ЙӦКТАН СЬЫЛАНКЫВЪЯСІ Гулю аддзас шобді тусь, Регыдджыка кокыштас, Нывкӧд вочча воас зон, Чӧскыдджыка окыштас! II Зонмӧ, зонмӧ, гажа ов! Кокыд на тай кокньыд! Джодж мед вӧрас, эн тэ пов! Йӧктышты да окнит! III Нылӧ, нылӧ, тэ ме вылӧ Меліджыка видзӧдлы! Месӧ тэнӧ, тэсӧ менӧ Окыштлы да дзигӧдлы! IV Катша-рака ывлаын Лунтыр талун шувгисны; Зонъяс, нывъяс керкаын Войбыд тавой увгасны! V Коді лёк зон, коді лёк ныв, Татчӧ оз ков налы локны, Зэв мед найӧ поласны! Коді омӧль нывсӧ ваяс? Коді петас лёк зон саяс? Сідзи мед и оласны! VI Адӧ некод эн пыр! Кылӧ, Адын биыс кустӧм! Эн пет верӧс сайӧ, нылӧ, Кодыр сійӧ мустӧм! Мустӧмыдлӧн мисьтӧм бугыль, Зырымӧсь тай парыс, Мустӧмыд тай бӧб и дзугыль, Ло кӧть сійӧ карысь! Мустӧмыдкӧд медводз войӧ Коньӧрушка бӧрддзас! Мустӧмыд кӧ кучкас, ой-ой, Шаня бара мӧрччас! VII Тра-ла-ла! Пӧръяла Шаня тарыт мамӧс! Шуа: лэдз войпукны — Нывъяс быдсӧ рамӧсь! Мед сэн зэр, мед сэн шер, Тӧв кӧть тӧлӧд юрӧс, Мед сэн гым, мед сэн лым! Код кӧть паныд сюрас! Пемыдӧн печканӧн Ӧдйӧн коля гортӧс! Пемыднас ывлаас Аддза ӧти мортӧс… Сылы ме шуа сідз: «Муса, мича Ваня! Тӧдан-ӧ, пӧръялі Ачымӧс ме шаня! Нывъюрӧс янӧді, Синмӧ меным сьӧвзьы! Колантор, бур нимӧй, Меысь тӧлӧн тӧвзьы!» 1865 во, сентябрь 24. VIII «Мунам сьывны-ворсны!»— Зонмыс нывлы шуыштас; Сьывны-ворсны нуыштас, Зонмыс нывсӧ уыштас! IX Ок, ок, ок! Муса вок, Эн тэ ме дінӧ лок! Мый он лок, мый дыр он, Тэ, мӧд керкаса зон? Быттьӧ он на тэ тӧд, Шань мем йӧз пиыскӧд! Тэнӧ ме небыда, Небыда дзигӧда! Окышта сэтшӧма, Быттьӧ чуньыштан ма! Мусаджык лоан нэм Ай-мамысь, дерт, тэ мем! Сентябрь 25. (1865) X ………………….. ………………….. Рузум нёнь эм сӧмын ӧмӧй? Чӧскыд меям окыштӧмӧй! Сентябрь 29 [1865] ХІ Тарыт, бур йӧз, гажӧдча, Уджавны ӧд эшта! Квайт лунӧн ме тарытся Гажӧдчӧмӧс вешта! Аски оз тай шуны тэд; «Йӧктӧмсьыд пӧ, гашкӧ, Кокыд висьӧ — шойччас мед! Вомыд пыр на кашкӧ!» Шебрастӧ тай кыскасны — Ун йывсьыд тэ чеччан! Кашкытӧдзыд уджавны Му-видз вылӧ лэччан! Гожсяс еджыд чужӧмыд, Яй-лы усяс-бырас, Кокад жельнӧг, синмад кыд, Кӧмад лысва пырас! Тарыт, бур йӧз, гажӧдча, Уджавны ӧд эшта! Квайт лунӧн ме тарытся Гажӧдчӧмӧс вешта! 30 сентябрь. 1865.Тайӧ юрнимсӧ сетӧма условнӧ. Куратовлӧн юргижӧдыс роч вылын татшӧм: «Песни и прибаутки для зырянских хороводов (набросаны по просьбе зырянок)», «йӧктан сьыланкывъяс» термин босьтӧма «Кутшӧм коми виршъяс» Куратов кывбурысь.
