НАЛӦН ГРӦЗЛУН МИЯНӦС ОЗ ПОВЗЬӦД


Ме пӧрччи ассьым фронтӧвӧй погонъяс
Да пукси вына трактор вылӧ бӧр,
Мед гӧрны джуджыд керӧсъяс да сёнъяс,
Мед бӧрыньтны ва нюръяс, пемыд вӧр.

И менӧ тані чолӧмалӧ ставыс,
И шондіыс тшӧтш ассьыс зарни зэр
Мен сой кызтаӧс кисьтӧ. И душалы
Сідз кокни тан, мый мудзлунӧс ог тӧд.

Ми гӧрам му и сьӧлӧм бердын видзам,
Кыдз драгоценность, сӧмын ӧти мӧвп —
Кыдз быдтыны тан шобді, кодлӧн идза
Дзик пев кызта и вайӧ пудъя шеп.

Став думъяс миян мичаммӧдны олӧм,
Мед шудӧн вӧлі быгъя, кыдзи сур.
И медым курыд синва сыысь поліс,
И некодыр нужда эз кыпӧд юр.

А эстӧні, мӧд светас, кыла, бара
Виж дьявӧллӧн шакалъяс, тӧдтӧг ун,
Выль бомбаясӧн грӧзитчӧны яра
И кӧсйӧны бӧр торкны мирнӧй лун.

Ми помнитам победнӧй сійӧ восӧ,
Штурмуйтім кор ми вражескӧй Берлин.
Кыдз найӧ, ми эг воӧй сэтчӧ форсӧн,
И бушковсӧ эз найӧ — венім ми.

И налӧн грӧзлун миянӧс оз повзьӧд, —
Спокойнӧй ло, колхознӧй паськыд му:
Войналӧн гидра ассьыс юр оз ловзьӧд, —
Эг весь ме танкӧн Эльба дорӧдз мун!

И сійӧ шобді, кодӧс кӧсъям, каяс,
Янтарнӧй море гызяс сылӧн тан,
И аскӧдыс выль тулыс сійӧ ваяс,
И торкас сійӧ вражескӧй став план!

1949 во.