ИВАН ДУРАК

Олӧ-вылӧ вӧлі крестьянин. Крестьянинлӧн вӧлі куим пи. Ӧтиыс Гриша, мӧдыс Миша, коймӧдыс Иван.

Олісны-вылісны дыркодь нин. Гриша да Миша гӧтрасисны, а Иван оз гӧтрась. Коркӧ-некоркӧ налӧн батьныс висьмис. Дыркодь висис да коркӧ-некоркӧ и кувны пондіс. Кувтӧдзыс корис ас дінас пиянсӧ.

— Кула да, — шуӧ, — медводз войсӧ гу дорын видзны Гришалы, мӧдсӧ Мишалы, а коймӧд войсӧ — Иван Дураклы.

Кувсис бать. Дзебисны. Гришалы колӧ мунны батьыс гу вылӧ. А сійӧ оз мун, ыстӧ Иван Дуракӧс.

— Сета, — шуӧ, — вит шайт деньга. Мун ветлы.

Воис Ваняыд бать гу вылӧ. Вой шӧр войнас бать шыӧдчис гусяньыс:

— Коді, — шуас, — тані?

— Ме, — шуас Иван Дурак, — ме.

— Вот тэд таысь зарни щӧть зарни порсьлысь.

Иван воас гортӧ да висьталас вокъяслы: батьным пӧ тай зэв чуднӧй вӧлӧма.

Мӧд вой воис, колӧ Мишалы мӧдны. Миша эз жӧ мун, ыстіс Иванӧс, сетіс дас шайт.

Муніс Иван гу вылӧ, дас кык часын бара батьыс гусянь шыасис.

— Вот, — шуӧ, — тэд таысь зарни си зарни кӧрлысь.

Воис Иван гортӧ и висьталӧ вокъяслы: ещӧ на пӧ батьыд страшнӧй петкӧдчыліс.

Коймӧд войнас аслас ӧчередь мунны. Муніс Иван, пуксис гу дорӧ. Вой шӧрын бара шыасис батьыс:

— Вот, — шуӧ, — тэд Сивко-Бурко. Кор ковмас, чукӧст:

«Сивко-Бурко, стань передо мной, как лист перед травой».

Иван чукӧстас вӧвсӧ, веськыд пельӧдыс пырас, шуйга пельӧдыс петас — сэтшӧм лоӧ мича, мӧд морт сэтшӧмыс абу, а сэсся шуйга пельӧдыс пырас, веськыд пельӧдыс петас — важ кодьыс жӧ лоӧ.

Коркӧ-некоркӧ, мойд висьтавсьӧ ӧдйӧ, а вой-лун дыр кольӧ, кутіс кывсьыны, мый Елена Прекрасная кӧсйӧ мунны верӧс сайӧ. Коді пӧ вермас чеччыштны керка дас кыкӧд судтаӧдз, сылы Елена Прекрасная и лоас гӧтырӧн.

Кык вок кутісны лӧсьӧдчыны, картаысь вӧвъяс босьтісны и мунісны. Иван Дурак дыр эз думайт, корис моньясыслысь чуман — ме пӧ тшак вотны ветла. Мунас гортсьыс неылӧ, горӧдас:

— Сивко-Бурко, стань передо мной, как лист перед травой.

Сивко-Бурко локтіс, вӧлӧс Иван кутіс, веськыд пельӧд пырис, шуйга пельӧд петіс: сэтшӧм добрӧй молодечыс некӧн абу. Вӧв вылӧ пуксис, кучкис-вартіс, коркӧ вокъяссӧ и суис. И кыкнанныслы ӧтчыдысьӧн пель боканыс кучкис, водзӧ гӧнитіс да сувтлытӧг нёль судтаӧдз чеччыштіс.

Сэн горзӧны:

— Кутӧй, кутӧй, кутӧй!

А кысь сійӧс кутан! Бӧр воис горт дорас, шуйга пельӧд пырис, веськыд пельӧд петіс, важ кодьыс лоис.

Тшак чуман босьтіс и гортас воис. Гортас воис и паччӧрӧ кайис.

Воисны и вокъяс гортӧ, висьталӧны: вот сідз и сідз, вӧла ордйис миянӧс и пель боканым кучкис.

Эг-ӧ пӧ ме вӧв, шуӧ Иван.

Зырым бедь пӧ тэ, чӧв ов, кысь пӧ тэд татшӧм вӧлыс да татшӧм паськӧмыс?

Узисны да асывнас вокъяс бара медбур вӧвъяссӧ картасьыс босьтісны,

Иван Дурак куйлыштіс паччӧр вылын, сэсся лэччис да бара корис моньясыслысь чуман: ме пӧ ветла тшак вотны. Муніс, тшак вотыштіс и бара чукӧстіс:

— Сивко-Бурко, стань передо мной, как лист перед травой.

Сивко-Бурко воис, Иван веськыд пельӧд пырис, шуйга пельӧд петіс и сэтшӧм жӧ бара лои добрӧй молодеч. Пуксис вӧв вылӧ, скачитіс, скачитіс, бара вокъясӧс суис — кыкысьӧн плешкас кучкас. Бара скачитіс да кӧкъямысӧд судтаӧдз чеччыштіс. Бара горзыны кутісны:

— Кутӧй, кутӧй!

Да кысь кутан — бӧр гӧнитіс. Воис сэтчӧ, кытчӧ тшак чумантӧ кольліс, босьтіс сійӧс и гортӧ воис.

Коркӧ и вокъяс воисны гортӧ, висьтасьӧны: бара пӧ воліс вӧла, миянлы бара пель боканым кучкис. А эг-ӧ пӧ ме вӧв?

— А мун, — шуасны, — тэ, зырым бедь, кысь тэд татшӧм вӧвъясыс?

Коймӧд лунӧ вокъяс бара сувтісны, вӧвъясӧс босьтісны картаысь и бара мӧдісны.

А Иван чеччис паччӧрысь да моньясыслысь бара чуман корис — тшак вотны. Мыйӧн ӧктыштіс, бара Сивко-Буркоӧс корис. Сивко-Бурко локтіс. Иваныд веськыд пельӧдыс пырис, шуйга пельӧдыс петіс и бара лои добрӧй молодеч. Бара вокъястӧ суас да коймӧдысьӧн кучкис. Саревна керка дінӧ воис да дас кык судтаӧдз чеччыштіс.

Елена Прекрасная окаліс сійӧс и зарни чунькытш сетіс Иван Дураклы.

Бара гӧнитіс сэсь. «Кутӧй, кутӧй!» — горзӧны, да кысь кутан!

Воис гортӧ, кайис паччӧрӧ, чунькытша чуньсӧ гартіс рузумӧн. Чунькытшыс югыд, дзирдалӧ — да мед оз тыдав.

Елена Прекраснаялӧн батьыс сетіс приказ: мед став мужичӧйыс локтасны сарскӧй дворӧ. Став мужичӧй мунісны свадьба вылӧ, а Иван Дурак паччӧрӧ коли.

А жӧникпуыс оз сюр: ветліс, ветліс Елена Прекрасная, а некод зарни чунькытш оз пукты сылы стӧканас. Кутасны юасьны: эз-ӧ пӧ кодкӧ мужичӧй коль гортас. А вокъясыс Иван Дураклӧн шуӧны: миян пӧ коли паччӧрын Иван-дурачок.

Пыр жӧ вӧвъяс доддяласны и гӧнитасны Иван Дуракла. Воасны, да моньясыс садьтӧг повзясны: миян верӧсъяс пӧ сэтчӧ мунісны да мыйкӧ лёктор вӧчӧмаӧсь. Воысьяс пырисны керкаӧ, Иван Дуракӧс кыскисны паччӧрсьыс, пуксьӧдісны телегаӧ и бӧр гӧнитісны. Пир вылӧ пыртісны Иван Дуракӧс, вина стӧкан сетісны, и Иван Дурак зарни чунькытшсӧ стӧканас пуктіс. Елена Прекрасная повзискодь, а сэсся шуӧ — вот пӧ кутшӧм менам судьбаӧй. Иван Дуракӧс пыр жӧ мыссьӧдісны, пуксьӧдісны пызан сайӧ и кутісны пируйтны.

А Елена Прекраснаяыслӧн вӧлі кык чой, кыкнанныс верӧс сайынӧсь. Чойясыс и кутісны серавны Елена Прекрасная вылын: татшӧм йӧй сайӧ пӧ мунӧма, медсяма чой вӧлі да.

Иван гозъялы сетісны бокӧвӧй керка, сэн найӧ и овмӧдчисны. А чойясыс зятьясыскӧд олісны бур керкаас.

Коркӧ-некоркӧ сар шуас зятьяслы: коді пӧ ваяс зарни сюра кӧрӧс, сылы сарстволысь нёльӧд пай сета.

Кык зять и мӧдісны, медбур вӧвъяссӧ босьтісны да. Иван Дурак тшӧктіс корны гӧтырыслы вӧв — кӧсйӧ жӧ мунны. Сарыд эськӧ эз кӧсйы сетны, да сетіс жӧ омӧлик, ва кыскалан вӧвсӧ. Иван Дурак пуксис вӧв вылӧ и мӧдіс. Неылӧ муніс да вӧвсӧ бӧжӧдыс нетшыштіс, да вӧлыс и куліс. Катша-ракалы шуӧ: яйсӧ пӧ сёйӧ, а кусӧ мем кольӧ. Сивко-Буркоӧс корис, Сивко-Бурко воис, веськыд пеляс пырис, шуйга пельӧдыс петіс, бара добрӧй молодеч лои.

Свӧякъяс сылӧн ветлісны, ветлісны, а зарни сюра кӧрӧс эз и аддзывны. А Иван Дурак Сивко-Бурко вылад регыд и кутіс сійӧс. Локтӧ нин гортӧ; поле вылӧ воис да шатер зэвтіс, а вӧвсӧ и кӧрсӧ неылӧ домис.

Свӧякъясыд сэтчӧ жӧ воасны, аддзасны шатертӧ, пырасны. Аддзасны добрӧй молодечтӧ, а оз тӧдны, мый сійӧ Иван Дурак. Кутасны корны сылысь: вай, шуасны, вузав миянлы зарни сюра кӧртӧ, ми пӧ деньга сы вылӧ мыйтӧм колӧ сетам. А Иваныд шуӧ: деньгаыд пӧ мем оз ков, деньгаыд пӧ менам аслам уна эм.

— А мый вылӧ эськӧ вузалан? — юалӧны.

— Вайӧ, — шуӧ, — чаль чуньястӧ коксьыд кыкнанныд вундӧ, сэк ме тіянлы зарни сюра кӧртӧ сета.

Свӧякъясыд дыр оз думайтны — чаль чуньястӧ и вундасны да сетасны Иванлы. И гортӧ бӧр мӧдасны. Воасны гортӧ и висьтасьӧны: кутім пӧ кӧртӧ. Сьӧкыд пӧ эськӧ вӧлі, да кутім.

А Иван Дурак воас кар помӧ, Сивко-Буркоӧс лэдзас и сэтшӧм жӧ дурак лоӧ, кутшӧм вӧлі.

Зятьяс ошйысьӧны, а чойяс Елена Прекраснаялӧн шуӧны — тэ пӧ зэв шань вӧлін, а тайӧ верӧсыдкӧд немортӧн лоин. Иванлӧн гӧтырыд и шогӧ уси.

Коркӧ-некоркӧ сар бара сетӧ приказ: код пӧ кутас зарни тшӧтя порсьӧс, сылы государство джынӧс сета.

Бара зятьяс мӧдасны, медбур вӧвъяссӧ босьтасны да, А Иван Дурак босьтіс кляча вӧв, пуксис бӧр вылас и бара мӧдіс кар вывті. Кар помӧ воис, бара кӧбылаӧс лэдзис, рака-катшалы колис: яйсӧ, шуӧ, сёйӧ, кусӧ кольӧ. Ачыс Сивко-Буркоӧс корис. Сивко-Бурко воис. Иваныд веськыд пеляс пырис, шуйга пельӧдыс петіс, и сэтшӧм добрӧй молодеч лои! Вӧв вылӧ пуксис и бара скачитіс.

Свӧякъяс ветлісны, ветлісны, бара некысь нем эз аддзыны. А Иван Дурак бара регыдӧн и кутіс зарни тшӧтя порсьтӧ. Бара сідз жӧ воисны шатер дінӧ свӧякъяс и кутісны корны вузавны зарни тшӧтя порсьӧс. Ми, шуӧны, деньгатӧ мыйта колӧ сетам. А мем, шуӧ Иван, деньгаыд оз ков, менам пӧ аслам эм. А мый вылӧ нӧ пӧ эськӧ тэ сетан? А вай пӧ вундӧй водз чуньястӧ, сэк пӧ и сета.

Зятьяс дыр оз думайтны — водз чуньяс вундасны дай сетасны Иванлы. А Иван найӧс тупляліс бумага пытшкӧ дай зептас сюйис, а зарни тшӧтя порсьӧс сетіс.

Воисны зятьяс гортӧ, ошйысьӧны: ми пӧ зарни тшӧтя порсьӧс вайим.

А Иваныд сійӧ кар помӧ воис, вӧвлы шуйга пеляс пырис, веськыдӧдыс петіс и важ кодь Иван лои. Коркӧ-некоркӧ сар бара приказ сетіс: коді пӧ ваяс дас кык чаня кӧбылаӧс, сылы ставнас государствосӧ сета, сійӧс сарӧн пукта и лоас сійӧ тан полнӧй кӧзяинӧн.

Бара зятьяс босьтісны бур вӧвъяссӧ и мӧдісны. А Иван Дурак лёкиник вӧв босьтіс, бӧрвылас пуксис да и кар вывті мӧдіс. Кар помӧ воис, вӧлӧс лэдзис, катша-ракалы колис: яйсӧ пӧ сёйӧ, а кусӧ кольӧ. Сивко-Буркоӧс чукӧстіс, сійӧ пыр и воис.

— Кутшӧм, — шуӧ вӧлыс, — сетісны тэд задание, кӧзяин?

— Вот сэтшӧм задание, — шуӧ, — сетісны — дас кык чаня кӧбылаӧс вайӧдны.

— А тайӧ, — шуӧ, — сьӧкыд лоӧ.

Вӧлыс велӧдіс да, Иван Дурак куимнан вӧлыслысь куяссӧ пуктіс Сивко-Бурко вылӧ, пуксис дай мӧдӧдчис. Аддзис дас кык чаня кӧбылатӧ. А сійӧ уськӧдчис Сивко-Бурко вылад, курччалӧ сійӧс да чужъялӧ. Ӧти ку и лёздіс. Тышкасисны, тышкасисны вӧвъясыд да мӧд ку Сивко-Бурко вылысь лёздіс — гӧняйтісны, гӧняйтісны дай коймӧд ку лёздіс. Сэсся кӧбылаыд мудзис дай шуӧ: ло пӧ выль кӧзяинӧн, сетчис.

Иван Дурак бара шатерӧ муніс. А свӧякъяс корсисны, корсисны, нинӧм налы эз сюр да сэтчӧ жӧ воисны. Иван шойччӧ шатерын, свӧякъяс бара пырисны сэтчӧ, оз тӧдны Иванӧс да шуӧны: вай пӧ вузав дас кык чаня кӧбылатӧ. Деньга пӧ сетам мыйта оз ков.

— Оз ков, — шуӧ Иван, — мем деньгаыд, менам аслам деньгаыд уна.

— А мый вылӧ нӧ эськӧ вузалан? — юалӧны.

— А вузала со мый вылӧ. Вайӧ мышкуяссьыныд кык чунь пасьта кучикнытӧ, сэк и сета дас кык чаня кӧбылатӧ.

Зятьяс дыр эз думайтны — кулисны ӧта-мӧдыслысь мышъяссьыс кучиксӧ кык чунь пасьтаӧн и сетісны Иванлы. Босьтісны дас кык чаня кӧбылатӧ дай воисны карӧ.

Зятьяс ошйысьӧны, а чойяс сералӧны Иван Дурак гӧтыр вылын. А Елена Прекрасная быттьӧ нинӧм оз казяв, видсӧ оз сет.

Коркӧ Иван воис кар помӧ, вӧвсӧ лэдзис, шуйга пельӧд пырис, веськыд пельӧд петіс и важ кодь Иван Дурак лоис.

А сарлӧн кык зятьыс бурӧсь, и кодсӧ пуктыны ас местаӧ — оз тӧд сарыд. Аскинас чукӧртіс кар вывсьыс став йӧзсӧ, мед пӧ найӧ бӧръясны.

Воисны пир вылӧ став карсьыс йӧзыс. Иван Дурак петіс ывла вылӧ да чукӧстіс ассьыс вӧвсӧ, Сивко-Буркосӧ. Веськыд пельӧд пырис, шуйга пельӧд петіс и ён багатыр лои. Пырис пир вылад да сарлысь юалӧ: мыйла пӧ тэнад зятьясыд перчаткиаӧсь? Мед пӧ пӧрччасны. Зятьясыд эськӧ оз кӧсйыны, да сарыд тшӧктас. Пӧрччасны перчаткиястӧ, а налӧн чуньясыд абуӧсь!

А Иваныд перъяс зепсьыд бумагаястӧ и петкӧдлас, ӧтиысь восьтас — чаль чуньяс: тайӧ пӧ зарни сюра кӧр; мӧдлаысь восьтас — пев чуньяс: тайӧ пӧ зарни тшӧтя порсь. Сэсся ещӧ ӧти бумага восьтас: а тайӧ пӧ дас кык чаня кӧбыла. Видзӧдлӧй пӧ зятьясыдлы мышканыс. Видзӧдласны да сідз и эм: кучикъясыс мышкусьыныс.

Сарыд сэсся юаліс Иванлысь: мый пӧ накӧд вӧчам ылӧдчӧмсьыс?

Иван Дурак шуас:

— Пир вылысь вӧтлыны, бур керкаысь вӧтлыны, мед овмӧдчасны бокӧвӧй керкаын.

Сэсся Иван Дуракыд пируйтны сэн кутас. Сар пуктас сійӧс ас местаӧ. Видзӧд, кытчӧдз воис мортыс. Гашкӧ, ӧні на сарствуйтӧ.