ЗАКАР ОРДЫНПыддипуктантор Кӧч Закар, Пач тэчысь, зэв ньӧбасис Асывбыд. Сись, тшайтор, сакар Питшӧгъясас нӧбаліс. Кежліс сутш морт кабак дінӧ, Рӧчалыштіс ӧшиньсӧ, Кыскис сэтысь парта вина… Тарыт гортас виччысьӧ Зэв бур гӧсьтъясӧс Кӧч Закар! Локны кӧсйис Ошпи Макар, Комын ошкӧс чергӧдысь, А — кань куын ветлӧдлысь; Локтас Кась Вась, нинкӧм кыысь, Кодлӧн мывкыд ӧти шыысь Тӧдчӧ, вежӧр — кыв джынйысь. Локтас Руч Вань, вурун летысь, Локтас Пыш Тош Спиридон, Кодлы абу, вокӧ, дон, Бур кыв, бурдан турун сетысь; Локтас авъя Митрӧпан, Кызь во вичко видзысь тан; Локтас Петрӧ Ӧльӧш Герман, Кодлӧн мӧд ним «Сьӧкыд Чиг», Кодӧс беддьӧн кыскасиг, Кӧть и дзор нин, сӧмын верман Кыскыны, кор лэптыштас Сайӧдыс бур пӧч, код сыкӧд Гильӧдчывліс томлуннас. Локтас Кельчипи Тарас, Коді олӧ юкӧд, тыкӧд Куль моз, кодлӧн чери сьӧм Ӧтторъя пыр кутчысьӧм Ныр-вомас, а ачыс некор Эз на ректыв юква бекар. Локтас Поп Педь (абу поп, Абу-й поп пи; бедь да ноп Поплысь бӧрсьыс новлӧдлывлӧ, Ныр сы пыдди лэптавлывлӧ!) Локтас Беддя Еремей, Дзор и тшап, кыдз аркирей, Кодлӧн кулан кадыс мунӧм, Кодӧс кулӧмыслӧн вунӧм Босьтны сэк — и олӧ морт, Кыдзи войтыр костын орт, Шенӧдлас, а лёк оз вӧчлы! Локтас Митрей, йитлалысь Чӧс туй вылын гӧрӧд кӧчлы, Полысьджык на кӧчьясысь; Кӧть и ышман вӧліс быдмиг, Жугӧдісны вояс лыдмиг! Локтас Сопрон, кос и жеб, А сюзь синсьыс ем он дзеб, И кор сурсӧ юиг вӧяс, Кӧшлысь пыдӧс чуктӧдас, Ӧд и сурӧ он вӧйт йӧйӧс! Енлы ӧктысь волывлас Татчӧ, еннога Гервасей, Локтас омӧлиньдзик Ласей, Коді быдся керкаӧ Пес поткӧдлӧ, ва новлӧ… Локтас Микаль, коді уна Керка-карта сувтӧдіс Озыръяслы — й-кулӧмыс Кытчӧдз асьсӧ тай оз су на, Унаӧс на колльӧдас Киподувса гортъясас… Дзугыль Микаль медся колан, Кодыр кулан и кор олан! Быд бур йӧзыс локтасны, «Марин! Сисьтӧ ӧзтыны Регыд тшӧкты пызан вылӧ! Матынӧсь бур войтыр, кылӧ». Сідзи-й эм. И пырисны, Кепысь-шапка пукталісны Джаджйӧ, сэсся пернапас Пӧрысь гӧсьтъяс чӧвталісны, Вешталісны юрсияс, Кодлӧн юрси кольыштіс на, Синъяс вывсьыс, — кодлысь юр Вуштӧм арлыд, кӧть эз сюр Нем, а инмӧдчис на Сійӧ кинас важ ног, кӧн Быдмис юрси гӧгыльӧн; Та бӧр найӧ копыртчисны Закара-Мариналы, — Кывтлы, кӧтшаслы и пачлы, Понма-каньлы, ӧшӧм гачлы — Вина парта, сулавлы, Мед на копыртчисны сылы! Церемонья помавмысь Пуксялісны. — Сёрниысь Пыр нин нянь-турунӧн кылӧ, Сэні-й Мӧскуакӧд Луз, Сэні-й поп-дяккӧд прансуз. Со и локтӧ пызан вылӧ Ачыс вина, сэсся тшай. Тшайыс бӧрын бара вина; Вина бӧрас нянь-сов, яй; Яй бӧр бара тшайыс дінӧ… Бахус! Лолыд радлӧ оз? Коді юӧ найӧ моз? Войдӧрлун на — тӧрыт — талун — Ӧнтай на тай — вӧліс налӧн Аддзысьлӧм; — сэк нинӧм дзик Морта-мортыслы эз шуны… Водзӧ вӧлі колӧ мунны — Янсӧдчисны регыдджык! Сэк ас удж, ас интересъяс, Кыдзи лӧ……… бесъяс, ……………………….. ……………………….. Морта-мортӧн ошйысьӧны, Бурасьӧны, окасьӧны, Морта-мортӧс нырӧны… 1867.
