ИЧМОНЬ

Регыд лоӧ вой шӧр.
Керка пытшкын чӧв.
Ывла вылын лёкысь
Шутьлялӧ вой тӧв.

Пеша дорын ичмонь
Зільӧ, печкӧ шӧрт.
Зунякылӧ кыӧ
Пӧрысь пӧчӧ вӧрт.

Джодж шӧрын пач бердын
Узьӧны нёль вок.
Ыджыдыслы лои
Сӧмын ӧкмыс во.

«Батьным ваяс кӧч нянь», —
Шуалісны дыр.
Сідзи-й унмовсисны
Бать виччысигтыр.

Батьныс муніс ягӧ
Лэдзны керка вӧр,
Тайӧ рытнас кӧсйис
Локны гортӧ бӧр.

Ичмоньлӧн оз узьсьы,
Думайтӧ лёк дум.
Мужик сылӧн некыдз
Дум вывсьыс оз вун.

«Кытчӧкӧ ӧд эз жӧ
Парма вӧрӧ вош.
Ен мед видзас притча-сь,
Эз жӧ парсав ош.

Ошкыс гуын. Да и
Первой али мый:
Эз нин ӧти ошкӧс
Нэм чӧжнас ӧд кый.

Тӧлын вошны сьӧкыд,
Абу сэтшӧм морт.
Абу том нин вӧлыс —
Сійӧ аддзас горт.

Эз-ӧ мукӧд пӧлӧс
Сыкӧд притча ло?
Вой шӧр бӧр нин лои,
Мужик век эз во.

Енмӧй, видз жӧ притча-сь!
Челядь керка тыр.
Эн торк налысь шудсӧ, —
Долыд олан дыр!»

Пызан весьтын джаджйын
Уна пӧлӧс ен;
Ичмонь шогсьӧм вылӧ
Шпыннялӧны сэн.

Сартас трачкакылӧ.
Пеша вор тыр шом,
Пӧчлӧн унмыс локтӧ,
Паськавлӧ зэв вом.

Труба пиын бӧрдӧ,
Омлялӧ лёк тӧв...
Ӧшинь увті, кылӧ,
Гургис доддя вӧв.

Пуктіс печкан ичмонь,
Кыскис пачысь шыд.
Мӧвпалӧ: «Эг прӧстӧ
Виччысь рытывбыд».

Пырис сэки мужик,
Матыс грездса морт.
«Эн жӧ повзьӧй меысь —
Вая омӧльтор...

Кӧзяиныд доймис,
Ӧдвакӧ оз кув:
Пӧрӧдчигӧн юрас
Печиктіс ён ув.

Вайим ӧшинь улад...
Кӧдзыд, турӧб, лёк...
Ӧдйӧджыка... Кынмас.
Пыртамӧ вай лок».