ДЗИЗГЫСЬ-ДЗАЗГЫСЬ ГУТ


Дзизгысь-дзазгысь гут,
Госыс сизим пуд,
Талун чеччис
Шонді петтӧдз.
Мошкоритчис асывбыд.
Пуис чӧскыд яя шыд.
Пирӧг-шаньга артмис бур.
Шузьӧ чукъя быгъя сур.
Пасьталіс шӧвк сарапан.
Водзас пуктіс рӧмпӧштан.
Вылас ӧшліс уна сикас
Исерга да югыд сикӧтш.
Дзирнясьӧ да вежнясьӧ,
Вежнясьӧ да дзирнясьӧ.
Кокнас топ, кинас тап —
Талун гутыд миян тшап.
Сарапаныс сылӧн мича:
Талун гутыд именнича!
Брун да бран да шур да шар:
Пузис ыджыд самӧвар.
Самӧварын ваыс пӧсь.
Локтӧ гӧстя, локтӧ гӧсьт.
Гӧсьтъяс пытшкын медбур тан
Виж мундира тӧрӧкан.
Сылӧн гӧтыр щельсьыс вӧрзис,
Ассьыс пиян кыскис сьӧрсьыс —
Пиыс сылӧн, гашкӧ, комын:
Сулалӧны пызан помын,
Ӧшинь пырыс чирк
Пызан сайӧ — звирк!
Роч ной гача пытшыс
Эз тай, майбыр, мытшась.
Сылы пырны оз ков ӧдзӧс —
Важӧн пызан сайын жӧдзӧ.
Ызгис-пырис лӧдз —
Сук пармаса пӧч.
Вӧсни коска кодзувкот
Нэмсӧ тэрмасьӧ, оз чот.
Корсьӧ бобув
Аслыс кобув:
Аддзис гутлысь жыр,
Пырис пырысь-пыр.
Некод лудікӧс эз чукӧст —
Щельсянь тыдовтчис гӧрд дукӧс.
Одеколон сьӧрсьыс вайӧ.
Дукыс пӧтӧлӧкӧдз кайӧ.
Кыссьӧ гӧстя лёльӧ-бобӧ,
Сюрнас-пельнас туйсӧ шобӧ.
Локтіс пызан дорӧ.
Шомйӧв пань тыр корӧ.
Ичӧтик да жеб
Воис кыськӧ геб.
Лэбзис шомгаг — жбыр...
Гӧстя — керка тыр.
Нимлун пирӧгыд оз чир ӧд:
Сійӧс сизимдас гӧсьт йирӧ!
Рушку гӧстяяслӧн тыри,
Ваыс самӧварысь быри.
Ставыс найӧ юысь рӧдысь:
Пукты самӧвартӧ мӧдысь!
Именнича, кылӧ, дзуртӧ:
«Сёйӧй-юӧй сьӧлӧм нуртӧ!
Видлӧй ёді черинянь!
Энӧ пуктӧй кисьыд пань!
Бобув, муса чой,
Льӧмъя лязсӧ сёй».
Чомӧр сёйӧ номыр,
Выйӧссьӧма вомыс!
Кыз рушкуа черань
Позсянь дзоргӧ зверӧн,
Гезйӧн другысь шырк
Гутлысь вӧсни гырк,
Пемыд пельӧсӧ гур-гар...
Грым-йирк пӧри самӧвар.
Черань нартитчӧ гут вылын,
Шуӧ шпыннялігтыр сылы:
«Именнича,
Зэв тэ мича!
Волькыд тэнад юр,
Яйыд госа, бур!»
Горзӧ гутыд лёкысь:
«Мездӧй менӧ шогысь!
Меззздӧй, меззздӧй, меззз...
Орӧдӧй чераньлысь гез!»
Повзис гаг чукӧрыд ёна
(Юрыд быдӧнлы ӧд дона!):
Лудік пырис пыді щельӧ,
Лӧддзыд корсьӧ пӧлать пельӧс.
Номырлӧн вежыньтчис вомыс,
Аддзис дзебсянін — нянь шомӧс.
А кузь кока чирк
Паччӧр вылӧ звирк.
Быдӧн разі-пельӧ лӧсйӧ,
Гутӧс мездыны оз кӧсйы.
Гутӧс гезйӧн черань гартлӧ,
Мышкас мый вермӧмсьыс вартлӧ,
Кӧсйӧ чегны сьылідзир,
Юны лӧсьӧдчӧ нин вир.
Мича сарапаныс чездіс...
Некод коньӧрӧс оз мезды.
Кыськӧ вӧрысь удал том,
Збой сьӧлӧма лэбзис ном.
Киас кутӧ лэчыд чер:
«Кытӧн паськыд горша звер?»
Уськӧдчас кыдз черань вылас —
Юрсӧ сотіс черӧн сылысь.
Тадзи мездіс гутӧс том,
Збой сьӧлӧма ном.
Сэсся гутлы шуӧ номыд:
«Тэнӧ мезді черань вомысь...
Тэнад талун праздник лун.
Ме сайӧ тэ, гутӧй, мун!»
Тринь да тронь да бум да бом!
Гут вылӧ гӧтрасьӧ ном.
Щелльысь петіс тӧрӧкан,
Чиркыд сійӧ важӧн тан.
Став гӧстяыс воис бӧр,
Весиг керкаӧ он тӧр.
Ставыс ворсӧ,
Ставыс горзӧ:
«Збодер ном да мича гут,
Сиам тіянлы бур шуд!»
Жӧник миян том —
Збой сьӧлӧма ном.
Невестаыс шань —
Дзизгысь-дзазгысь ань.
Зымгы, сапӧг, грымгы, кок,
Талун вунӧдлам ми шог.
Ызгӧ-бызгӧ лӧдз:
«Йӧктам асылӧдз!
Гутыд миян медся мича,
Сійӧ талун именнича!
Медся смел и медся том
Миян вӧсни кока ном!»
Чиктылӧны гир да гир.
Гутлӧн талун гажа пир.