КЫК ВОК

Важӧн волі крестьянин гозъя. Налӧн волі кык пи. Коркӧ-й сэсся бать-мам пӧрысьмисны и куліны, а кык вок гӧтрасисны и юксисны. Ӧти воклӧн вӧлі сӧмын гӧтыр дай оліс озыра, а мӧд воклӧн вӧлі ӧкмыс ныв, дасӧд гӧтыр, дас ӧтикӧд ачыс, и оліс сійӧ зэв гӧля.

— Вай, мужик, тэ нажӧвитчыны ветлы, — шуӧ мӧд воклӧн гӧтырыс.

Ветла пӧ, шуӧ сійӧ. И мӧдіс мунны нажӧвитчыны. А сылӧн четвертак деньга сьӧрсьыс вӧлі. И кабак дорті мӧдіс мунны дай думыштіс:

«Час жӧ ме кабакас пырала».

Пырис сійӧ и шуӧ:

— Человальник, вай винанад юктав.

А уна-ӧ пӧ тэнад деньгаыд? Четвертак пӧ. Четвертак вылад пӧ ог юктав. Вӧчны нинӧм, вӧлӧкӧ петіс сійӧ, вӧлӧкӧд пондіс мунны. Воис кузь пос. Пос улысь петіс старик. Старик и юалӧ, кытчӧ пӧ мунан. Нажӧвитчыны пӧ мӧді, шуӧ гӧль вок.

— Тэ, — шуӧ, — сулав, ме тэд сета зӧлӧтӧй гӧна мегӧ.

Старик пыраліс пос улӧ, петкӧдіс зӧлӧтӧй мегӧ. Сетіс гӧль воклы:

— На, — шуӧ, — нуӧд тайӧ гортад, сувтӧд пызан вылад и тшӧкты: мегӧ, шу, пыркнитчы. Мыйӧн пыркнитчас, быд гӧн йылысь зӧлӧтӧй деньга сявкмунас.

Гӧль вок зӧлӧтӧй мегӧтӧ босьтіс и бергӧдчис деревняӧ. Деревня помӧ воигӧн аддзис коз и сувтіс сэтчӧ.

— Час, — шуӧ, — пробуйтлам тані. Ноко, — шуӧ, — мегӧ, пыркнитчы!

Мегӧ пыркнитчис, быд гӧн йылысь зӧлӧтӧй деньга киссис. Гӧль воклы зэв рад лои. Сійӧ и думыштіс, час, шуӧ, человальник ордӧ пырала, ӧні, шуӧ, винаӧн менӧ юкталас: менам ӧд эм ӧні мыйӧн мынтысьны.

Пырис гӧль вок человальник ордӧ, ошйысьӧ сылы:

— Менам вӧд мыйкӧ эм.

Сэсся босьтіс сійӧ мегӧсӧ да стойка вылас сувтӧдіс.

— Но, — шуӧ, — мегӧ, пыркнитчы!

Мегӧ пыркнитчис, и быд гӧн йылысь сявкнитіс зӧлӧтӧй деньга. Человальник шензьӧмӧн ӧктіс быдсӧн зӧлӧтӧй деньгатӧ и гӧль вокӧс коддзытӧдзыс юкталіс винаӧн. Гӧль вок коддзис дай унмовсис. Дінас жӧ эськӧ пуктыліс зӧлӧтӧй гӧна мегӧтӧ, а человальникыд сійӧ узигкості вежис сійӧс, зӧлӧтӧй гӧна мегӧтӧ босьтіс аслыс, а гӧль воклы пуктіс прӧстӧй мегӧ.

Аскинас паляліс гӧль вок, босьтіс мегӧтӧ, мӧдіс гортас. Гортас воис и шуӧ:

— Но, нывъяс, гӧтыр, пуксьӧй пызан сайӧ, видзӧдлӧй, кутшӧм дивӧтор ме вайи.

Сэсся сійӧ мегӧӧс пуктіс пызан вылӧ и горӧдіс:

— Ноко, мегӧ, пыркнитчы!

Мегӧ эз пыркнитчы, некутшӧм деньга гӧпъяс йылысь эз сявкмун. Баба дӧзмис мужик вылӧ, видны кутіс, нӧйтіс и быдсӧн. Мун пӧ тэ бара ветлы нажӧвитчыны, а ми пӧ тайӧ мегӧтӧ начкам да сёям.

Мужик бара мӧдӧдчис нажӧвитчыны. Муніс, муніс сійӧ, бара воис кузь пос дорӧ. Пос улысь бара петіс старик.

— Менам, — шуӧ, — нинӧм эз артмы мегӧсьыд.

Старик и шуӧ:

— Ме сета тэныд пызан дӧра.

Пыраліс сійӧ пос улӧ, вайис пызан дӧра, сетіс гӧль воклы:

— Мыйӧн, — шуас, — паськӧдан тайӧ, ставыс лоӧ пызан вылын: кодлы мый колӧ, сёян-юан, румкаяс винаӧн и быдсӧн, и ставыс торъя, кӧть кымынӧс пуксьӧдан.

Гӧль вок босьтіс пызан дӧратӧ, бергӧдчис бӧр и воис деревняӧ. Коз улӧ пуксис и шуӧ:

— Час, паськӧдлам тайӧ, збыль абу.

Паськӧдіс гӧль вок пызан дӧратӧ, а сы вылын ставыс эм: сёяныд и, юаныд и, винаыд и. Но, ставыс, ставыс, мый колӧ. Шензис, шензис сійӧ, босьтіс пызан дӧратӧ и бара пырис человальник ордӧ.

— Ме, — шуӧ, — бара на вайи мыйкӧ.

И паськӧдіс сійӧ пызан дӧратӧ человальник водзӧ, став сёян-юаныс лои сэн. Мыйла эськӧ и паськӧдныс вӧлі, тӧдны нин эськӧ колӧ вӧлі да. Но, паськӧдіс сійӧ пызан дӧратӧ и мӧдіс сёйны-юны. Сэсся и бара коддзис да унмовсис. А человальник бара вежис пызан дӧратӧ, прӧстӧй пызан дӧра сылы пуктіс. Аскинас садьмис гӧль вок, мӧдӧдчис гортас. Гортас воис и шуӧ:

— Но, пуксьылӧ, нывъяс, пызан сайӧ, гӧтыр, тшӧтш лок.

Пуксисны найӧ пызан гӧгӧр, вольсаліс сійӧ пызан дӧра, нинӧм оз пет. Гӧтыр бара пондіс видны сійӧс, бара янӧдіс.

— Мун, — шуӧ, — да эн весь шӧйт, бура нажӧвитчы.

Вӧчны нинӧм. Бара муніс мужикыд. Муніс, муніс, и бара кузь пос воис. Кузь пос улысь бара петіс сійӧ жӧ старик и юалӧ:

— Но, — шуас, — кытчӧ нин тэ?

Бара пӧ мӧді нажӧвитчыны, шуӧ гӧль вок. Пызан дӧрасьыд пӧ менам нинӧм эз артмы. А старикыд сійӧ тӧдӧ, кытчӧ лоины мегӧыд и пызан дӧраыд. И шуис сійӧ гӧль воклы:

— Ме, — шуас, — сета тэныд сэтшӧм сумка.

Сэсся пыраліс сійӧ пос улӧ, вайис сумкатӧ, сетіс гӧль воклы и висьталӧ:

— Вот, — шуас, — тайӧ сумкасьыс, мыйӧн восьтан, кык молодеч петасны, мый тшӧктан, сійӧ и вӧчасны.

Ӧшӧдіс гӧль вок сумкатӧ пельпом вылас, бергӧдчис дай мӧдіс деревняӧ. Воис коз улӧ сійӧ, восьтіс сумкатӧ, петісны сэсь кык молодеч. Бура и нӧйтісны найӧ гӧль воктӧ.

— Мыйла, — шуӧны, — воштін зӧлӧтӧй гӧна мегӧсӧ да пызан дӧрасӧ?

Бӧр тшӧктіс сійӧ кык молодечлы пырны сумкаӧ, пӧдлаліс сійӧ и бара нырис человальник ордӧ. Мый пӧ нин вайин, юалӧ человальник. А со пӧ мый. Гӧль вок восьтіс сумкатӧ, кык молодеч сэтысь чеччыштісны и пондісны найӧ человальникӧс дубитны. Ноко пӧ, кӧні зӧлӧтӧй гӧна мегӧыд, пызан дӧраыд, ваян он пӧ, шуалӧны. Человальник зэв ӧдйӧ вайис пызан дӧра и зӧлӧтӧй гӧна мегӧӧс.

— А вот, — шуӧ гӧль вок, — мый вӧчлӧма тайӧ.

Сэсся ӧшӧдіс сійӧ пельпом вылас сумка, босьтіс зӧлӧтӧй гӧна мегӧӧс да пызан дӧра и мӧдіс гортас. Гортас воис гӧль вок и шуӧ:

— Вайӧ пуксьӧй, челядь, пызан сайӧ, лок, — шуас, — гӧтыр, тэ тшӧтш; ӧні, — шуас, — позяс сёйны-юны збыльысь.

Паськӧдіс сійӧ сэсся пызан дӧра, став сёян-юаныс лои сэні. Ставныс найӧ зэв бура сёйисны-юисны. Гӧтыр и шуӧ, тадз пӧ и колі тэныд нажӧвитчыны. Сэсся велӧдіс сійӧ челядьсӧ, пасибӧ пӧ шуӧй таысь батьыдлы. Сёйисны-юисны, пондісны чеччавны пызан сайысь. Энӧ на пӧ чеччалӧй, шуӧ бать. Сэсся лэптіс сійӧ пызан вылӧ зӧлӧтӧй гӧна мегӧӧс и шуӧ:

— Но, — шуӧ, — мегӧ, пыркнитчы.

Мегӧ пыркнитчис, и зӧлӧтӧй деньга сявкмуні.

— Вог, — шуӧ гӧтырыс, — тадзи и колӧ нажӧвитчыны, а тэ кӧнкӧ дурачитан, ветлан.

И зэв лӧсьыда найӧ сэсся пондісны овны. А озыр вок пондіс лӧгавны, завидь сылы лоис мӧд вок вылас.

— Час, — шуас, — ме сылысь мырддя зӧлӧтӧй гӧна мегӧсӧ, пызан дӧрасӧ да сумкасӧ.

И сетіс сійӧс судӧ. Судӧ сетіс, и корисны вокӧс суд вылӧ. Суддя шуӧ:

— Вот, — шуас, — ме тіянлы загадка сета. Думайтӧй бура и аски асыв локтӧй да висьталӧй, коді медмуса му вылын, коді медсыла да коді медся ветлӧм-мунӧм. Коді кужас висьтавны, сылы и сета.

Петісны вокъяс суд вылысь, мӧдісны гортас. Озыр вок и пондіс думайтны: вот, шуас, мый дыра нин ме ола гӧтыркӧд, и некор на эг тышкасьлы. Дерт жӧ пӧ сійӧ лоӧ медся муса. А медся сылаыс пӧ лоӧ миян ӧш, кодӧс пӧ кольӧм во начкылім да ӧнӧдз на пӧ яйыс эм, сёйны пӧ ог вермӧй шыдсӧ, сэтшӧм сыла. А Серко пӧ менам, вӧралан понмӧй, медся ветлӧм-мунӧм.

А мӧд вок воис гортас зэв жугыль. Нывъясыс и юалӧны:

— Мый нӧ, — шуӧны, — бать, сэтшӧм жугыль?

Вот пӧ задача суддя тшӧктіс решитны, коді пӧ му вылын медся муса, медся сыла и медся ветлӧм-мунӧм. Медся ичӧт нылыс и шуӧ, ме пӧ, бать, тайӧ висьтала, медмусаыд пӧ сійӧ ун, медся сылаыд пӧ му, медся ветлӧм-мунӧмыд пӧ думыд. Но менӧ пӧ тэ суддяыдлы эн висьтав.

Аскинас кык вок мунісны суддя ордӧ. Суддя и юалӧ, но мый пӧ, думайтінныд? Озыр вок шуӧ, медмуса пӧ менам гӧтырӧй, мый дыра пӧ ӧтлаын олам и некор на эгӧ тышкасьлӧй, ӧти шебрасӧн гартчӧмӧн пӧ век узьлам. Медся сыла пӧ вӧлі миян куим арӧса ӧшным, кодӧс пӧ начкылім кольӧм во и ӧнӧдз на яйыс эм. Сэтшӧм пӧ сыла шыдыс, мый нӧ и сёйныд он вермы. Медся ветлысь-мунысь пӧ Серко понным миян. Озыр воклӧн висьтавсис, и суддя тшӧктіс мӧд воклы: но, сэсся пӧ тэ висьтав. Мӧд вок висьталіс: медся муса пӧ лоӧ унмыд, медся сыла пӧ му, а медся ветлысь-мунысь пӧ думыд. А коді пӧ тайӧ тэд висьталіс, юаліс суддя. Гӧль вок признайтчис, меддзоля нылӧй пӧ. Сідз кӧ пӧ — сетіс сылы суддя кудель китыр — тэнад нылыд мед таысь печкас-кыас шапка, пальто, гач и став паськӧм.

Локтіс гӧль вок гортӧ и зэв жугыль. Мый нӧ пӧ сэтшӧм жугыль, бать, юалӧны нывъяс. Со пӧ суддя тшӧктіс тайӧ кудель котырсьыс печкыны-кыны шапка и, пальто и, гач и — став паськӧм, шуис бать дзоля нылыслы. Эн пӧ шогсьы, батьӧ, шуас нылыс, мун пӧ вод да узь, аски пӧ аддзам, мый вӧчны. Бать водіс.

Аскинас чеччисны, завтракайтісны. Бать пондіс мунны суд вылӧ. Нылыс и шуис сылы, на пӧ этійӧ сартас китырсӧ ну суддяыдлы, тась пӧ мед вӧчӧма печкан, ректан, стан, набелка и весь прибор, мед пӧ гӧгӧрвоас ачыс сэсся. Нуис сійӧ суддялы сартас китырсӧ и висьталіс нылыслысь тшӧктӧмсӧ. Суддя сӧмын сьӧлыштіс, тьпу пӧ! Сідзи сэсся эз и вермы судитны гӧль воклысь озыр воклы эмбурсӧ.