КОМИ МУЖИКЛӦН «ЧАЧА»


Семён Налимов * — коми столяр да важ плӧтник —
Чер босьтіс, вайис коз да триньган вӧчис сэсь.
— Вот мужикыд, вын ассьыс видзӧ кытчӧ весь! —
Сы вылӧ шензисны. — Кӧть тӧлкаӧн ло ӧтчыд!..

А сылы тӧлк «эз ков», — струнаяс зэвтіс сэтчӧ,
И сьывны кутіс сылы вӧрса пӧрысь коз.
Эз кыдзикӧ, а тувсов, садьмӧм ывла моз,
И кажитчис, став мирыс радліг сылы ӧвтчис.

— Вот дивӧыд! И сьылӧ? Мыйся тайӧ чача? —
Эз тӧдны пемыд йӧз. А кӧнкӧ оліс морт
И корсис плӧтниклысь, кӧть ылын вӧліс горт,
И «чачалы», мед сьыліс, сетіс ыджыд лача.

Дзор плӧтник куліс нин, а си гудӧкыс пыр
Му вылын олӧ — ловъя, шензьӧдӧ став мир!

1969



* С. Ив. Налимов — Сыктывдін Вильгортса си гудӧк вӧчысь ыджыд мастер. Сылӧн си гудӧкъяс, кодъясӧс сійӧ вӧчавліс виртуоз-балалаечник В. В. Андреевлӧн оркестрлы, Парижын Всемирнӧй выставка вылын завоюйтісны зарни медаль. Ӧні сылӧн си гудӧкъяс донъявсьӧны Страдивариуслӧн скрипкаяс моз. Налимовлысь кык си гудӧк видзӧ Москваын ӧнія виртуоз-балалаечник Е. Г. Авксентьев. Тайӧ балалайкаяснас сійӧ ворсіс Европаын, США-ын, Латинскӧй Америкаын, Австралияын, Индонезияын, Японияын.