ЧУВАШКА


— Ме чувашка, — меным шуис
Ляга дорын ӧти ныв.
Керъяс йӧтлаліс и пуис
Сылӧн киыс — мудз эз кыв.

Ляга ичӧтик, но тэрыб,
Багыртӧ сэн кут да кут!
Ой, оз радейт юыс нэрӧс, — 
Муртса ылалан — капут.

Керйыд вомӧнасяс, сэки
Потшас тэнсьыд ичӧт ю.
И заторсӧ друг он нетшышт,
Водзӧ моль бӧжтӧ он ну.

А сьӧд синма тайӧ нылыс,
Коді вӧсни, кыдзи гум,
Керъяс йӧтлалӧ да сьылӧ,
Быттьӧ гожся мича лун.

— Ме чувашка, — сійӧ шуӧ, — 
Ыджыд Волга бокысь ныв,
И Печора бердса муӧ
Локті эг куш песны сыв.

Лоас тан Печорскӧй море,
Колӧ весавны став вӧр.
Ыджыд сьӧлӧм сійӧ корӧ,
Сійӧ эм, и ки оз дзӧр.

Ляга ичӧтик, но тэрыб,
Багыртӧ сэн кут да кут.
Ой, оз радейт юыс нэрӧс, — 
Муртса ылалан — капут.

А сьӧд синма тайӧ нылыс,
Коді вӧсни, кыдзи гум,
Керъяс йӧтлалӧ да сьылӧ,
Ӧзйӧ вом доръясас нюм!

1963 во.