ТАНК ПОМСЯНЬ МУЫС СЫРКАКЫЛІС


Танк помсянь муыс сыркакыліс,
Полк нуис вир кисьтана бой.
Том командирлысь, пельпом вылын,
Юр лысӧ писькӧдӧма дой.

Бӧлванка дзенӧбтіс танк шӧрӧ,
Эз некод удит шуны «ой»!
А асъя сынӧд, муртса вӧрӧ,
сэсь мыччас нёль танкистлысь шой.

Машина кытшалӧма биӧн —
Взрывитчас став боекомплект.
Вын абу люксӧ восьтны киӧн,
Да ловйӧн татысь он нин нет.

Танк улысь перъяласны шойяс,
Пельпомъяс вылын нёль каркас.
Тадз колльӧдіг медбӧръя туйӧ
Нёль пушка залпыс пуктас пас.

Нёль похоронка гортас воас,
Нёль семья-рӧдвуж суас шог,
Мый татшӧм неминуча лоис,
Мый пиныс гортас оз нин лок.

Пач водзын бӧрддзас пӧрысь мамыс,
Бать чышкас синва — дойыс ён.
Невеста сідзи оз и тӧдмав,
кыдз кӧнкӧ кувсис коми зон.

А стенын, буссьӧм стеклӧ сайын,
Важ карточка — выль быттьӧ дзик:
Салдат погона. Зонмыс тайӧ
Том нывлы абу нин жӧник.