МЫЛВА БЕРЕГЫН


Мылва берегын тӧвкӧд
Шувгӧ джуджыд, веж коз.
Вася Юдин сэн нывкӧд
Вотліс уна гӧрд оз.
Сійӧ радейтліс нывсӧ,
Муса вӧліс том ныв,
Но эз тэрмӧдлыв кывсӧ
Шуны «радейта» кыв.

Вася кӧсйис, мед югыд
Вӧліс олӧмыс тан;
Медым еджыд и мугыд
Радліс войтырлӧн бан.
Буретш та вӧсна сійӧ,
Кодыр гымыштіс гым,
Вӧвсӧ тэрмӧдліс биӧ:
Вӧлі сьӧлӧмыс пым.

Лӧз Печора ю бердын
Сӧмын лым да сьӧд вӧр.
Орис гӧрдъяслӧн ордым,
Лоис вир вӧсна гӧрд.
Штыкӧн затшйӧдлӧм Вася
Помӧдз нуӧдіс кось,
Усис мезд вӧсна тышын, — 
Мездсӧ вӧрӧг оз босьт!

Вася радейтіс олӧм,
Ассьыс мылдінса ныв,
Сӧмын сы водзын поліс
Шуны «радейта» кыв.
Поліс нылысь, а бойын...
Лоліс вӧрӧглы жар.
Вася Юдинлы вӧліс
Сэки дас сизим ар.

1963 во.