НЁРЫМ

Ӧтчыд Нёрым пӧль кӧм гоз кыас и мӧдӧдчас вузавны сійӧс. Нопйӧ пуктас и мӧдас. Мунас, мунас, и воас керка. Керкаӧ пырас и юасяс узьны:

— Том ичмоньяс, он-ӧ лэдзӧ менӧ узьны?

— Лэдзам, — шуасны, — мыйла ог лэдзӧ.

— Ачым, — шуӧ пӧль, — инаси. А менам на ноп эм, кытчӧ сійӧс пукта?

— Пельӧсас, — шуӧны, — миян курӧг-петук олӧны. Сэтчӧ, поз дінас и пукты.

— А сэн, — шуас Нёрымӧ пӧль, — сылы самӧй места и эм.

Сёясны-юасны да водасны узьны. А Нёрым дедыд войнас сувтлас да ассьыс кӧмъяссӧ куш косявлас.

Асывнас сувтас кӧзяйка, видзӧдлас и аддзас — Нёрым дедлысь кӧмсӧ косявлӧмаӧсь.

Дедыс сувтас и кӧзяйкаыд висьталас:

— Нёрымӧй пӧльӧ, ыджыд беда тэд вӧчӧмаӧсь курӧг-петукыд.

— А мый, — шуӧ сійӧ, — сэтшӧмыс, кутшӧм беда?

— Кӧмъястӧ куш косявлӧмаӧсь.

А дедыд и шуӧ:

— Мӧдлам жӧ, мӧдлам.

Баяр водзӧ мӧдла.

Сё шайт дон беда вӧча —

Бур петукнаныд он мынӧ.

Кӧзяйка и шуӧ сылы:

— Эн жӧ, эн жӧ мӧд, сё шайт дон беда эн вӧч, медся бур петукнымӧс сетам.

Но, дедлы сетасны петукӧс, нопйӧ сійӧс пуктас и мӧдас водзӧ.

Мунас, мунас, и бара рыт воас. Керка воас, да узьны вӧзйысяс:

— Ичмоньясӧ, он-ӧ лэдзӧ менӧ узьны?

— Лэдзам, лэдзам, кыдз ог лэдзӧ Нёрымӧ пӧльӧс.

— Ме эськӧ инаси, да менам ещӧ петук эм. Кытчӧ эськӧ сійӧс йӧртны?

— А миян, — шуӧ кӧзяйка, — эмӧсь бальӧяс.

— Сэн сылы медбур места, — шуӧ дедыд.

Сідз жӧ водісны. Войнад дедыд сувтлас да петукыдлысь юрсӧ бергӧдас.

Сувтасны, а петукыд кулӧма. Чайтасны, мый ыжъясыд петуктӧ люкалӧмаӧсь.

Нёрымӧ пӧльӧ и бара кутас шуавны:

— Мӧдлам жӧ, мӧдлам,

Баяр водзӧ мӧдла,

Сё шайт дон беда вӧча,

Бур ыжнаныд он мыйӧ.

Кӧзяйка и шуӧ:

— Сё шайт дон беда эн вӧч, медбур ыжнымӧс сетам. Но, дед мӧдас водзӧ. Нопъяс ыжтӧ сюяс. Мунас, мунас, бара рыт воас. Керкаӧ пырас да узьны вӧзйысяс:

— Ичмоньясӧ, он-ӧ лэдзӧ менӧ узьны?

— Лэдзам, лэдзам, кыдз ог лэдзӧ Нёрым пӧльӧс.

— Ачым эськӧ инаси, да менам ыж на эм. Кытчӧ эськӧ сійӧс йӧртны?

— А миян, — шуӧ кӧзяйка, — ӧшъяс эмӧсь, на дінӧ картаас и лэччӧд.

— Сэн сылы медбур места, — шуӧ дедыд.

Сёясны, юасны и водасны узьны. А войнад дедыд сідз жӧ сувтлас да ыжсӧ и начкас.

Асывнас сувтас кӧзяйка, а ыж кулӧма. Чайтас, мый ӧшъяс ыжсӧ люкавлӧмаӧсь.

Кӧзяйка висьталіс Нёрым дедлы та йылысь, а сійӧ:

— Мӧдлам жӧ, мӧдлам,

Нёрым пӧльыс мӧдла,

Сё шайт дон беда вӧча —

Бур ӧшнаныд он мынӧ.

А кӧзяйка кутас шуавны:

— Эн жӧ, эн жӧ мӧд, сё шайт дон беда эн жӧ вӧч, медбур ӧшнымӧс сетам.

Ӧш сетасны. Нёрым дед шердынӧ сійӧс доддялас и мӧдас. Сьыланкыв горӧдас:

Кӧмысь дай курӧгӧ вои,

Курӧгысь дай ыжӧдз вои,

Ыжсянь дай ӧшкӧдз вои.

Кӧч сылы паныд лоӧ.

— Нёрымӧ пӧльӧ, сэтшӧм лӧсьыда тэ сьылан. Он-ӧ лэдз менӧ доддяд?

— Но, — шуӧ, — пуксьы.

И бара сійӧ горӧдас сьывны. Локтас сылы паныд кӧин.

— Татшӧм лӧсьыд сьыланкыв тэ сьылан, Нёрымӧ пӧльӧ, он-ӧ лэдз менӧ доддяд?

— Пуксьы, — шуас сійӧ.

Бара сьыланкыв горӧдас, сійӧс жӧ. Локтӧ ош.

— Татшӧм лӧсьыд сьыланкыв сьылан да он-ӧ лэдз менӧ кывзыны?

— Пуксьы, — шуас.

Сӧмын на сьыланкывсӧ горӧдас Нёрым дед, а заверткиыд сылӧн и орӧ.

Кодлы кӧ ковмас ветлыны завертки пула вӧрӧ. Нёрым дед ыстас первой кӧчӧс. Кӧч ветлас да ваяс ньӧр.

— Тайӧ оз шогмы, — шуас Нёрым дед да ыстас кӧинӧс. Кӧин ветлас да ваяс коз, вужнас и быдӧн.

— Тайӧ оз жӧ шогмы, — шуас Нёрым дед да ыстас ошкӧс. А ош ваяс ыджыд пу, вужнас и быдӧн.

— Тайӧ оз жӧ шогмы. Вай ті караулитлӧй ӧшсӧ, а ме ачым ветла. Нёрым пӧль ачыс мунас. Сӧмын на сійӧ саялас, а ӧштӧ зверьясыд начкасны, ошкыд да кӧиныд, да кӧчыд, яйсӧ сёясны, кусӧ пу вылӧ ӧшӧдасны да сідз и сувтӧдасны, кыдз и сулалӧ вӧлі, а мед куыс вӧрас — пӧткаясӧс куталасны да йӧртасны ку пытшкас.

Нёрым дед локтас, завертки вежас, пуксяс шердынад да кучкас, а ошкыд пӧрӧ: ылӧдчысьтӧ асьсӧ ылӧдісны.