ПОРТНӦЙ


Ӧшинь пыр мен мастерскӧйӧ
Тополь нюжӧдӧ веж сыв.
Шонді зарни югӧр койӧ.
Интереснӧй пырис ныв.
Пырис ме дорӧ и корӧ
Аслыс вурны выль пальто,
Кутшӧм абу ньӧти нывлӧн,
И кык лун мен сетӧ срок.

Ми, портнӧйяс, вывті радӧсь,
Дасьӧсь вурны любӧй кадӧ
Кӧть мед кутшӧмтор.
— Уджалам народлы, нылан.
Дерт жӧ, вурам кӧ нин, бура
Вурам любӧйтор!

Делӧ срочнӧй — мый нӧ вӧчан?!
Нывлы вури ме пальто.
Вури мичаа и стӧча,
Йӧз сэн ошкӧны быдног:
«Тадз оз вур тэн ыджыд карын
Медся моднӧй ателье.
Вурысьын — поэтлӧн сьӧлӧм,
Ставнад песня лоин тэ!..»

Ныв сэк топӧдлыштіс киӧс,
Но мый виччыси, эз шу.
Сьӧлӧм сотыштіс пӧсь биӧн,
Вошті кок улысь став му.
Шуа: «Ёртъяс, мый нӧ тайӧ?
Али вурны сям эз пет?..»
Видзӧда, а ныв мен вайӧ
Ловъя цветъясысь букет.

Ми, портнӧйяс, вывті радӧсь.
Дасьӧсь вурны любӧй кадӧ
Кӧть мед кутшӧмтор.
— Уджалам народлы, нылан.
Дерт жӧ, вурам кӧ нин, бура
Вурам любӧйтор!

1949 во.