лэдзны коми йӧзӧс велӧдчыны. Эз лэдзны комилы сӧвмыны. Коми школаын медводдза лунсяньыс рочӧн велӧдісны. Быд учрежденньӧын сёрнитісны, гижисны рочӧн. Ӧні на сідз вӧчӧны.

Сӧветъяс съездлӧн, коммунистъяслӧн медыджыд могыс — весавны Коми му сэтшӧм йӧзысь, кодъяслы мустӧм коми кыв, кодъяс оз радейтны коми йӧзӧс, синнас оз вермыны видзӧдны коми школа вылӧ. Найӧ оз лэдзны ёнмыны коми культуралы. Налы Коми муын абу места!

Мед уджалас, тӧждысяс съезд шудтӧм йӧз вӧсна, коми йӧз вӧсна!