ОШ ДА МУЖИК

Важӧн миян вӧлі нӧвина уджалӧны, вӧрсӧ кералӧны, сэтчӧ сю кӧдзӧны. Ӧти дядьӧ мунас вӧрӧ нӧвина керавны. Вӧр пӧрӧдӧ. Локтас сэтчӧ ош дай шуӧ:

— Бог помощь, дядьӧ. Тэ тай ӧтнад, тӧварышӧ менӧ босьт.

А дядьӧ, дерт, думайтӧ:

— Кутшӧм отсӧг ош помысь. Сійӧ абу морт.

— Ог босьт. Мый тэысь пӧльзаыс? Тэ ӧд он вермы нинӧм керны. Тэнад певйыд абу, да чертӧ кутны он вермы.

Мӧдыс шуӧ:

— Ме кыдзкӧ верма тэныд отсасьны. Он кӧ паяд сибӧд, ме тэныд ог сет нинӧм вӧчны.

Мужик шуӧ:

— Но, мый сэсся керан. Пӧльза кӧ меным оз ло, мыйла ме уджала. Сибӧда пайӧ. Договорӧн толькӧ: меным мый воас татысь, мый быдмас, ме йылас кутчыся. А тэн унджыксӧ сета. Этадзи кинам мыйта шамыртны йылыс сюрӧ, сійӧ ме босьта. А улісӧ ставнас тэныд сета.

Ош зэв рад лои.

Коркӧ нӧвина уджалісны, ректісны, кӧдзисны. Ош мыйкӧ тшӧтш отсасьӧ, кутшӧмкӧ путоръяс шыбитӧ боквыв да мый да.

Коркӧ налӧн и сю кутіс воны, зэв бур сю воӧ, локтӧ. И вундыны ковмис. Дедӧ локтіс вундыны, а ош эз лок. Дедӧ и шуӧ:

— Он кӧ кӧсйы тэ меным отсавны вундыны, ме тэныд нинӧм ог сет, весиг вужсӧ.

Коркӧ локтіс ош, но кысь сылы вундыныс, ӧтнас старик вундіс. Пуктіс плака, босьтіс чер, кольта йывъяссӧ ставсӧ черӧн тшӧтшӧдліс, мешӧкъясӧ сюяліс. Пыжӧ сӧвтіс, нуис став йывсӧ гортас, идзастӧ сэтчӧ колис. Ошлы и шуӧ:

— Вот тэныд вужйыс коли, сійӧ нетшкы. Дӧвӧлен?

Мӧдыс шуӧ:

— Дӧвӧлен.

Дедӧ муніс сю доддьӧн, а ош кольччис идзас нетшкыны. Дедӧ сютӧ коркӧ изӧдіс пызьӧ да шобді нянь кодь нянь тӧвбыд сёйис, а ош мульчикаліс кос идзас да вуж, сылы нӧ мый, коньӧрлы. Нямляліс, а пӧльзаыс абу: ньылыштныс оз вермы. Нямлялас, нямлялас, мульчикалас, но кишкатӧ косявлӧ сылӧн. Дерт, прамӧй сёйӧм сылӧн эз нин ло. Сідзик и олісны. Во коли. Дедӧ бара коркӧ лӧсьӧдчис мунны вӧрӧ.

Бара думайтіс:

— А мен эськӧн кӧть вӧрас мунны да сёркни кӧдзны. Вӧчны места вӧрӧ.

Дедӧ ветлӧдліс, ветлӧдліс вӧрӧд, бур места сюри, ньывъя, а сёркнисӧ ньывъя местаӧ кӧдзлывлісны. Вына, сьӧд муа местаыс. И вот кераліс сійӧ вӧрсӧ, кор муыс косьмис шонді водзын, сотіс. Сёркни кӧйдыс лӧсьӧдіс кыськӧ, муніс сёркни кӧдзны. Бара ош сэтчӧ воис дай шуӧ:

— Ок тэ менӧ ёна жӧ ылӧдлін колян во: тэ йывсӧ сёйин, а ме вужсӧ сёйи. Таво ме вужнад ог сӧгласитчы. Ме таво йывсӧ босьта.

Старик шуӧ:

— Мый, ме сӧгласитча. Таво ме вужсӧ сёя, колян во тэ вужсӧ сёйин-а. Сета ме тэныд йывсӧ.

Ош зэв рад лоис.

А сёркни сэтшӧм гырысь артмӧма, юр кодь быдӧн. Коркӧ нетшкисны, зэв радӧсь.

Тшӧтшӧдісны, дедӧ нуис сэтысь сёркни, зэв уна сюрис. Ошлы коли корйыс. Дерт, сійӧ корйӧн ёна эз красуйтчы. А дедӧ нуис да тӧвбыд пӧжӧм пареньча сёйис. Дерт, сійӧ ёна эз мучитчы, уна вӧлі да. Вот и думайтӧ:

— Кыдз эськӧ ещӧ локтан во менам овны?

— Час ме пукта таво капуста.

Бара коркӧ муніс, вӧрыс сійӧ жӧ, гашкӧ, и воддза местасӧ копайтіс зырйӧн. Вужъяс жугӧдіс. Пуктіс сэтчӧ капуста. Ёна старайтіс капустатӧ. Быдмис сійӧ зэв бура, зэв гырыся. Ош тожӧ видзӧдлывны волывлӧ, шуӧ:

— Таво ме йылад ог нин кутчысь. Кык во нин менӧ ылӧдлін. Воддза воас вужсӧ сёйи, тэ йывсӧ сёйин-а. Колян во ме сёйи йывсӧ. Тэ вужсӧ сёйин. Таво ме йылад ог кутчысь. Колян во ёна мучитчи. Таво бара вужъяс кутчыся.

Коркӧ капуста керны ковмис, ар нин лои, пӧкрӧв. Дедӧ локтіс, вӧлӧн-доддьӧн капустала. Кералӧ мачьяссӧ.

А ош локтіс, шуӧ стариклы:

— Миян договор сэтшӧм, таво йывсӧ тэн сёйны. Таво ме ог кутчысь йылад. Тэ колян во менӧ ылӧдлін.

Дедӧ, гашкӧ, и кык додь тыр капуста мач кераліс да гортас нуис. А ош кочерыжкисӧ нетшкис, аслыс гуас нуис. Гу дорас, кӧн сійӧ олӧ, меститіс. Бара старик ылӧдліс ошкӧс.