СЕТ ЖӦ МЕНЫМ ВАЙ АССЬЫД ТЭ КИ


Зарни кыаыс ӧзйис, кыдз би,
Лӧня шӧпкисны кудриа кыдзьяс.
Нӧрыс йывті сэк гуляйтім ми,
Кыкӧн видзӧдім мӧдлапӧв видзьяс.

Тувсов югӧрӧн киськалӧм му
Ставнас кажитчис миянлы мойдӧн.
Кӧсйи шуны «эн мун», но эг шу.
Менам сьӧлӧм жӧ ёнджыка доймис.

Куим во сійӧс новлӧдлі ме,
Сійӧ дойсӧ, и войтырысь дзеби.
И со ме водзын сулалан тэ,
Кыдзи сьыланкыв — сынӧдті лэбысь.

Тэ — наукаӧн ӧні зэв ён,
А ме ӧтувъя овмӧсын шуда.
Видза олан, выль, том агроном,
Примит аслад землякъяслысь уджъяс.

Тэкӧд миян дзик ӧти девиз —
Шуда олӧмсӧ мичмӧдны водзӧ.
Сет жӧ меным вай ассьыд тэ ки,
Менам сьӧлӧмлӧн дзирдалан кодзув!

1954 во.