ЁМА ДА ИЧМОНЬ

Оліс-выліс коркӧ ӧти баба, дӧва вӧлі. И ӧти пи быдтіс. Дерт, деревняын. Пи быдтіс ыджыдӧдз нин. Коркӧ и тшӧктіс сылы гӧтрасьны. Пи сэсся гӧтрасис. А охотник вӧлі пиыс. Частӧ вӧрӧ ветлӧ. Важӧн ӧд ружьеясыд вӧлі дзоляникӧсь. Омӧлик ружьенад паныдасяс ошкӧд. Ошкӧд паныдасяс, ошкыдлы некытчӧ оз имит. Мӧдыд уськӧдчас дай сійӧс и жагляйтас, нӧйтас ёна, пӧшти кувтӧдзыс лоӧ. Локтас, дерт, гортад ловъяӧн на, кыдзкӧ кыссяс, но регыдъя кадӧн кулӧ.

Ичмонь да инька колины кыкӧн. Инька кутіс ненавидитны ичмоньӧс, зэв ёна ненавидитӧ. А кытчӧ воштан? Сы олӧм вылӧ гижӧдӧма. А олӧмтӧ жаль моньыдлы юкны: юкас кӧ олӧмтӧ, джынъялас. Сэтшӧма кутіс ненавидитны. Кывсьыліс, кӧнкӧ пӧ сэтӧні, кӧкъямыс дас кымын верст сайын, кӧнкӧ вӧрын олӧ кутшӧмкӧ Ёма. Коді сы дорӧ веськавлӧма, некод на ловйӧн абу петлӧма. Час жӧ пӧ ме помка пукта да моньтӧ мӧдӧдла сэтчӧ, мед ветлас, сэсь ловйӧн сійӧс оз лэдзны.

А важӧн дӧра вӧлі кыӧны, инькаыс и шуӧ ичмоньыслы:

— Мен эськӧ колӧ кыны пуктыны да бердыс абу. Менам эськӧ аслам вӧлі да чойлы сеті, дай вот эз вай. Тэ он-ӧ ветлы?

Ичмонь, дерт, кывзысьӧ:

— Ветла, мый нӧ ог. Кӧн толькӧ олӧ сійӧ, ог тӧд.

— Ме висьтала тэныд, толькӧ ветлы.

Ичмонь мӧдӧдчис берд корны инька чой ордӧ. Пасьтасис, вӧччис мича кодя, рӧдня ордӧ ӧд кӧсйӧ мунны. Важӧн вӧлі сборник новлӧны, юрас пуктіс сійӧс и мӧдӧдчис.

Инька висьталіс:

— Мун деревня помӧдзыс, деревнясьыс петан, ещӧ мыйтакӧ мун, сэсся шуйгавылас туй кежӧ, сэті тэ кеж и мун. Сійӧ ӧтнас олӧ. Сэтчӧ воан, тэнӧ примитас, висьтась толькӧ, мый тэ менам монь.

Ичмонь мӧдӧдчис мунны. Муніс, муніс дай, ме ог тӧд, уна-ӧ, дума думайтіс ли, мый ли. Вунӧдіс, кытчӧ колӧ мунныд. Деревня помас воис дай горшыс косьмыны кутіс. Медбӧръя керкаыс дзоляник, ляпкыдик, омӧлик.

Час пӧ пыравла да тані шойччышта вӧлӧкас петтӧдз, юышта да пукышта, сэсся вӧлись вӧлӧкас пета.

Сэсся сэтчӧ таркӧдчис, восьтіс, ӧти старука сэтӧні. И юны сійӧ корис. Юктӧдыштісны, шойччыштіс сэн. А старука юалӧ:

— Тэ нӧ кытчӧ мунан?

— Ме муна могӧн, кӧнкӧ пӧ тай вӧрас олысь эм, сійӧ менам инькалӧн чой лоӧ, сы ордӧ бердла муна, кыны кӧсъям да.

Старука и пондіс шуны:

— Сэн ӧд Ёма. Мыйла нӧ тэнӧ сэтчӧ ыстісны?

— Ог тӧд, бердла пӧ тай мун-а. Берд тшӧктіс корны.

— Тэ сэтчӧ эн мун, сэсь ловйӧн некод на эз петав. Ме кӧ ог велӧд, и тэ он пет.

— Велӧд но, кыдз тэ ногӧн.

— Тэ сэтчӧ мунан, а ме тэныд вот сета анькытш, сэсся сета яй.

Сумкаӧ сӧвтіс яй, гашкӧ, кусӧк вит-ӧ-квайт, ме эг вӧв, эг аддзыв.

Сэсся нӧкйӧн нӧкъяліс сир да пуктіс туисӧ. Сетіс сылы ки чышкӧд, зу да зуд.

— Тайӧ ставыс тэныд ковмас. Но мунігад нинӧм эн вошты, локтігкежад видз. Тайӧ ставыс тэныд згӧднӧй лоӧ.

Ичмонь шогӧ воис. Чӧлӧй ноп сӧвтчис, шойччис, да гашкӧ, и войсӧ узьтӧг, а, гашкӧ, и кык лун муніс, ог тӧд. Аддзыліс зэв уна лэбач, но воробейяс, зэв уна кань. Быдӧн зэв спокойнӧйӧсь. Коркӧ Ёмалӧн керка воис. Ёма ордӧ стучитчис. Петаліс кутшӧмкӧ, синсьыс и казяліс, мый тайӧ абу прамӧй, мыйкӧ не тыр ума, абу ёна сюсь нога. Вӧзйысис:

— Мамыд абу гортын?

А лёк кылӧн сёрнитӧ:

— Кыттьӧкӧ муніс. Локтас узьныыд.

Ме гӧститны локті да, виччыся.

Кольччис виччысьны. Недыр пукыштіс да Ёма локтӧ.

— Охо-хо пӧ, кыськӧ талун гӧстя воӧма.

Мыйкӧ абу жӧ прамӧй: юрсиыс лёзь, дӧрӧмыс кок бан вылӧдзыс, сьӧд, кок лапаыс кузь, чуньясыс кузьӧсь, гыжъясыс нэмнас вундавлытӧм, варыш кодь. Уськӧдчис. Нырыс крука, синмыс чайнӧй блюд кодь, паськыд. Кӧть пышйы да некытчӧ пышйыныд.

— Но, локтін кӧ и гӧститам.

Сёянтор лӧсьӧдыштіс, вердыштіс сійӧс да шуӧ:

— Мый, кутшӧм могӧн тэ локтін?

— А менӧ чойыд ыстіс бердла.

— Менам занят. Эштӧд, кы тайӧ дӧрасӧ, сэсся и ну, кор прӧстмас. Но, ладнӧ, вай вод гӧлбӧч вылӧ аслам нывкӧд.

Аслас нылыскӧд водтӧдіс. Ичмонь водіс сэтчӧ, а этія старукаыд эз тшӧкты узьны сылы. Сійӧ и дум вылад уси: «Аттӧ, мен ӧд оз позь унмовсьыныд».

Мыйкӧ полыштныкодь кутіс. А нылыд пыр и унмовсис, сійӧс пыдӧджык водтӧдіс мамыс, а ичмоньтӧ дорӧджык. Сэсся Ёмаыд эз и вод, эз унмовсь. Гӧлбӧчӧ пырис и пондіс пиньсӧ кеслыны: «Гыдж-гыдж, гыдж-гыдж, гыдж-гыдж».

Ичмоньлы страсть босьтіс: «Аттӧ дивӧ пӧ, бур оз ло татӧн. Висьталіс мӧдыд, эз тшӧкты узьны, да час, ме дорланьыс вешта нывсӧ».

Ныв узьӧ, крапитӧ вовсю. Ассьыс юрсьыс сборниктӧ пӧрччис да нылыслы юрас пуктіс, вештіс ас местаас, ачыс пыдӧджык водіс. Ныв эз садьмыв, сэтшӧм крепыда узьӧ. Ёма петіс да ичмонь пыдди юрсӧ первой видлаліс: кодыс сборника, сійӧс и кватитіс. А сійӧ нылыс вӧлі. Гӧлбечӧ гири-люки кыскис, сэтӧні сёйис ли, яй вӧчис ли, ог тӧд.

Асывводз коркӧ чеччисны — ныв абу. Скӧрмис Ёма:

— О-о, тэ, гашкӧ, тадзи кӧсъян китритны? Сё ровно ме дорӧ кӧ воин, он пет. Асыв и тэныд ӧчередь воас, ме тэнӧ виа.

Ичмоньлы зэв страсть.

— Вай талун тэ кы тайӧ кыансӧ, а аски сэсся и, эштас кӧ, мунан, лэдза, эштӧдан кӧ.

Ичмонь пуксис, мыйкӧ сёйыштіс да. Ачыс Ёма бара кытчӧкӧ муніс добыча вылӧ. Кытчӧ ветлӧ, код тӧдас, Ёма Ёма и выим.

Лунтыр ичмонь тэрмасьӧмӧн кыис. Дӧра оз чин ни оз сод. Вӧлӧм кӧлдуйтӧма сійӧ. Видзӧдныс удж вӧчӧма, а оз чин ни оз сод. Лунтыр кыис, нинӧм пӧльза абу.

Бара рытын Ёма воис и шуӧ:

— Ох-хо, тэ тай абу и кыӧмыд. Эн кӧ кы, и берд он ну. Вот, талун узь, аски кы, эштӧд, и нуан.

Скӧрмис сія Ёмаыд. Ичмоньыд зэв ёна полӧ:

— Аттӧ дивӧ, мый нӧ талун лоас, тайӧ нӧ мый?

Ёмаыд гӧлбӧчад пырис, ичмонь эз унмовсь. И пондіс сійӧ петны. Ичмонь думайтӧ:

— Пышъя татысь, сё ровно мен талун бур оз ло.

Дӧратӧ, лэччис да, ножичӧн вундіс, бердтӧ перйис, чышъяннас быдмовтіс, нопсӧ кватитіс дай петны пондіс. Петны пондіс — ӧдзӧсыд оз лэдз. Прамӧ пӧдлалӧ сійӧс, топӧдӧ ӧдзӧс костӧ.

Сійӧ и шуӧ:

— Ӧдзӧсӧй, ӧдзӧсӧй, лэдз менӧ кыдзкӧ!

А ӧдзӧсыс сэтшӧм скрипучӧй, сьӧкыд, горзӧ прамӧ ыджыд гӧлӧсӧн.

— Но, тэнӧ тай некор нин абу мавтлӧмаӧсь, ме тэнӧ мавтышта, лэдз менӧ.

Сійӧ сэсся нӧкъя сирнад ӧдзӧс дзиртӧ мавтыштіс, ӧдзӧс сэтшӧм шывгун кодь лоис и ичмоньӧс эз пӧдлав — лэдзис. Ичмонь кильчӧ вылӧ петіс, мунны пондіс. Муніс, муніс, да каньяс сы вылӧ уськӧдчисны. Сійӧ котӧртӧ, мый вермӧ, но каньясыд оз лэдзны, сылы чужӧмас чеччӧны. Быдӧн косявлісны платтьӧсӧ, авзӧны-горзӧны.

— Каньясӧй, каньясӧй, лэдзӧй менӧ, ме тіянлы яй сета.

Сійӧ яйтӧ налы сетіс нопсьыд. Каньяс яйӧ ылалісны, ичмоньӧс эновтісны. Ичмонь бара котӧрӧн, мый вермӧ, мунӧ. Воис воробейяс дорад. Найӧ синмас прамӧ и пырӧны. Синсӧ перйӧны, кокалӧны быдӧн, вирӧдз нин кокалісны юрсӧ, чужӧмсӧ. И шуӧ:

— Воробейясӧй, воробейясӧй, энӧ менӧ кокалӧ, ме тіянлы анькытш сета.

Вот сійӧ и анькытштӧ налы койыштіс. Найӧ быдӧн анькытшӧ сутшкысисны, кокасьны колины. Сійӧс лэдзисны.

Бара ичмонь водзӧ муніс.

Ёма коркӧ петіс, ичмоньӧс кӧсйӧ гӧлбӧчӧ пыртны. Петіс, малыштіс, ичмонь абу.

— Аха, пышйӧма тай. Сё ровно суӧда. Меысь он на удит.

Видліс — бердыд абу, дӧратӧ вундӧма.

— Час, ме вӧтӧда тэнӧ.

Куим саженьӧн ли, куим метраӧн ли шаг, Ёма мӧдӧдчис вӧтӧдны ичмоньӧс зэв ӧдйӧ. А ичмонь кыдзкӧ шысӧ кыліс сылысь, гашкӧ, Ёмаыс вӧлі ропчитӧ мыйкӧ, шумитӧ, пинясьӧ.

— Аттӧ дивӧ, — ичмонь шуӧ, — Ёмаыд суас менӧ. Мый ме кера? Час ме тайӧ зудсӧ шыбита.

Зудсӧ шыбитіс, бергӧдчыліс, туй вылад сэтшӧм гӧра сувтіс, прамӧ джуджыд.

Ёмаыд воис да шуӧ:

— Аха, ещӧ кутшӧм! Дошлӧй. Видзӧд кутшӧм гӧра лэптіс. Но сё ровно ме вуджа.

Гӧра вывтіыд кайис, кайис, вылӧдзыс нин тӧкӧтьӧ эз удит воны да гольснитіс-уси, быгыльтчис гӧра подулӧдзыс. Сідзи сійӧ кыкысь-куимысь карабкайтчис-кайис гӧра вылӧ. Вуджис ӧд кыдзкӧ. Став силасӧ пуктіс. Пондіс бара ичмоньӧс вӧтӧдны. Ичмонь нӧ сійӧ мый, шагыд ичӧтджык сылӧн. А мӧдыс волшебнӧй силаӧн вӧтӧдӧ. Бара Ёма вӧтӧдӧ.

— Но мый нӧ понда керны? Ӧні нин ме сюра. Вӧтӧдас менӧ, суӧдас. Час ме зутӧ шыбита, щӧтьтӧ.

Бергӧдчыліс да бӧрвылас щӧтьтӧ шыбитіс: сэтшӧм тшӧкыд рас лои. Ачыс бара водзӧ мӧдӧдчис. Ёмаыд воис сэтчӧ, оз вермы прӧйдитны. Бара скӧрмис, шумитӧ сэні:

— Вот тай кутшӧм, потшис менӧ. Но сё ровно, менам пиньясӧй лёка лэчыдӧсь.

И заводитіс водзладорсьыд растӧ пӧрлавны пиньнас. Йирыштӧ, йирыштӧ дай век водзӧ, зэв ӧдйӧ пӧрӧдіс чащатӧ. Прӧйдитіс, бара вӧтӧдӧ зэв ыджыд шагӧн. Ичмонь век на матыстчӧ гортлань. Век на ылын. Бара кыліс:

— Аттӧ, Ёмаыд вӧтӧдӧ менӧ, вӧтӧдас, суӧдас. Мый нӧ мен лоӧ? А час, менам падъянад сир на эм. Ме сійӧс шыбита.

Бергӧдчыліс да сир падъянтӧ шыбитіс бӧрвыв, лои сир ю. Ёмаыд сэтчӧдз воис, сир ю дорӧдзыд, ичмоньыд нин мӧдарас удитіс воныыд.

— Охо, кыдзкӧ тай тэ вуджӧмыд, вай менӧ вуджӧд!

Ичмонь шуӧ:

— Ме тай келі, вай тэ кев жӧ.

— Ог, эн ылӧдлы, тэ тай зэв китрӧй. Вай вуджӧд менӧ.

— Вуджи ме, ки чышкӧдсӧ шыбиті да, та вывті вуджи.

Нопйысь кыскис бара старукаыдлысь сетӧм ки чышкӧдтӧ да нюжӧдіс сир ю вомӧныд. Мойд, мойд и эм, кыдзкӧ тай сир ю вомӧныс судзис. Мӧдыд, Ёмаыд, уськӧдчис ки чышкӧд вылад и сир юад и вӧйи.

Сэсся ичмонь воис гортӧ, берд вайис, инькалы сетіс. А инькалы нинӧм оз ков, пондіс шумитны.

— Видзӧд, морт на эз петав, а тайӧ ловйӧн петіс кыдзкӧ мыйкӧ. А ичмонь пондіс шуны:

— Ме тэкӧд ог ов.

Сэсся олӧмсӧ быдӧн юкисны шӧри пӧв и ӧні олӧны торйӧн. Гашкӧ, пӧрысьыс кулі, а томыс и ӧні на ловъя.