ВЕСЬТ КУЗЯ МОРТ ДА НЫВ

Олісны-вылісны старик гозъя. Налӧн вӧлі кык ныв. Старик любитіс ӧтисӧ, старука — мӧдсӧ. Старукаыд и шуӧ старикыдлы:

— Босьт ассьыд нывтӧ, катӧд давйӧ.

Старик катӧдас, вӧр керкаӧ коляс и сылы скӧт коляс: петук да, кань да, шыр. Нылыд нянь шонтыны пачӧ сюяс и рок пуны сюяс, и кутас батьсӧ виччысьны. Батьыд дыр оз лок, и нылыд батьтӧ кутас чуксавны:

— Батьӧ, лок нин!

Кодкӧ сылы шуас:

— Локта, нылӧ, локта, ме ачым весьт кузя, зырымӧй бедь кузя, нопйӧй гид ыджда!

Пырас и шуас:

— Нопйӧс нӧ кытчӧ ректа?

Нылыд шуас:

— Гӧбӧчӧ.

Сэсся пуксясны сёйны. Пӧсь нянь сёясны и рок. Рокнад нылыд вердас и каньтӧ, и петуктӧ, и шыртӧ. Сёйӧм бӧрас водасны узьны. Ныв водас гӧбӧч вылад, а локтысьыд водас пӧлать дорад. Войнас шыр котӧртас ныв дінӧ и шуас:

— Ас местаад сьӧлышт, а ачыд вешйы.

Ныв сьӧлыштас и вешъяс. Войнад чеччас локтысьыд и кутас корсьны нывтӧ. Корсяс-корсяс, каньлы инмас кырымыд, каньыд курччас. Петуклы инмас, петук горӧдас:

— Кикируку!

Локтысьыд повзяс, ӧдйӧджык пышъяс. Аскинас ныв чеччас, гӧбӧчӧ пырас, а гӧбӧч тырыс деньга. Сэсся батьыс локтас, деньгасӧ чӧлӧй додь тэчасны и гортас нуасны.

Аскинас старука тшӧктӧ ассьыс нывсӧ катӧдны сэтчӧ жӧ. Старик катӧдас, нывтӧ коляс. Нылыд виччысяс-виччысяс и ӧтнас роктӧ сёяс; каньтӧ ни, петуктӧ ни, шыртӧ оз верд. Войнас локтас весьт кузя морт и водас узьны. Ныв водас гӧбӧч вылӧ, а весьт кузя морт — пӧлатьӧ. Войнас весьт кузя морт чеччас, нывтӧ босьтас и сылысь нёньтӧ сёяс. Аскинас садьмасны, и нылыд кутас бӧрдны, а весьт кузя мортыд шуӧ:

— Ме чайті нёньтӧ шобді няньӧн и сёйи!

Рытнас бара водасны. Войнас чеччас весьт кузя мортыд и сёяс нывтӧ, лыяссӧ ӧшинь вылас сувтӧдас.

Аскинас батьыс локтас, нывлысь лысӧ мешӧкӧ тэчас и гортас нуас. Старука аддзас лыяссӧ и кутас бӧрдны.