КАНЬ ДА ПЕТУК

Кань да петук олӧны. Кань шуӧ: «Ме, петукӧ, талун муна пес керавны. Тэ эн шыась некодлы». Петуклы некодӧс эз тшӧкты лэдзны. Кань муні вӧрӧ. А ӧшинь улас локтіс руч да кутіс сьывны:

Петукӧй, петукӧй,

Восьтыштлы ӧшиньтӧ,

Анькытш тусьтор сета,

Шобді тусьтор сета.

Мыччыштіс петук юрсӧ. Руч сійӧс тшапкис дай нуны кутіс. Кань ылын, керасьӧ, кылӧ. Петук горзыны пондіс:

Канильӧй, чойильӧй,

Менӧ руч пышйӧдӧ

Сьӧд вӧр шӧрӧ!

Кань кыліс. Ручӧс панйис. Петукӧс мырддис ручлысь да вайӧдіс гортӧ. «Аски, — шуӧ, — эн нин мыччысь некодлы, ылӧджык муна пес керавны». Сэсся вой сідз олісны. Бара муніс кань пес керавны. Руч бара локтіс, бара кутіс ылӧдчыны ӧшинь улас. Петук горзӧ ӧшинь сайсянь: «Ме ог нин, ручӧ, мыччысь, тэ бара менӧ пышйӧдан». Зэв дыр пӧръяліс, пӧръяліс руч, да петуклы ёна окота лои кӧть син пӧвнас видлыны чӧскыд анькытш тусьяссӧ. Мыччысьыштіс, а руч тшапкис дай бара пышйӧдіс. Кань доза ылӧ мунӧма, да муртса-муртса кылыштӧ керасян шыыс. Петук бара мӧдіс горзыны:

Канильӧй, чойильӧй,

Менӧ руч пышйӧдӧ

Сьӧд-пемыд вӧр шӧрӧ

Кузь пуяс костӧд,

Векньыд ордымъясӧд!

Каньыс бара кылас да ӧдйӧ локтас да мырддяс бӧр.

— Но аски зэв нин ылӧ муна. Эн нин сэсся мыччысь, эн восьты ручлы!

Мӧд лун бара мунас кань пес керавны. Зэв ылӧ. Керасян шыыс оз и кыв. Руч бара локтас. Ӧшинь улӧ сувтас да сьылӧ мыла гӧлӧсӧн:

Петукӧй, петукӧй,

Восьтыштлы ӧшиньтӧ,

Анькытш тусьтор сета,

Шобді тусьтор сета.

Оз восьт петук. Руч вомгорулас моз шуӧ: «Оз кӧ, и муна. Анькытшсӧ татчӧ койышта дай муна гортӧ!»

А ачыс ӧшинь улас дзебсяс. Чӧв олӧ. Петук восьтас ӧшиньсӧ, видлыны кӧсъяс анькытшсӧ. А руч тшапкас сійӧс дай котӧртас. Горзас, горзас петук, кань оз кыв. Ёна ылӧ мунӧма. Сідз сэсся и пышйӧдас петукӧс руч. Со ӧд мый овлӧ кывзысьтӧмыскӧд!