ЛӦЗ ЧЫШЪЯН

Помнита, колльӧдчан рытнас,
Чышъян тэд козьналі кор,
Чужӧмыд ӧзйис. Видзны тэ кӧсйин
Сійӧс, кыдз меддонатор.

Тэ, дерт, он кыв,
Кыдзи сьӧлӧмӧй тіпкӧ, бур ныв.
Он кут, ме тӧда, радейтны мӧдӧс,
Чорыда кутан тэ кыв.

Письмӧтӧ тэнсьыд кор лыддя,
Быттьӧкӧ аддзысьлам сэк:
Югыдлӧз синмыд сьӧлӧмӧ инмӧ,
Чышъяныд син водзын век.

И бара бой,
Бӧрын ещӧ на ӧти сьӧд вой.
Бур кывйыд тэнад салдатлысь венӧ
Морӧсын куслытӧм дой.

Водзӧссӧ козьналӧм чышъян
Шынельын новлӧдла тан:
Доналӧн вӧзйӧм лӧз рӧмӧн ӧзйӧ,
Быттьӧкӧ том чужӧмбан.

И кыптӧ лов, —
Косьын усьӧмысь ньӧти ог пов.
Бойӧ кор пета, эбӧс мен сетас
Мусалӧн сӧстӧм любов.